ވާދޫ ބިން ހިއްކުމުގެ މަސައްކަތް ނިމޭއިރު އެ ރަށަށް ވީ ހުރިހާ ވަޢުދެއް ފުދޭނެ: ރައީސް މުޢިއްޒު

ރ ވާދޫގެ ބިންހިއްކުމުގެ މަސައްކަތް މި އަހަރު ނުވަތަ އަންނަ އަހަރު ފެށޭނެ ކަމަށާ، އެ މަސައްކަތް ނިމޭއިރު، އެމަނިކުފާނު ވާދޫއަށް ވެވަޑައިގެންނެވި ހުރިހާ ވައުދެއް ފުދޭނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރ. އަތޮޅަށް ކުރައްވަމުންދާ ދަތުރުފުޅުގެ ތެރެއިން ވާދޫއަށް ވަޑައިގެން އެ ރަށު ރައްޔިތުންނާއި ބައްދަލުކުރައްވައި ވާހަކަ ދައްކަވަމުން ރައީސް ވިދާޅުވީ، އެމަނިކުފާނު ރަށް ރަށަށް ކުރައްވާ ދަތުރުފުޅަކީ، ރިޔާސީ އިންތިޚާބުގައި އެ ރަށްރަށަށް ވެވަޑައިގެންނެވި ވަޢުދުތައް ފުއްދަވާނެ ކަމުގެ ޔަގީންކަން ދެއްވައި، އެކަންކަމާއި ގުޅޭ ވުޒާރާތަކާއި ކައުންސިލް ތަކާއި ގުޅިގެން ކަންކަން ރޭވުމަށް ކުރައްވާ ދަތުރުފުޅުތަކެއް ކަމަށެވެ. އަދި އެމަނިކުފާނު ބޭނުންފުޅުވަނީ ނަތީޖާ ނެރެދޭ ސަރުކާރެއް ގާއިމް ކުރައްވަން ކަމަށެވެ.

"އަޅުގަނޑު ދޭނެ ޔަޤީންކަމަކީ މިސަރުކާރަކީ ތިބޭފުޅުންގެ ތި ތަރައްޤީގެ ވިސްނުމުގައި އަމިއްލައަށް އިސްނަގައިގެން ކުރާ މަސައްކަތަށް ފުރިހަމައަށް އެއްބާރުލުންދޭނެ ސަރުކާރެއްކަން". ރައީސުލްޖުމްހޫރިއްޔާ ވިދާޅުވިއެވެ.

މިއާއެކު އެމަނިކުފާނު ވަނީ ވާދޫއަށް ދިމާވެފައިވާ ދަތި ދަތިތަކާއި އެ ރަށުގެ ތަރައްގީއަށް ކުރުމަށް ރޭވިފައިވާ ކަންކަމުގެ މައްޗަށް އަލުއަޅޔވާ ލައްވާފައެވެ.

"ވާދޫގައި ގޯތިތަކެއް ދޫކުރުމަށް ކައުންސިލުން ވަނީ ނިންމާފައި ނަމަވެސް ގޯތި ނުދެވިފައި ކުނި ކޮށީގެ މައްސަލައިގައި. އެކަން މާ ލަސްތަކެއްނުވެ ކަމާ ގުޅޭ މުވައްސަސާތަކުގެ ވެރިންނަށް ދަންނަވާފައިވާނެ މައްސަލަ ހައްލު ކުރުމަށް. އެހެންވީ ކުނީގެ މައްސަލަ ހައްލުވެގެންދާނެ ވަރަށް އަވަހަށް. ރީ ލޮކޭޓް ކުރެވުނީމަ އަދި ދާއިމީ ގޮތުން ވެސް ކުނީގެ މައްސަލައަށް ހައްލެއް ގެންނާނެ. އެކަން ހަމަޖެހިގެން ދާއިރު ދޫކުރަން ނިންމާފައިވާ ގޯތިތައް ވެސް ދެވިގެންދާނެ.". ރައީސް މުޢިއްޒު ވިދާޅުވިއެވެ.

