ރައީސް މުޢިއްޒަށް ދިމާވެފައި އޮތްވަރުގެ، އިގްތިޞާދީ ދަތި ޗެލެންޖެއް އެހެން ރައީސަކަށް ދިމައެއް ނުވޭ: ޖަނާހު

ރައީސުލްޖުމްހޫރިއްޔާ ޑރ މުހައްމަދު މުޢިއްޒަށް ކުރިމަތިލައްވަން ޖެހިވަޑައިގެންފައިވަނީ ރާއްޖޭގެ އެހެން އެއްވެސް ރައީސަކަށް އިގްތިޞާދީ ގޮތުން ކުރިމަތިލައްވަން ނުޖެހޭ ވަރުގެ ބޮޑު ގޮންޖެހުމަކާއި ކަމަށް ޕްރިންސިޕަލް އެޑްވައިޒަރު ޓު ދަ ޕްރެސިޑެންޓް އޮން ޓްރޭޑް އިންވެސްޓްމަންޓް މުހައްމަދު އަލީ ޖަނާހް ވިދާޅުވެއްޖެެއެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު ރާއްޖޭގެ ދެކުނަށް ކުރައްވަމުންދާ ދަތުރުފުޅުގެ ތެރެއިން ގއ ވިލިގިނލި އަށް ވަޑައިގެން އެރަށު ރައްޔިތުންނާ ބައްދަލު ކުރައްވަން ބޭއްވި ޖަލްސާގައި ވާހަކަ ދައްކަވަމުން ޖަނާހު ވަނީ އިގްތިސާދީ ގޮތުން ރައީސް މުޢިއްޒަށް ކުރިމަތިލާން ޖެހިވަޑައިގެންފައިވާ ގޮންޖެހުންތަކަށް އަލިއަޅުވާލައްވާފައެވެ.

އަޅުގަނޑު އިކޮނަމިކް އޭންގަލް އަކުން ދަންޏާ، ރައީސުލްޖުމުހޫރިއްޔާ ޑރ މުހައްމަދު މުޢިއްޒަށް ދިމާވެފައި އޮތްވަރުގެ އުނދަގޫ ދަތި ޗެލެންޖެއް، ދިވެހިރާއްޖޭގެ އެއްވެސް ރައީސަކަށް ދިމައެއް ނުވޭ. އެކަމު ދަންނަވަންތޯ؟ އަޅުގަނޑުމެން މި ތިބީ އެ ޗެލެންޖާ ކުރިމަތިލާން ރައީސް އާއެކު. މި ޗެލެންޖް ކާމިޔާބު ކުރާނަން އިނގޭތޯ.

މުހައްމަދު އަލީ ޖަނާހް

މިއާއެކު ޖަނާހު ވިދާޅުވީ، 1990ގެ އަހަރު ތަކުންފެށިގެން، ރާއްޖޭގެ އިގްތިސާދު މެނޭޖު ކުރަމުން އަންނަނީ އެކަން ކުރަންވީ ގޮތަކަށް ނޫން ކަމަށެވެ.

ތަފާތު އެކިއެކި ގޮތްގޮތަށް. އެއިރަކު އެ ހުންނަވާ ވެރިއަކު ބޭނުންފުޅުވާ ގޮތަކަށް، ކިތަންމެ އިކޮނަމިސްޓުންނެއް ކިތަންމެ ލަފައެއް ދިނަސް، އެ ލަފާއާއި ޚިލާފަށް. ވެރިކަން ދެމެހެއްޓުމަށް އެކުރަންޖެހޭ ކަމެއް ކުރަމުން. ސަބްސިޑީ ދެމުން. ތަފާތު ކުންފުނިތައް އުފައްދަމުން އައިސް މިއަދު މިއޮތީ، އޭގެ ބުރަދަނުގައި، ގައުމަކަށް ހިފޭ ވަރަށްވުރެ މާ ބުރަ ބޮޑު ހާލަތެއްގައި. އެކަމާއި ކުރިމަތި ލައްވަން ރައީސުލްޖުމުހޫރިއްޔާ ގެންނެވީ ވަރަށް ރަނގަޅު ޓީމެއް.

މުހައްމަދު އަލީ ޖަނާހް

ޖަނާހު އިތުރަށް ވިދާޅުވީ, ރައީސުލްޖުމުހޫރިއްޔާ ބޭނުންފުޅުވަނީ ރާއްޖެ އެހެން ގައުމުތަކަށް އަޅުވެތި ނުވެ، އެހެން ގައުމަކަށް ބުރަ ނުވެ، އަމިއްލަ ފައިމައްޗަށް ތެދުވުމަށް މަސައްކަތް ކުރައްވަން ކަމަށާ، ދިވެހިންގެ އިގްތިޞާދު ދިވެހިންގެ އަތްމަތީގައި އޮންނަން ކަމަށެވެ.

ދިވެހިރާއްޖެއަކީ އަސޭކަރައިން އަސޭމިރުސް ގަނެގެން، ދިވެހިރާއްޖެއަށް ޓްރާންސިޓް ކޮށް، ރެޑްސީ ކަނޑު ހުރަސްކޮށް، ވެނިސްްއަށް އުފުލިބައެއް. ތަރީޚްގައި އެބަ އޮތް. އަޅުގަނޑުމެންގެ ރައީސް އެ ހުންނެވީ އެ ދިވެހިރާއްޖެ އިރާދަކުރެއްވިޔާ އިއާދަ ކޮށްދެއްވަން.

މުހައްމަދު އަލީ ޖަނާހް

ޖަނާހު ވިދާޅުވީ ރައީސުލްޖުމްހޫރިއްޔާ ކުރައްވަން ފަށްޓަވާފައިވާ މަސައްކަތަކީ، "ހަމައިން ނެއްޓި، އޮޅުން ބޮޅުން ވެފައި އޮތް އިގްތިސާދެއްގެ، އޮޅުން ބޮޅުން ފިލުވައި، ނިއުޅުވައިގެން، ރަނގަޅު ހަމައަކަށް އެޅުވުމުގެ މަސައްކަތްޕުޅު" ކަމަށެވެ.

އަދި އެ ކުރައްވަމުން އެ ގެންދަވާ މަސައްކަތުގެ ތެރެއިން ބޮޑެތި ގޮންޖެހުންތަކާއި ކުރިމަތިލައްވަން ޖެހިވަޑައިގަންނަވާނެ ކަމަށެވެ.

އެހެންކަމުން، ޚިޔާލު ތަފާތުންވުންތައް އޮތް ނަމަވެސް ދިވެހިރާއްޖޭގެ އިގްތިސާދާއި ގުޅިގެން ދޮގު ވާހަކަތައް ނުފަތުރަން ޖަނާހު ވަނީ އެދިވަޑައިގެންފައެވެ. އެފަދައިން ވާހަކަތައް ފަތުރާނަމަ، އިންވެސްޓަރުންގެ އިތުބާރު ރާއްޖެއަށް ގެއްލި، އެކަމުގެ އެންމެ ބޮޑު ގެއްލުމެއް ލިބިގެންދާނެ އާއްމު ރައްޔިތުންނަށް ކަމަށް އޭނާ ވިދާޅުވި އެވެ.