ގަޕޯގެ ފާޑުކިޔުން މިފަހަރު އަމާޒުވީ އޭސީސީ އާއި އޮޑިޓް އޮޮފީހަށް!
ސަރުކާރުގެ ކުންފުނިތަކުގެ ކޮރަޕްޝަން އިންތިހާއަށް ހުރިއިރު، އެކަންކަން ހުއްޓުވުމުގައި އެންޓި ކޮރަޕްޝަން ކޮމިޝަނާއި، އޮޑިޓަރ ޖެނެރަލްގެ އޮފީހުގެ ޒިއްމާތަށް އަދާކުރަމުން ނުދާތީވެ މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގައި ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ އެ ދެ މުއައްސަސާއަށް ވަރަށްބޮޑަށް ފާޑު ވިދާޅުވެއްޖެއެވެ.
މާލިއްޔަތު ކޮމިޓީގައި ވާހަކަދައްކަވަމުން ގަޕޯ ވިދާޅުވީ ކޮރަޕްޝަނާއި ހިޔާނާތުގެ މައްސަލަތައް މިއަދު ޤައުމުގައި ވަރަށްބޮޑަށް އިތުރުވެފައިވާކަމަށާއި، އެގޮތުން ކޮރަޕްޝަން ހިންގުމަކީ ޖެހިލުންނުވާ އަދި ލަދު ނުގަންނަ ކަމަކަށް ވެފައިވާކަށް ގަޕޯ ވިދާޅުވިއެވެ. އޭނާ ވިދާޅުވީ މިދިޔަ 15 އަހަރުދުވަހުގެ ތެރޭގައި ކޮރަޕްޝަނުގެ އަމަލެއް މީހެއްގެ މައްޗަށް ސާބިތުވެ ހުކުމް ތަންފީޒު ކުރެވިފައިނުވާކަމަށާއި، މިގޮތުން އެފަދަ މައްސަލައެއްގައި ކޯޓަށް ދިޔަނަމަވެސް ސާބިތުނުވުމަކީ މިއަދު އާއްމުކަމެއް ކަމަށެވެ.
" އެންމެނަށްވެސް އެބަ އިނގޭ ހުރިހާ ސަރުކާރުތަކަކުންވެސް މިތަނުގައި ކޮރަޕްޝަން އެބަ ހިންގާކަން. އެކަމު ކޯޓާ ހިސާބުން ހުކުމެއް އަންނާނެ ގޮތެއް އަދި ނެތް. އަޅުގަނޑުމެން މިހާރު މިތިބީ ކޮރަޕްޝަނަށް ބައްޓަންކޮށްފައި އޮތް ނިޒާމެއްގެ ތެރޭގައި. އެހެންނޫންނަމަ އޮޑިތަރ ޖެނެރަލްގެ އޮޑިޓް ރިޕޯޓާއި އޭސީސީގެ ރިޕޯޓްތަކުން ކޯޓަށްދާ މައްސަލަތައް ސާބިތުކުރެވެން ޖެހޭނެ. އެކަމެއް ނުވޭ" ގަޕޯ ވިދާޅުވިއެވެ.
މުއައްސަސާތަކަށް ދައުލަތުގެ ބަޖެޓުން ކޮންމެ އަހަރަކުވެސަް އެތައް މިލިއަން ރުފިޔާއެއް ހަރަދުކުރެވިގެންދާއިރު، ކޮރަޕްޝަނުގެ މައްސަލަތައް ބަލައި ފިޔަވަޅު އަޅައި ކަންކަން ތަންފީޒުނުކުރެވޭކަން ގަޕޯ ފާހަގަކުރެއްވިއެވެ. ކޮރަޕްޝަނުގެ ކަންކަން މިހާރު ހުރިވަރުން ދައުލަތުގެ ބަޖެޓްގެ 30 އިންސައްތަ ފައިސާ ހޭދަވަނީ ކޮރަޕްޝަނުގެ ގޮތުގައި ކަމަށްވެސް ގަޕޯ ވިދާޅުވިއެވެ.
ގަޕޯ ވިދާޅުވީ ޤައުމުގައި ހުރި މި މައްސަލަތައް ހައްލުކުރުމަށް އެންމެން ގުޅިގެން މަސައްކަތްކުރަން ޖެހޭކަމަށާއި، ޤާނޫނުތަކަށް ބަދަލު ގެނެސްގެން ނަމަވެސް މިކަންކަން ހައްލުކުރަން ޖެހޭ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
