ޣައްޒާގައި ހިންގަމުންދާ ގަތުލުއާއްމާއި ގުޅިގެން އިސްރާއީލުގެ އާއްމުންވެސް މުޒާހަރާ ކުރަނީ
ހައްދުފަހަނައަޅާފައިވާ ޔަހޫދީން ޣައްޒާގައި ހިންގަމުންދާ ގަތުލުއާއްމާއި ގުޅިގެން އިސްރާއީލުގެ އާއްމުންވެސް މުޒާހަރާ ކުރަން ފަށައިފިއެވެ.
އިސްރާއީލުގެ ގިނަ ބަޔަކު ވަނީ އެ ގައުމުގެ ގާނޫނު ހަދާ މަޖިލީހުގެ ކުރި މައްޗަށް އެއްވެ ވަގުތުން ހަނގުރާމަ ހުއްޓާލައި، ރަހީނުކޮށްފައި ތިބި މީހުން ދޫކޮށްލުމަށާއި 2026 ބޭއްވުމަށް ހަމަޖެހިފައިވާ އެގައުމުގެ އިންތިހާބު އަވަސް ކުރުމަށް ގޮވާލާފައެވެ.
މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ނިރުބަވެރި އިސްރާއީލު ސިފައިން ޣައްޒާއަށް ހަމަލާ ދޭން ފެށީންސުރެ ވެސް އެ ގައުމުގައި އަންނަނީ މުޒާހަރާ ކުރަމުންނެވެ. ނަމަވެސް މިއީ މިހާތަނަށް އެންމެ ގިނަ ބަޔަކު އެއްވެ ބޭއްވި މުޒާހަރާކަމަށް ބޭރު ދުނިޔޭގެ ހަބަރުތަކުން ރިޕޯޓް ކުރެއެވެ.
ހަނގުރާމަ ހުއްޓައިނުލާ ކުރިއަށްގެންދާތީ، އިސްރާއީލުގެ އަނިޔާވެރި ބޮޑު ވަޒީރު ބެންޖަމިން ނަތަންޔާހޫ އަށް އެގައުމުގެ އާންމުންގެ ފާޑުކިޔުންތައް ވަރަށް ބޮޑަށް އަމާޒުވެފައިވާއިރު، އޭނާ އިސްތިއުފާ ދިނުމަށްވެސް ބައެއް މީހުން އަންނަނީ ގޮވާލަމުންނެވެ. އާންމުންގެ ނުރުހުން ނަތަންޔާހޫ އަށް އަމާޒުވެފައިވާއިރު، އޭނާގެ މައްޗަށް އަންނަނީ ކޮރަޕްޝަންގެ ބޮޑެތި ތުހުމަތު ތަކެއް ވެސް ކުރެވެމުންނެވެ.
އިސްރާއީލުގެ އާންމުންގެ އިތުރުން، މުޅި ދުނިޔެއިން ވެސް ޣައްޒާގައި ޔަހޫދީން ހިންގަމުންދާ ގަތުލުއާންމު ހުއްޓާލުމަށް ގޮވާލަމުންދާއިރު، ނަތަންޔާހޫ ވަނީ ހަނގުރާމަ ހުއްޓާލާނީ ހަމާސް ބަލިކުރުމަށް ފަހުގައި ކަމަށް ބުނެފައެވެ.
އިސްރާއީލުން ޣައްޒާއަށް ދެމުންގެންދާ ލާއިންސާނީ ހަމަލާތަކުގެ ސަބަބުން މިހާތަނަށް 32,782 ޝަހީދުވެފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިންކަން ފާހަގަކޮށްލަން ޖެހެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
