ނަރުދޫއަށް އެންމެ ބޭނުންވަނީ ބަނދަރެއް، އެކަން ކޮށްދޭނަން: ރައީސް

ށ. ނަރުދޫއަށް އެންމެ ބޭނުންޖެހިފައިވަނީ ބަނދަރެއްގެ މަސައްކަތް ކަމަށާއި، ބަލަންޖެހޭ ހުރިހާ ކަންކަމަށް ބެލުމަށްފަހު އެކަން ކޮށްދެއްވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ށ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން އެ އަތޮޅު ނަރުދޫއަށް މިއަދު ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ނަރުދޫއަށް މިވަގުތު ދިމާވެފައިވާ އެންމެ ބޮޑު ދެ މައްސަލައަކީ ނަރުދަމާއާއި ބަނދަރުގެ މައްސަލަކަމަށެވެ.

އެގޮތުން އެ ރަށުގެ ބަނދަރުގެ މައްސަލައަށް ޙައްލެއް ހޯދުމަށް ޖެހޭ ހުރިހާ ކަންކަމަށް ބެލުމަށްފަހު، ބަނދަރު ބޮޑުކުރެވެން އޮތް އެންމެ ބޮޑަކަށް ބަނދަރު ބޮޑުކުރުމުގެ ހުއްދަ، ކަމާ ބެހޭ ވުޒާރާއަށް ދީފައިވާނެ ކަމަށް ރައީސް މުޢިއްޒު ވިދާޅުވިއެވެ.

ރައީސް ވިދާޅުވީ އެ ރަށުގެ ރައްޔިތުންނަށް ބަނދަރެއް ގާއިމްކުރުމަށް ކުރަންޖެހޭ ކޮންމެ ކަމެއްވެސް ކުރައްވާނެ ކަމަށާއި، އެކަމަށް ކުރަންޖެހޭ ޚަރަދަކީ އެއްވެސް މައްސަލައެއް ނޫން ކަމަށެވެ.

އަދި އެ ރަށުގެ ފެނާއި ނަރުދަމާ ޤާއިމްކުރުމުގެ މަސައްކަތް ފެނަކައިން އަލުން ފަށާނެ ކަމަށާއި، އެކަމަށްޓަކައި ވާންޖެހޭ ތައްޔާރީތައް މިހާރުވެސް ފެނަކައިން ކުރަމުންދާ ކަމަށް ވެސް ރައީސް ވިދާޅުވިއެވެ. އަދި އެ މަޝްރޫއު އަންނަ މަހުގެ ތެރޭގައި ފަށައިގަނެ، ބާރު ދުވެލީގައި ކުރިޔަށްދާނެ ކަމުގެ ޔަގީންކަން ރައީސް ވަނީ ދެއްވާފައެވެ.

އަދި ނަރުދޫން އިތުރު ގޯތި ދިނުމަށް ބޭނުންވެގެން ރަށު ކައުންސިލުން ހުށަހަޅައިފައިވާ ކަންކަމަށް ރިޢާޔަތްކުރައްވައި، ކަމާ ބެހޭ ވުޒާރާއިން އެ ހުއްދަވެސް ދެއްވާނެކަމުގައި ރައީސް ވިދާޅުވިއެވެ.

އަދި އެ ރަށުގެ ކުލާސްރޫމް އަދި މަލްޓިޕަރޕަސް ހޯލު ހިމެނޭ، ސްކޫލުގެ އައު އިމާރާތް އެޅުމުގެ މަސައްކަތް، މިއަހަރުގެ ތެރޭގައި ފެށޭނެ ކަމަށާއި، ދި ރަނގަޅު ފެންވަރަކަށް ފުޓުބޯޅަ ދަނޑު ތަރައްޤީކުރެއްވުމުގެ ޢަމަލީ މަސައްކަތްވެސް މިއަހަރުގެ ތެރޭގައި ކުރިއަށްގެންދަވާނެ ކަމުގައި ރައީސް ވިދާޅުވިއެވެ.