ކުލަބު ޕީކޭ ބަލިކޮށް އޮޑި ބަދަވީސް މުބާރާތުގެ ދެވަނަ ބުރަށް

ވިލިމާލޭގައި މިހާރު ކުރިއަށްދާ "އޮބިއަން ޓީއެފްޓީ 11 ވަނަ ރަމަޟާން ފުޓްސަލް ޗެލެންޖު 2024" ގައި އަންގާރަދުވަހުގެރޭ ކުޅެވުނު ފުރަތަަމަ މެޗުގައި ގުރޫޕް ބީގެ އޮޑި ބަދަވީސް އާއި ކުލަބު ޕީކޭ ވާދަކުރި މެޗު 4-0 ގެ ނަތީޖާއަކުން ކާމިޔާބުކޮށް ބާކީ އެއް މެޗު އޮއްވައި އޮޑި ބަދަވީސް އިން މުބާރާތްގެ ދެވަނަ ބުރުގެ ޖާގައެއް ކަށަވަރުކޮށްފިއެވެ.

މުބާރާތުގައި އޮޑި ބަދަވީސް ކުޅުނު ފުރަތަަމަ މެޗުގައި ވެސްޓެންޑް އެސްސީ އަތުން 8-1 ގެ ތަފާތުބޮޑު ނަތީޖާއަކުން އެޓީމު މޮޅުވެފައި ވާއިރު، ކުލަބު ޕީކޭ އިން މުބާރާތްގައި ކުޅުނު ފުރަތަަމަ މެޗުގައި ބިރާގަން އެސްސީ އަތުން އެޓީމު ވަނީ 4-1 ގެ ނަތީޖާއަކުން ބަލިވެފައެވެ.

ވިލިމާލޭ ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފު 1-0 ގެ ނަތީޖާއަކުން އޮޑި ބަދަވީސް ކުރީގައި އޮވެގެން ނިމުނުއިރު، މެޗުގެ ދެވަަނަ ހާފުގައި އެޓީމުން ވަނީ އިތުރު ތިން ލަނޑު ކާމިޔާބުކޮށްފައެވެ.

އެގޮތުން މިމެޗުގައި އެޓީމުގެ އަބްދުﷲ ޝައްފާން އަދި ނާއިލް އާދިލްގެ އިތުރުން ސާމިން ނަސީރު މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑަކީ ކުލަބު ޕީކޭގެ އަލީ ހުޝާމް އަތުން ބައިކޮޅަށް ވަން ލަނޑެކެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ އޮޑި ބަދަވީސްގެ ސާމިން ނަސީރު އެވެ.

މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން 6 ޕޮއިންޓް ހަމަކޮށް ބާކީ އެއް މެޗު އޮއްވައި އޮޑި ބަދަވީސް އިން ވަނީ މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފަ އެވެ. އަދި މިމެޗުން ބަލިވި ކުލަބު ޕީކޭ އިން މުބާރާތްގައި ކުޅުނު ދެމެޗުން ވެސް ބަލިވެފައިވާ އިރު ބާކީ އެއް މެޗު އޮއްވައި އެޓީމު ވަނީ މުބާރާތުން ކަޓާފައެވެ.

ޗެންޕިއަން ޓީމަށް 50,000 އަދި ރަނަރަޕް ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު 32 ޓީމަކުން ބައިވެރިވެފައިވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 32 ޓީމު 8 ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ދެވަނަ ބުރަށް ހޮވޭގޮތަށެވެ.

މިމުބާރާތުގެ މެއިން ސްޕޮންސަރ އަކީ އޮބިއަން އެވެ. އަދި މުބާރާތުގެ މީޑިއާ ޕާޓްނަރަކަށް ވޮއިސް އެވެ.