މުލީ ކަރަންޓު މައްސަލަ: އާ ޖަނަރޭޓަރެއް އިންސްޓޯލްކޮށް ކަރަންޓު ދިނުމަށް މަސައްކަތްކުރަނީ

މ.މުލީގައި ދިމާވެފައިވާ ކަރަންޓުގެ މައްސަލަ ހައްލުކުރުމަށްޓަކައި، އެރަށަށް އާ ޖެނެރޭޓަރެއް ގެންގޮސް، އެ ޖެނެރޭޓަރު އިންސްޓޯލްކުރުމުގެ މަސައްކަތް ކުރަމުންއަންނަކަމަށް ފެނަކަ އިން ބުނެފިއެވެ.

މުލީގެ ކަރަންޓަށް މައްސަލަ ދިމާވިތާ 24 ގަޑިއިރުވެފައިވާއިރު، މިކަމާއިގުޅޭގޮތުން ފެނަކައިން އެކްސްގައި ކުރި ޕޯސްޓެއްގައި ބުނީ، މުލީގައި ކަރަންޓު ދިނުމަށް ބެހެއްޓިފައި ހުރި 2 ޖަނަރޭޓަރަށް ދިމާވި މައްސަލައަކާއި ގުޅިގެން މުޅި ރަށުން ކަރަންޓުގެ ހިދުމަތް ކެނޑިފައިވާކަމަށެވެ.

މި މައްސަލަ ހައްލުކުރުމުގެ މަސައްކަތް ފެނަކައިން ވަގުތުން ފަށާފައިވާ ކަމަށާއި، މިވަގުތު އެރަށަށް 600 ކވ ގެ އައު ޖަނަރޭޓަރެއް ގެންގޮސް، އެ ޖަނަރޭޓަރު އިންސްޓޯލްކޮށްގެން ކަރަންޓު ދިނުމަށް މަސައްކަތް ކުރެވެމުންދާކަމަށް ވެސް ފެނަކައިން ބުނެއެވެ.

މި ހާލަތުގައި ރައްޔިތުންނަށް ދިމާވާނެ ދަތިތަކަށް ފެނަކައިން ވަނީ މަޢާފަށް އެދިފައެވެ.

މިކަމާއި ގުޅޭ ގޮތުން "ވޮއިސް" އަށް މައުލޫމާތު ދެއްވަމުން، މުލީ ކައުންސިލްގެ ރައީސް ޝައްމޫން ރަމީޒް ވިދާޅުވީ، ކަރަންޓު ދިޔައީ އިއްޔެ ހެނދުނު 8:15 ހާއިރު ކަމަށާއި، އަތޮޅު ހޮސްޕިޓަލް ފިޔަވާ ހުރިހާ ތާކުން ކަރަންޓު ކެނޑިފައިވާއިރު، އޭގެ ފަހުން ބައި ގަޑިއިރުން އެކި ހިސާބުތަކަށް ދޫކުރާކަމަށެވެ.

އެ ރަށުގައި ކަރަންޓުގެ ޚިދުމަތް ދެމުން އައީ 500 ކިލޯވޯޓާއި، 450 ކިލޯވޯޓް އަދި 600 ކިލޯވޯޓްގެ ޖަނަރޭޓަރތަކެއް ބޭނުންކޮށްގެން ހިދުމަތް ދެމުންއައިރު، ޝައްމޫން ވިދާޅުވީ، މައްސަލަ ދިމާވީ ލޯޑު ބޮޑުވެގެން ކަމަށެވެ.

އެކަމާއި ގުޅިގެން، އޮފީސްތަކުން ހިދުމަތް ނުދެވޭކަމަށާއި، ސްކޫލްވެސް ބަންދުކޮށްފައިވާ ކަމަށާއި، ފިހާރަތަކަށް ވެސް ގެއްލުން ލިބޭނެކަމަށް ލަފާކުރައްވާކަމަށް ޝައްމޫން ފާހަގަކުރެއްވިއެވެ.

" ފިހާރަތަކުގެ ފިނި އެއްޗިއްސަށް، ފިނި އެއްޗިއްސަށް ގެއްލުންވާނެ ކަމަށް މި ބަލަނީ. އަދި މީހަކު ސީދާ ރިޕޯޓް ނުކުރިޔަސް ގިނައިރުވަންޏާ ގެއްލުންވާނެ. އިއްޔެ ހެނދުނުއްސުރެ ކަރަންޓެއް ނާދޭ. ބައި ގަޑި އިރުން ބައި ގަޑިއިރުން ދޫކޮށްލިޔަސް ރެފްރިޖަރޭޓަރުތަކަށް ކަރަންޓެއް ނާންނާނެއެއްނު."

ޝައްމޫން ވިދާޅުވިއެވެ.

މައްސަލަ ހައްލުކުރެވޭނެ ވަގުތެއް ސާފުކުރުމަށް އެ ރަށުގެ ފެނަކަ އިންޖީނުގޭގެ މެނޭޖަރަށް ގުޅުމުން ޖަވާބު ނުދެއްވާތީ އެކަން ސާފުވާގޮތް ވަނީ ނުވެފައެވެ.