ފަށާފައި ހުރި ކުޅިވަރު މަޝްރޫއުތަކުގެ އަގު މުޅި ދައުލަތުގެ 2 އަހަރުގެ ބަޖެޓަށް ވުރެ ބޮޑު: ވަޒީރު ރާފިޢު
ލިޔުންތެރިޔާ
ޚަދީޖާ އަރުފާ
ކުޅިވަރުގެ ދާއިރާގެ މަޝްރޫއުތަކުގެ އަގު މުޅި ދައުލަތުގެ ދެ އަހަރުގެ ބަޖެޓަށް ވުރެ ބޮޑު ކަމަށް ކުޅިވަރާ ބެހޭ ވަޒީރު އަބްދުالله ރާފިއު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރާ ސުވާލު ކުރުމަށް ދެވުނު ފުރުސަތުގައި ށ. އަތޮޅުގެ ބައެއް ރަށްރަށުގައި ކުރިއަށް ގެންދަން ނިންމާފައިވާ ޕްރޮޖެކްޓްތަކާ ގުޅޭގޮތުން ކަނޑިތީމު ދާއިރާގެ މެންބަރު އަމީން ފައިސަލް ވަނީ ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން ވަޒީރު ވިދާޅުވީ ކުޅިވަރަކީ އެންމެން އެއްބައުވަންތަ ކުރާ އެއްޗަކަށް ވާއިރު، އެއީ މި ސަރުކާރުން އެންމެ އިސްކަމެއްދޭ އެއް ކަންތައް ކަމަށެވެ.
އަދި މި ސަރުކާރުން ކުޅިވަރު ޕްރޮޖެކްޓް ތައް ކުރިއަށް ގެންދަވާނީ އެއްވެސް ސަރަހައްދަކަށް ތަފާތު ކުރުމެއް ނެތިކަން ފާހަގަކުރައްވައި ވަޒީރު ވިދާޅުވީ، ޕްރޮޖެކްޓްތައް ކުރިއަށް ގެންދަން ދިމާވާ އެންމެ ބޮޑު ގޮންޖެހުމަކީ ބަޖެޓުގެ ތާށިކަން ކަމަށެވެ.
"ވަރަށް ބައިވަރު ޕްރޮޖެކްޓްތަކެއް އެބަހުރި، އަޅުގަނޑު މީގެކުރިން ވެސް ދެންނެވި ފަދައިން އަޅުގަނޑުމެންގެ މުޅި ހުރިހާ ޕްރޮޖެކްޓެއް އެއްކޮށްލީމަ ދެ އަހަރުގެ ބަޖެޓަށްވުރެ ބޮޑު،"
ކުޅިވަރާ ބެހޭ ވަޒީރު އަބްދުالله ރާފިއު
އެހެންކަމުން، ރަށްރަށުގައި ޕްރޮޖެކްޓުތައް ކުރިއަށް ގެންދާއިރު، ކޮންމެ ރަށެއްގައުވެސް އެ ރަށަކަށް އެންމެ މުހިންމު ޕްރިޖެކްޓްތަކަށް އިސްކަންދީގެން، އެ މަސައްކަތް ކުރިއަށް ގެންދިޔުމަށް ރަށްރަށުގެ ކައުންސިލްތަކާ މަޝްވަރާކުރައްވާނެ ކަމަށް ވަޒީރު ވިދާޅުވިއެވެ.
ވަޒީރު ރާފިޢު އިތުރަށް ވިދާޅުވިގޮތުގައި، މިހާރު ވެސް ޕްރޮޖެކްޓްތައް ކުރިއަށް ގެންދަނީ ތިނެއް ނުވަތަ ހަތަރުވަނަ ކުއާޓަގައި، އަހަރުގެ ފަހުކޮޅު އިއުލާނުކޮށްގެން ކަމަށާއި އެއީ ވެސް ބަޖެޓުގައި އެ ޕްރޮޖެކްޓަކަށް ހިމެނިފަ ހުރި އަދަދު ކުޑަވުމުން ކަމަށެވެ. އެފަދައިން ކަން ކުރުމުން ހުއްޓުމެއް ނެތި ޕްރޮޖެކްޓް ކުރިއަށް ގެންދެވޭނެކަން ވަޒީރު ފާހަގަކުރެއްވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
