ބައްޝާރު އަލް އަސަދު ހައްޔަރުކުރަން ފްރާންސުން އަނެއްކާވެސް އަމުރެއް ނެރެފި

ސީރިއާގެ ކުރީގެ ރައީސް ބައްޝާރު އަލް އަސަދު ހައްޔަރުކުރުމަށް ފްރާންސުން އަނެއްކާވެސް އަމުރެއް ނެރެފިއެވެ.

މިމަހުގެ 20 ވަނަ ދުވަހު މި އަމުރު ނެރެފައިވަނީ ސީރިއާގައި 2017 ވަނަ އަހަރުގެ ޖޫން މަހުގެ 7 ވަނަ ދުވަހު ހިންގި ބޮމުގެ ރެއިޑެއްގައި ސީރިއާ އަދި ފްރާންސް ދަރިކޮޅަށް ނިސްބަތްވާ ސަލާހް އަބޫ ނަބޫރު މަރުވުމާއި ގުޅޭ މައްސަލައިގެ ތަހުގީގުގެ ތެރެއިންނެވެ.

މީގެ ކުރިން 2023 ވަނަ އަހަރުވެސް އަސަދު ހައްޔަރުކުރުމަށް ފްރާންސްގެ  ކޯޓުން އަމުރުނެރުނުއިރު، އެ ފަހަރުވެސް އަސަދުގެ މައްޗަށް ވަނީ އިންސާނިއްޔަތާއި ޚިލާފު ހަނގުރާމައިގެ ކުށްތައް ކުރިކަމުގެ ދައުވާ އުފުލާފައެވެ.

އޭގެ ފަހުން 2013 ވަނަ އަހަރު ގެ އޮގަސްޓް މަހު ސީރިއާގެ ދޫމާ އަދި ގޫޓާގެ ބައެއްގައި ހިނގާދިޔަ ކެމިކަލް ހަމަލާތަކެއްގައި 1،000 މީހުން މަރުވެދިޔަ މައްސަލައިގައި ފްރާންސުން ހިންގަމުންދާ ތަހުގީގަށް ވެސް އަސަދު ހައްޔަރުކުރުމުގެ އަމުރަކަށް ވަނީ އެދިފައެވެ.

އެހެންނަމަވެސް، އަސަދުގެ ސަރުކާރުން ވަނީ ހަނގުރާމައިގައި ކެމިކަލް ހަތިޔާރު ބޭނުން ކުރިކަމަށް ދެކޮޅު ހައްދަވާފައެވެ.

އަސަދުގެ 24 އަހަރުގެ ވެރިކަން މިދިޔަ އަހަރުގެ ޑިސެންބަރު މަހުގެ 8 ވަނަ ދުވަހު ވެއްޓުމާއި ގުޅިގެން އޭނާ ވަނީ ގައުމު ފިލައިގެން ގޮސްފައެވެ. އޭގެފަހުން އޭނާ އާއި އޭނާގެ އާއިލާއަށް ރަޝިއާއިން ވަނީ ހިމާޔަތްދީފައެވެ.