ފުރަތަމަ ޑިގްރީ ސްކީމުން ޝަރުޠު ހަމަނުވާ ދަރިވަރުންނަށް ނުވަ މިލިއަން ރުފިޔާ ޚަރަދުކޮށްފައިވޭ: އޮޑިޓް

ކުރިން ޑިގްރީ ޙާޞިލުކޮށްފައިވާ 271 ދަރިވަރަކަށް ސަރުކާރުގެ ފުރަތަމަ ޑިގްރީ ސްކީމުގެ ދަށުން 9,365,475 ރުފިޔާ ޚަރަދުކޮށްފައިވާކަން އޮޑިޓާ ޖެނެރަލްގެ އޮފީހުން ނެރުނު ޕާފޯމަންސް އޮޑިޓް ރިޕޯޓުން ހާމަވެއްޖެއެވެ.

އެ ރިޕޯޓުގައި ބަޔާންކޮށްފައިވާ ގޮތުގައި 2019 ވަނަ އަހަރުގެ ފެބްރުއަރީ އެކަކުން ފެށިގެން 2024 ވަނަ އަހަރުގެ ޑިސެމްބަރު 31 ގެ ނިޔަލަށް އެ ސްކީމަށް 19,265 އެޕްލިކޭޝަން ހުށަހަޅާފައިވާއިރު އޭގެ ތެރެއިން 85 އިންސައްތައަކީ ސްކީމުގައި ޢަމަލީ ގޮތުން ބައިވެރިވި 16,388 ދަރިވަރުންނެވެ. އެ މުއްދަތުގައި ދައުލަތުން ޖުމްލަ 835,697,911 ރުފިޔާ މި ސްކީމަށް ހޭދަކޮށްފައިވާ ކަމަށާއި އެއީ އެވެރެޖުކޮށް އަހަރަކު 139,282,985 ރުފިޔާ ކަމަށް ރިޕޯޓުގައިވެއެވެ.

ސްކީމުގެ އުސޫލު ބުނާ ގޮތުން ބައިވެރިވެވޭނީ ރާއްޖެއިން ނުވަތަ ރާއްޖެއިން ބޭރުން ޑިގްރީއެއް ނުވަތަ އެއަށް ވުރެ މަތީ ސަނަދެއް ހޯދާފައި ނުވާ ފަރާތްތަކަށެވެ. ނަމަވެސް, ކުރިން ޑިގްރީ ނަގާފައިވާ ފަރާތެއްތޯ ކަށަވަރުކުރެވޭނެ މަރުކަޒީ ނިޒާމެއް ޤާއިމުކޮށްފައި ނެތުމާއި މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) މެދުވެރިކޮށް އެކަން ބެލުމުގެ ޒިންމާ އެއްވެސް އިދާރާއެއްގެ މެންޑޭޓުގައި ރަނގަޅަށް ކަނޑައެޅިފައި ނެތުމުން ޝަރުޠު ހަމަނުވާ ފަރާތްތަކަށް ފައިސާ ދޫވެފައިވާ ކަމަށް އެ ރިޕޯޓުގައި ފާހަގަކޮށްފައިވެއެވެ.

އޮޑިޓުން ފާހަގަވި އިތުރު މައްސަލައަކީ ޕްރޮގްރާމް ފުރިހަމަނުކޮށް ހުއްޓައިލި 790 ދަރިވަރަކަށް 19,091,797 ރުފިޔާ ޚަރަދުވެފައިވާ އިރު އެ ފައިސާ އަނބުރާ ހޯދުމުގެ އެއްވެސް މަސައްކަތެއް ކުރެވިފައި ނެތުމެވެ. ދަރިވަރުން ކިޔެވުން ފުރިހަމަކުރޭތޯ މޮނިޓާކުރެވޭ ނިޒާމެއް ނެތުމުގެ އިތުރުން ޑިގްރީ ޙާޞިލުކުރި ދަރިވަރުންގެ ޢަދަދު އެނގޭނެ ރެކޯޑެއް ވެސް ބެލެހެއްޓިފައި ނުވާ ކަމަށް ރިޕޯޓުގައިވެއެވެ.

ހަމައެއާ އެކު، ސްކީމުގެ ދަށުން ކިޔަވަމުން ދިޔަ ނަމަވެސް ދަރިވަރުގެ ޖީބުން ކުރަން ޖެހޭ ޚަރަދު ބޮޑުވަމުން ގޮސްފައިވާ ކަމަށް ވެސް އޮޑިޓުން ދައްކައެވެ. ޕްރޮގްރާމް ފީގެ ގޮތުގައި 60,000 ރުފިޔާއަށް ވުރެ އިތުރަށް ދަރިވަރު އަމިއްލައަށް ދައްކަން ޖެހޭ ޕްރޮގްރާމްތަކުގެ ނިސްބަތް 15 އިންސައްތައިން 46 އިންސައްތައަށް އުފުލިފައިވާ ކަމަށް ރިޕޯޓުގައި ބަޔާންކޮށްފައިވެއެވެ.

މި ކަންކަން ޙައްލުކުރުމަށް ތަޢުލީމީ މަރުކަޒުތަކާ ގުޅިގެން ދަރިވަރުންގެ ކިޔެވުން ބެލެހެއްޓޭނެ ހަރުދަނާ މަރުކަޒީ ނިޒާމެއް ޤާއިމުކުރުމަށާއި ކިޔެވުން ފުރިހަމަނުކޮށް ހުއްޓައިލި ފަރާތްތަކަށް ދޫކުރި ފައިސާ އަނބުރާ ހޯދުމަށާއި ދެމެހެއްޓެނިވި ގޮތެއްގައި ސްކީމް ހިންގޭނެ ގޮތަށް އުސޫލުތައް މުރާޖަޢާކުރުމަށް އޮޑިޓާ ޖެނެރަލްގެ އޮފީހުން ވަނީ ލަފާ ދީފައެވެ.

ސަރުކާރުގެ ފުރަތަމަ ޑިގްރީ ސްކީމަކީ ދިވެހި ރައްޔިތުންނަށް ޓިއުޝަން ފީއާ ނުލައި ބެޗެލާސް ޑިގްރީ ފެންވަރަށް ކިޔެވުމުގެ ފުރުޞަތު ހޯދައިދިނުމަށް ހިންގާ ސްކީމެކެވެ.