އަހަރުގެ މިހާތަނަށް 1.28 ފަތުރުވެރިން ރާއްޖެ އަތުވެއްޖެ

އަހަރުގެ މިހާތަނަށް ދިވެހިރާއްޖެއަށް 1.28 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން ނެރެފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މިދިޔަ ހޯމަދުވަހުގެ ނިޔަލަށް ރާއްޖެއަށް ވަނީ 1,281,360 ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު ދަށް އަދަދެއް ނަމަވެސް އޭގެ ކުރީއަހަރާ އަޅާބަލާއިރު އިތުރުވުމެކެވެ. ތަފާސްހިސާބުތަކަށް ބަލާއިރު 2025 ވަނަ އަހަރުގެ މި މުއްދަތުގެ ތެރޭގައި ރާއްޖެއަށް 1,341,550 ފަތުރުވެރިން ޒިޔާރަތްކޮށްފައިވާއިރު، އޭގެ ކުރީ 2024 ވަނަ އަހަރުގެ އެ މުއްދަތުގެ ތެރޭގައި ޒިޔާރަތްކޮށްފައި ވަނީ 1,223,865 ފަތުރުވެރިންނެވެ،.

މިއަހަރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު މަދުވެފައިވަނީ މެދުއިރުމަތީގެ ހަނގުރާމައާ ގުޅިގެންނެވެ. އެގޮތުން އީރާނުގެ މަޗްރަހް އެންމެ ހޫނުވި ދަނޑިވަޅުގައި ރާއްޖެއަށް އެންމެގިނައިން ފަތުރުވެރިން ގެންނަ ޤަތަރު އެއާވޭސް، އެމިރޭޓްސް، އިއްތިހާދު ފަދަ އެއާލައިންތައް ވަނީ އެއްކޮށްހުއްޓާލާފައެވެ. ފަހުން އެއާލަިއންތަކުން ދަތުރުތައް ފެށިނަމަވެސް ދަތުރުކުރަމުންދިޔައީ ހިފެހެއްޓުންތަކާއެކުގައެވެ. ނަމަވެސް މިހާރު އެ އެއާލައިންތަކުން އަންނަ ފަތުރުވެރިންގެ އަދަދު އަންނަނީ އިތުރުވަމުންނެވެ. ތަފާސްހިސާބުތަކަށް ބަލާއިރު ކުރިއާ ހިލާފަށް މިހާރު ދުވާލަކު އެވްރެޖްކޮށް ރާއްޖެ އަންނަ ފަތުރުވެރިންގެ އަދަދަށް ވަނީ ކުރިއެރުމެއް ލިބިފައެވެ. މީގެ މަހެއްހާ ދުވަސްކުރިން ދުވާލެއްގެ މައްޗަށް ރާއްޖެ އަންނަ ފަތުރުވެރިންގެ އަދަދު 4،000 ހާހުގައި ހުރިނަމަވެސް މިހާރު އެއަދަދު އުޅެނީ ގާތްގަނޑަކަށް 6،000 ހާހުގައެވެ.

އަހަރުގެ މިހާހިސާބަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ޤައުމުތަކުގެ ތެރޭގައި ހިމެނެނީ ޗައިނާ، ރަޝިއާ އިނގިރޭސިވިލާތް، އިޓަލީ، ޖަރުމަނުވިލާތް އަދި އިންޑިއާ އެވެ.

އެންމެގިނައިން ފަތުރުވެރިން ޒިޔާރަތްކުރި ޤައުމުތައް:

ޗައިނާ: 224,107

ރަޝިއާ: 183,96

އިނގިރޭސިވިލާތް: 99,286

އިޓަލީ: 81,144

ޖަރުމަނުވިލާތް: 78,046

އިންޑިއާ: 72,773

މިއަހަރު ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ވެލާނާ އިންޓަރނޭޝަނަލް އެއާޕޯޓް މެދުވެރިކޮށެވެ. އޭގެ އިތުރުން ދެން އެންމެ ގިނައިން ފަތުރުވެރިން ޒިޔާރަތްކޮށްފައިވަނީ، ގަން އިންޓަރނޭޝަނަލް އެއާޕޯޓާއި، މާފަރު އެއާޕޯޓަށެވެ.

އެންމެގިނައިން ފަތުރުވެރިން އައި އެއާޕޯޓް

ވީއައިއޭ: 1,250,875

އައްޑޫ ގަން: 4,632

މާފަރު: 4,201

ހަނިމާދޫ: 2,722

ރާއްޖެއަށް ޒިޔާރަތްކުރާ ފަތުރުވެރިންގެ އަދަދަށް ބަލާއިރު މުހިންމު މާކެޓްތަކުން އަންނަ ފަތުރުވެރިންގެ އަދަދު ދަށަށް ނުގޮސް ހިފެހެއްޓިފައި ހުންނަކަން ފާހަގަކޮށްލެވެއެވެ. އެގޮތުން އެމެރިކާ ސްވިޒަރލޭންޑް އަދި އޮސްޓްރޭލިއާ ފަދަ ޤައުމުތަކުން އަންނަ ފަތުރުވެރިންގެ އަދަދު އިތުރުވަމުން އަންނަކަން ފާހަގަކޮށްލެވެއެވެ.