ވެލިދޫއަށް ސީޕްލޭން ދަތުރުތައް ފެށުމަކީ ރައްޔިތުންނަށް ލިބިގެންދާނެ ލުއި ފަސޭހަކަމެއް: އިޔާސް

ނ.ވެލިދޫއަށް ސީޕްލޭން ދަތުރުތައް ފެށުމަކީ އެރަށުގެ އިތުރުން ފޮއްދޫގެ ރައްޔިތުންނަށްވެސް ލިބިގެންދާނެ ލުއިފަސޭހަކަމެއްކަމަށް އައިލެންޑް އޭވިއޭޝަންގެ މެނޭޖިންގ ޑިރެކްޓަރ އިބްރާޙީމް އިޔާސް ވިދާޅުވެއްޖެއެވެ.

ރައީސް ޑރ.މުހައްމަދު މުއިއްޒު މިދިޔަ އަހަރުގެ ޖުލައިމަހުގެ ތެރޭގައި ވެލިދޫއަށް ކުރެއްވި ޒިޔާރަތުގައި އެރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ވަނީ މިއަހަރުގެ ޖެނުއަރީމަހުގެ ތެރޭގައި އެރަށަށް ސީޕްލޭންގެ ދަތުރުތައް ފެށިގެންދާނޭކަން އިއުލާނުކުރައްވާފައެވެ.

ވެލިދޫއަށް ރަސްމީކޮށް ސީޕްލޭންގެ ދަތުރުތައް ފެށުމަށް މިއަދު އެރަށުގައި ބޭއްވި ރަސްމިއްޔާތުގައި އައިލެންޑް އޭވިއޭޝަނުގެ އެމްޑީ އިޔާސް ވިދާޅުވީ، މިއަދަކީ ވެލިދޫގެ ތާރީހުގައި ލިޔެވިގެންދާނޭ ފަހުރުވެރި ދުވަހެއް ކަމަށާއި، މިއަދަކީ ވެލިދޫއަށް ސީޕްލޭންގެ ޝެޑިއުލް ދަތުރުތައް ރަސްމީކޮށް ފެށިގެންދާ ދުވަސްކަމަށެވެ. ސީޕްލޭންގެ ހިދުމަތް ވެލިދޫ އަދި ފޮއްދޫއަށް ފެށިގެން ދިއުމަކީ އެ ދެ ރަށުގައި ދިރިއުޅެމުންދާ ރައްޔިތުންނަށް ލިބިގެންދާނެ ވަރަށްބޮޑު އުފަލެއްކަން ފާަހގަކުރައްވަމުން އިޔާސް ވިދާޅުވީ، މިކަމުގެ ސަބަބުން އަސާސީ ބޭނުންތަކުގައި ކުރާ ދަތުރުތަކުގެ އިތުރުން ވިޔަފާރީގެ ދަތުރުތަކަށްވެސް ވަރަށްބޮޑު ލުއިފަސޭހަކަމެއް ލިބިގެންދާނޭކަމަށެވެ.

މިއަދު ހުޅުވިގެން މިދިޔައީ ދަތުރުފަތުރުގެ ވަގުތު ކުރުވެ، އަސާސީ ހިދުމަތްތަކަށް ފަސޭހަކަމާއެކު ވާސިލްވެވޭނެ އާ ފުރުސަތެއް. މިއީ ކޮންމެ ވަގުތެއްގައިވެސް އިތުބާރާ ޔަގީންކަމާއެކު ދަތުރުކުރެވޭނެ އަމާންމަގެއްކަމުގައި ވެގެންދާނެކަން ކަށަވަރު

އިބްރާޙީމް އިޔާސް

އަދި މިކަމުގެ ސަބަބުން ޓޫރިޒަމް ވިޔަފާރިއަށްވެސް ފުރުސަތުތައް ހުޅުވިގެންދާނޭކަން އޭނާ ފާހަގަކުރެއްވިއެވެ.

މޯލްޑިވިއަނުން ވެލިދޫއަށް ކުރާ ސީޕްލޭން ދަތުރުތަކުގެ އަގެއްގެ ގޮތުގައި ކަނޑައަޅާފައިވަނީ، ދިވެހިންނަށް ނަމަ 999 ރުފިޔާއެވެ. އަދި ޓޫރިސްޓުންނަށް ނަމަ 93 އެމެރިކާ ޑޮލަރެވެ.

އިޔާސް ވިދާޅުވީ އަގުތައް ކަނޑައަޅާފައިވަނީ ރައްޔިތުންނަށް ލުއިފަސޭހަ އަގުތަކެއްގައި ކަމަށާއި، ދަތުރުތަކުގެ އަގުތައް ހަމަޖައްސާފައިވަނީ ވިޔަފާރީގެ އުސޫލަށްވުރެ ބޮޑަށް ރައްޔިތުންނަށް ލުއިފަސޭހަވާނޭގޮތަށް ބެލުމަށްފަހުކަމަށެވެ.

އައިލެންޑް އޭވިއޭޝަނުން ދެން އެންމެ އަވަހަށް ސީޕްލޭންގެ ދަތުރުތައް ފަށާނީ އއ.ތޮއްޑޫއަށެވެ. އެރަށަށް ސީޕްލޭންގެ ދަތުރުތައް ފެށުމަށް ހަމަޖެހިފައިވަނީ އަންނަ ފެބުރުއަރީމަހުއެވެ.