އިރުމަތީ ގުދުސްގެ އުންމު ލައިސޫންގައި އިޒްރޭލުން އާ ބިން ފޭރުމުގެ މަޝްރޫއެއް ކުރިއަށް ގެންދަނީ

އިޒްރޭލުން ހިފާފައިވާ އިރުމަތީ ގުދުސްގެ ފަލަސްތީނު މީހުން ދިރިއުޅޭ އަވަށެއް ކަމަށްވާ އުންމު ލައިސޫންގެ ތެރޭގައި، ބައިނަލްއަގުވާމީ ގާނޫނުތަކާ ހިލާފަށް ޔަހޫދީން ވަޒަންވެރިކުރުވުމުގެ ބޮޑު މަޝްރޫއެއް ކުރިއަށް ގެންދަން އިޒްރޭލުގެ ކަމާބެހޭ ފަރާތްތަކުން ނިންމައިފިއެވެ.

އިޒްރޭލުގެ ޖަމާއަތެއް ކަމަށްވާ "އިރް އާމީމް" އިން ނެރުނު ބަޔާނެއްގައި ބުނެފައިވަނީ، ގުދުސްގެ ޑިސްޓްރިކްޓް ޕްލޭނިން އެންޑް ބިލްޑިން ކޮމިޓީން މިހާރު ވަނީ އުންމު ލައިސޫންގައި ޔަހޫދީންނަށް ހާއްސަ 450 ހައުސިން ޔުނިޓް އެޅުމުގެ ހުއްދަ ދީފައި ކަމަށެވެ. މިއީ އިންފްރާސްޓްރަކްޗާގެ މައްސަލަތަކަކާ ހުރެ ދެ އަހަރަށް ވުރެ ގިނަ ދުވަހު މަޑުޖެހިފައި އޮތް މަޝްރޫއެކެވެ.

އުންމު ލައިސޫން އަކީ އިރުމަތީ ގުދުސްގެ ޖަބަލް އަލްމުކައްބިރާއި ސޫރު ބާހިރުގެ ދެމެދުގައި އޮންނަ އަވަށެކެވެ. މިވަގުތު އެ ސަރަހައްދުގައި ފަލަސްތީނު މީހުން ދިރިއުޅޭ 800 އެއްހާ ގެދޮރު ހުރެއެވެ.

އިރް އާމީމް ޖަމާއަތުން އިންޒާރު ދޭ ގޮތުގައި، މި މަޝްރޫއުގެ ސަބަބުން އެ އަވަށުގެ އާބާދީގެ ނިސްބަތަށާއި މުޅި ސަރަހައްދުގެ ސިފައަށް ބޮޑެތި ބަދަލުތަކެއް އަންނާނެއެވެ. ފަލަސްތީނު މީހުން ދިރިއުޅޭ އާބާދީއެއްގެ ތެރެއަށް މިހާ ގިނަ އަދަދެއްގެ ޔަހޫދީ ވަޒަންވެރިން ވެއްދުމަކީ، އެ ސަރަހައްދުގެ އިޖުތިމާއީ އަދި އުމްރާނީ އޮނިގަނޑު ހަލާކުކޮށްލާނެ ކަމެކެވެ.

އެ ޖަމާއަތުން ސިފަކޮށްފައިވާ ގޮތުގައި، މިއީ އިރުމަތީ ގުދުސްގެ ފަލަސްތީނު އަވަށްތަކުގެ ތެރޭގައި ޔަހޫދީން ވަޒަންވެރިކުރުވުމަށް މިހާތަނަށް ހިންގާ މިފަދަ އެންމެ ބޮޑު އަދި ނުރައްކާތެރި މަޝްރޫއެވެ. މިއީ ބައިނަލްއަގުވާމީ ގާނޫނުތަކާ ހިލާފަށް އިޒްރޭލުން ފަލަސްތީނުގެ ބިންތައް ފޭރިގަތުމަށް ކުރަމުންދާ މަސައްކަތަށް އިތުރުވެގެންދާ ބޮޅެއްކަން ފާހަގަކޮށްލަންޖެހެއެވެ.