ވިލާކޮލެޖުން 1237 ދަރިވަރުން ކޯސް ފުރިހަމަކޮށް، ސެޓްފިކެޓް ހާސިލްކޮށްފި

ރާއްޖޭގެ އެންމެބޮޑު އަމިއްލަ ކޮލެޖް، ވިލާ ކޮލެޖުން 1200 އަށްވުރެ ގިނަ ދަރިވަރުން ދަސްވެނިވިއްޖެއެވެ.

ވިލާ ކޮލެޖުން މިއަދު ވަނީ އެ ކޮލެޖުން ކުރިއަށްގެންދިޔަ މާސްޓާސް، ޕޯސްޓް-ގްރެޖުއޭޓް ޑިޕްލޮމާސް، ޕޯސްޓް-ގްރެޖުއޭޓް ސެޓިފިކެޓްސް އަދި ބެޗަލާސް ޑިގްރީ ކޯސްތަކުގެ ދަަަސްްވެނިވުމުގެ ރަސްމިއްޔާތު ކުރިއަށްގެންގޮސްފައެވެ. ދަސްވެނިވުމުގެ ހަފްލާ ކުރިއަށްގެންގޮސްފައިވަނީ ދެ ދަންފަޅިއަކަށް ބަހާލައިގެންނެވެ. މިފަހަރު ވިލާކޮލެޖުން 1237 ދަރިވަރަކު ވަނީ ދަސްވެނިވިފައެވެ.

މިއަދު ބޭއްވި ހަފްލާ ޝަރަފްވެރިކޮށްދެއްވީ، ހައުސިން މިނިސްޓަރު ޑރ.އަލީ ހައިދަރާއި، ވިލާ ކޮލެޖުގެ ބާނީ އަދި ޗެއާމަން ގާސިމް އިބްްރާހިމެވެ.

ދަސްވެނިވުމުގެ ހަފްލާގައި ވާހަކަދައްކަވަމުން ގާސިމް އިބްރާހީމް ވަނީ ދަސްވެނިވުނު ހުރިހާ ދަރިވަރުންނަށް ޝުކުރުއަދާކޮށް މަރުހަބާ ވިދާޅުވެފައެވެ. މި ހަފްލާގައި ވާހަކަދައްކަވަމުން ގާސިމް އިބްރާހީމް ވަނީ އިގްތިސާދީގޮތުން ޤައުމުތަކަށް ގޮންޖެހުންތައް ކުރިމަތިވުމާ ގުޅޭގޮތުން ވާހަކަދައްކަވާފައެވެ. ގާސިމް ވިދާޅުވީ، ޤައުމެއްގެ އިގްތިސާދުގެ އިސް ސަފުން އިލްްމީ އަަދި ފަންނީ މީހުން މަދުވުމަކީ އިގްތިސާދަށްް އޮތް ބޮޑު ގޮންޖެހުމެއް ކަމަށެވެ. މި މޭރުމުން ވާހަކަދައްކަވަމުން ގާސިމް ވަނީ، ދަސްވެނިވުނު ދަރިވަރުންގެ އިލްމީ ގާބިލްކަން އަމަލީ މައިދާނުގައި ދައްކާނޭކަމަށް އުއްމީދު ކުރައްވާކަމަށް ވިދާޅުވެފައެވެ.

މިއަދުގެ ދަސްވެނިވުމުގެ ހަފްލާގައި ވިލާ ކޮލެޖުގެ ވައިސް ރެކްޓާ ޑރ. އަލީ ނަޖީބާއި، ކޮލެޖުގެ ރެކްޓާ ޑރ. އަހުމަދު އަންވަރުގެ އިތުރުން ވައިސް ޗާންސަލާ އޮފް ދަ ޔުނިވާސިޓީ އޮފް ދަ ވެސްޓް އޮފް އިންގްލެންޑް، ޕްރޮފެސަރު، ސާ ސްޓީވެން ވެސްޓް ވަނީ ބައިވެރިންނާ މުހާތަބުކޮށް ވާހަކަދައްކަވާފައެވެ.

މިއަދުގެ ދަސްވެނިވުމުގެ ހަފްލާގައި ވާހަކަދައްކަވަމުން ވިލާ ކޮލެޖުގެ ވައިސް ރެކްޓަރު ޑރ. އަލީ ނަޖީބު ވަނީ، މިފަހަރު ވިލާ ކޮލެޖުން ދަސްވެނިވުނު ގިނަ ދަރިވަރުންނަކީ ކަނބަލުންކަން ފާހަގަކުރައްވާފައެވެ. މިގޮތުން ދަސްވެނިވުނު ދަރިވަރުންގެ %70 އިންސައްތަ އަކީ އަންހެނުންނެވެ. މީގެ އިތުރުން ދަސްވެނިވުނު ދަރިވަރުންގެ ނިސްބަތް މިފަހަރު %10 އިންސައްތަ އިތުރުވެފައިވާއިރު، ދަސްވެނިވުނު ދަރިވަރުންގެ %60 އަކީ ވިލާ ކޮލެޖުގެ އަމިއްލަ ކޯސްތަކުން ކިޔެވި ދަރިވަރުންކަމަށް އަލީ ނަޖީބު ވިދާޅުވިއެވެ.

އޭނާ ވިދާޅުވީ ވިލާ ކޮލެޖުން މަސައްކަތްކުރަނީ ޤައުމުގައި ނެތް ދާއިރާތަކުން މީހުން ބިނާކުރަން ކަމަށާއި، މިކަމުގައި ރާއްޖެއަށް އެންމެ ބޭނުންވާ ދާއިރާތަކަށް އިސްކަންދޭކަމަށެވެ. ކުރިއަށް އޮތް އަހަރުވެސް އައު ޕްރޮގްރާމުތައް ތައާރަފްކުރާނޭކަން ފާހަގަކުރައްވަމުން ޑރ.އަލީ ނަޖީބް ވިދާޅުވީ، ވިލާ ކޮލެޖުގައި ކިޔަވާ ދަރިވަރުން އަހަރުން އަހަރަށް އިތުރުވަމުންދާކަމުން ދައްކައިދެނީ ވިލާ ކޮލެޖާމެދު ދަރިވަރުންގެ މެދުގައި އޮތް އިތުބާރުކަމަށެވެ.

ވިލާ ކޮލެޖަކީ 2007 ވަނަ އަހަރު ވުޖޫދަށް އައި ކޮލެޖެކެވެ. އެންމެ 4 ކްލާސްރޫމާއި، 54 ދަރިވަރުންނާއެކު ކިޔަވައިދޭން ފެށި ވިލާ ކޮލެޖަކީ މިއަދު ރާއްޖޭގައި ހުރި އެންމެ ބޮޑު އަމިއްލަ ކޮލެޖެވެ. ވިލާ ކޮލެޖުން 150 ހަށްވުރެ ގިނަ ޕްރޮގްރާމް ހިންގަމުން އަންނައިރު، މީގެ ތެރޭގައި މެލޭޝިއ އަަދި އިނގިރޭސިވިލާތުގެ ޔުނިވަރސިޓީތަކުގެ ޕްރޮގްރާމްތައް ހިމެނޭކަން ފާހަގަކޮށްލެވެއެވެ.