ކޭވްގައި ތާށިވި ޑައިވަރުން ހޯދުމުގެ އޮޕަރޭޝަން: ބާކީ ތިބި ދެ މީހުންގެ ހަށިގަނޑުވެސް ނަގައިފި

ވ. އަތޮޅުގައި ޑައިވިނަށް ގޮސް އުޅެނިކޮށް ގެއްލުނު އިޓަލީގެ ހަތަރު ފަތުރުވެރިން ހޯދުމަށް ކުރިއަށްގެންދިޔަ ޚާއްޞަ އޮޕަރޭޝަނުގައި، ބާކީ ތިބި ދެ މީހުންގެ ހަށިގަނޑު މިއަދު ނަގައިފިއެވެ.

އިޓަލީގެ ޚާރިޖީ ވުޒާރާއާ ހަވާލީ އެ ގައުމުގެ ނޫހަކުން ހާމަކޮށްފައިވާ ގޮތުގައި، މި ދެ މީހުންގެ ހަށިގަނޑު ފެނިފައިވަނީ އިޓަލީ ގަޑިން މިއަދު ހެނދުނު 8:00 ހާއިރު ކުރި ޑައިވްގައެވެ. މީގެ ތެރެއިން އެކެއްގެ ހަށިގަނޑު މިހާރު ވަނީ ލޯންޗަކަށް ނަގާފައެވެ. އަދި ދެވަނަ މީހާގެ ހަށިގަނޑު ނެގުމުގެ މަސައްކަތް ކުރަމުންދަނީ ޑިކޮމްޕްރެޝަން ސްޓޮޕްތައް ފުރިހަމަކުރަމުންނެވެ.

މިއަދު ފެނުނު ދެ ހަށިގަނޑަކީ އުމުރުން 23 އަހަރުގެ ޖިއޯޖިއާ ސޮމަކަލް އާއި މުރިއެލް އޮޑެނީނޯގެ ހަށިގަނޑެވެ. މުރިއެލް އަކީ ޔުނިވަރސިޓީ އޮފް ޖެނޯއާގެ ރިސާޗް ފެލޯއެއްގެ އިތުރުން ޕްރޮފެސަރ މޮނިކާ މޮންޓެފަލްކޯންގެ އެހީތެރިއެކެވެ.

މި ހަތަރު ފަތުރުވެރިން ހޯދުމުގެ މަސައްކަތް ކޮށްފައިވަނީ އެމްއެންޑީއެފް ކޯސްޓްގާޑާއި، ފުލުހުންގެ ޚިދުމަތުގެ އިތުރުން އިޓަލީ ސަރުކާރުން ހަމަޖެއްސި ބޭރުގެ ތަޖުރިބާކާރު ޑައިވަރުން ގުޅިގެންނެވެ. މި އެންމެންގެ ހަށިގަނޑުތައް ވެސް ފެނިފައިވަނީ އެމީހުން ޑައިވް ކުރަން ދިޔަ ކޭވް (ހޮހަޅަ) ތެރެއިންނެވެ. މީގެ ތެރެއިން ދެ މީހެއްގެ ހަށިގަނޑު ވަނީ އިއްޔެ ކުރި ޑައިވްގައި ނަގާފައެވެ.

މި އޮޕަރޭޝަނާ ގުޅޭގޮތުން ރައީސް އޮފީހުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވީ، މި މަސައްކަތަށް ފިންލޭންޑްގެ ތަޖުރިބާކާރު ތިން ޑައިވަރުން ރާއްޖެ އައީ އިޓަލީ ސަރުކާރުގެ އެދުމުގެ މަތިން ކަމަށެވެ. މި ޓީމުގައި ކޭވް ޑައިވިންގ އަށް ޚާއްޞަ ތަޖުރިބާކާރުންނާއި ބޭނުންވާ ޒަމާނީ އާލާތްތައް ހިމެނެއެވެ.

މި ހިތާމަވެރި ހާދިސާގައި ގެއްލުނު މީހުން ހޯދުމުގެ މަސައްކަތް ކުރަމުން ދަނިކޮށް، މިމަހުގެ 16 ވަނަ ދުވަހު އެމްއެންޑީއެފްގެ ސާޖަންޓް ފަސްޓް ކްލާސް މުޙައްމަދު މަހުދީ ވަނީ ނިޔާވެފައެވެ.