ގުޅިފަޅުން ގޯތި ލިބުނު މީހުންގެ ރަޖިސްޓްރީ އަންނަމަހު ހަވާލުކުރަން ފަށާނެ: ޑރ. މުއްޠަލިބު

ގުޅިފަޅުން ގޯތި ލިބުނު މީހުންގެ ރަޖިސްޓްރީ އަންނަ މަހު ހަވާލުކުރަން ފަށާނެކަމަށް އިމާރާތް ކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުالله މުއްޠަލިބް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ކުރެއްވި ސުވާލުތަކަށް ޖަވާބު ދެއްވަމުން މުއްޠަލިބް ވިދާޅުވީ، ގުޅީފަޅުން ގޯތި ދޫކުރުން ލަސްވެފައިވަނީ، ތިލަމާލެ ބްރިޖު މަޝްރޫއަށް ގުޅިފަޅު ބޭނުންކުރަމުންދާތީ ކަމަށެވެ. އެގޮތުން، ބްރިޖުގެ މަސައްކަތާއެކު، ހަދަންޖެހޭ ސައިޓްތަކާއި، ސްޓޯރޭޖްތައް ހެދުމުގެ މަސައްކަތްތައް ކުރިއަށްދާ ކަން ފާހަގަކުރެެއްވިއެވެ.

ނަމަވެސް މިހާރު ޕްލޭނަށް ބަދަލުތަކެއް ގެނެސްގެން މަސައްކަތް ކުރާ ކަމަށާ، ގުޅިފަޅުން ގޯތި ލިބުނު ފަރާތްތަކަށް އަންނަ މަހުގެ ތެރޭގައި ރަޖިސްޓްރީ ހަވާލުކުރަން ފަށާނެކަމަށް ވަޒީރު ވިދާޅުވިއެވެ.

ޕްލޭނަށް ބަދަލުތަކެއް ގެނެސްގެން ވީހާ ވެސް ގިނަ ފަރާތްތަކަށް ވީހާ ވެސް އަވަހަށް ހަވާލުކުރުމަށްޓަކައި ކުރަންޖެހޭ މަސައްކަތްތައް މިނިސްޓްރީން ދަނީ ކުރަމުން. އިރާދަކުރެއްވިއްޔާ މެއި މަހުގެ ތެރޭގައި ގުޅީފަޅުން ގޯތި ލިބުނު ފަރާތްތަކަށް ރަޖިސްޓްރީ އެގޯތިތައް ކަނޑައެޅިގެން އެނގޭތޯ ގޮތަށް ގޯތިތައް ހަވާލުކުރާނަން.

ވަޒީރު މުއްޠަލިބު

މިއާއެކު ވަޒީރު ވިދާޅުވީ ގުޅިފަޅުން މިހާރު ހިއްކާފައި އޮތް ބިމަށް ގާތްގަނޑަކަށް 200 މިލިޔަން ޑޮލަރު ޚަރަދުކޮށްފައިވާއިރު، އެތަނުގެ ފެނާއި ނަރުދަމާގެ މަސައްކަތަށް 400 މިލިއަން ޑޮލަރު ހޭދަވާނެ ކަމަށެވެ.

އަދި އެކަމަށް ފައިނޭންސް ހަމަޖެއްސުމުގެ މަސައްކަތް މިހާރު ކުރަމުންދާ ކަމަށާ ފައިނޭންސް ހަމަޖެހުމާއެކު އެ މަޝްރޫއުވެސް ފެށޭނެ ކަމަށް އޭނާ ވިދާޅުވި އެވެ. ވަޒީރު ވިދާޅުވި ގޮތުގައި، ގުޅިފަޅުގައި މީހުން އާބަދުވެ ދިރިއުޅެން ފަށާއިރު މަދުވެގެން 600 މިލިޔަނެއްވުރެ ގިނައިން ޚަރަދުވާނެކަމަށް ބެލެވެއެވެ.

ބިންވެރިޔާ ސްކީމްގެ ދަށުން ދޫކުރުމަށް ކަނޑައަޅާފައިވަނީ ހުޅުމާލެއިން 1407 ގޯތި، ގުޅީފަޅުން 2438 ގޯތި، ގިރާވަރުފަޅުން 5186 ގޯއްޗެވެ. އެއީ ޖުމްލަ 9031 ގޯއްޗެވެ.

އެތަނުން މިހާތަނަށް ހަވާލުކުރެވިފައިވަނީ 624 ގޯއްޗެވެ. އެއީ ކުރީ ސަރުކާރުގައި ހަވާލުކުރި 465 ގޯއްޗާއި، މިސަރުކާރުގައި 159 ގޯއްޗެވެ.