މީގެ އިތުރުން، ވާދޫ ގިރާ ސަރަހައްދުގެ މައްސަލައަށް އަވަސް ޙައްލެއް ބޭނުންވާކަމަށާއި، އަދި އެ ރަށުގެ ބަނދަރުގެ މަސައްކަތްވެސް ރައްޔިތުން އެދޭ ގޮތަށް ކޮށް ނިންމަވާނެ ކަމުގެ ޔަގީންކަން ރައީސް ދެއްވިއެވެ.

"އިރާދަކުރެއްވިއްޔާ ސްކޫލަށް ބޭނުންވާ އިތުރު ކޮމްޕިއުޓަރ ލެބާއި ސްޓާފްރޫމް ހެދުމަށް މަގުފަހިކޮށްދިނުމަށް ސަރުކާރުގެ ވުޒާރާތައް މެދުވެރިކޮށް ކޮށްދޭނަން. ކައުންސިލް އަދި ރައްޔިތުން ބޭނުންވާގޮތަށް ފުރިހަމަ އެއްބާރުލުން ދޭނަން. ސްކޫލަށް ޖާގަ އިތުރުކުރުންކަމަށްވިޔަސް ވަސީލަތް އިތުރުކުރުންވެސް ކުރިއަށްދާނެ. ހަމަ އެހެންމެ ސިއްޙީ ދާއިރާއަށްވެސް. ހުރިހާ ރަށަކަށް ލެބޯރެޓަރީ އިތުރުކޮށް ޚިދުމަތްދޭ ވަގުތު އިތުރުކޮށްދިނުން އެއީ އަޅުގަނޑު ވެފައިވާ ވަޢުދެއް. އެކަން ކުރިއަށްދާނެ". ރައީސުލްޖުމްހޫރިއްޔާ ވިދާޅުވިއެވެ.

ހަމަ އެއާއެކު، ވާދޫއަށް ބިން އިތުރުކުރުމަށް ރައްޔިތުން ބޭނުންވާކަން ފާހަގަކުރައްވާ ރައީސް ވިދާޅުވީ މިއަހަރު ނުވަތަ އަންނަ އަހަރު ބިން ހިއްކުމުގެ މަސައްކަތް ކުރިއަށްގެންދަވާނެކަމަށެވެ.

އިރާދަކުރެއްވިއްޔާ މިރަށަށް މި ދެންނެވި ހުރިހާ ދާއިރާ އަކުން ކުރަން ހުރި ކަންކަން މި އަހަރުތެރޭގައި ފެނިގެންދާނީ އަމަލީ ގޮތުން ހިނގާ އަދި ނިމިގެންދާތަން… އަދި މި އަހަރު ނޫނީ އަންނަ އަހަރު އަޅުގަނޑުގެ ވައުދު ފުއްދުމަށްޓަކައި ވާދޫގައި ބިންހިއްކުމުގެ މަޝްރޫޢު ކުރިއަށް ގެންގޮސްދޭނަން. އޭރުން އަޅުގަނޑު މި ރަށުގައި ވީ ހުރިހާ ވައުދެއް ފުއްދައި ދެވޭނެ.

ރައީސް މުޢިއްޒު

މީގެ އިތުރުން، ފުލުހުންގެ ޚިދުމަތް ފުޅާކުރުމަށްވެސް މަޝްރޫޢެއް ފަށާފައިވާކަމަށާއި، ހުރިހާ ރަށަކަށް ބޭނުންވާ މިންވަރަށާއޖ ސައިޒަށް ފުލުހުންގެ މަރުކަޒު ޤާއިމްކުރައްވާނެކަމަށް ރައީސް ވިދާޅުވިއެވެ. އަދި މިއަހަރުގެ ނިޔަލަށް ރާއްޖޭގެ ހުރިހާ ރަށެއްގައި އެރަށަކަށް އެކަށީގެންވާ މިންވަރަށް ފުލުހުންގެ އަމިއްލަ ޢިމާރާތުގައި ޚިދުމަތް ފަށާނެކަމަށާއި، އޭގެތެރޭގައި ވާދޫވެސް ހިމެނޭކަން ރައީސް ފާހަގަކުރެއްވިއެވެ.