ދަނގެތީ ކައުންސިލުން ބެންކޮކަށް ކުރި ދަތުރުގެ ނިޔަތް އޮޑިޓަރ ޖެނެރަލަށް ގޯސްވެއްޖެ

އދ.ދަނގެތީ ކައުންސިލުން 2023 ވަނަ އަހަރު ބެންކޮކަށް ކުރި ދަތުރު ދައުލަތުގެ އޮޑިޓަރ ޖެނެރަލަށް ގޯސްވެއްޖެއެވެ.

އޮޑިޓަރ ޖެނެރަލް ނެރުއްވި ދަނގެތީ ކައުންސިލްގެ 2024 ވަނަ އަހަރުގެ ކޮމްޕްލަޔަންސް ރިޕޯޓްގައި ބުނެފައިވަނީ އެރަށު ކައުންސިލުން 2023 ވަނަ އަހަރު ތައިލެންޑަށް ތަޖުރިބާ ހޯދުމުގެ ދަތުރެއް ކޮށްފައިވާކަމަށެވެ. ތައިލެންޑަށް ކުރި ތަޖުރިބާ ދަތުރަށް ދައުލަތުގެ ބަޖެޓުން 90،668 ރުފިޔާ ހޭދަކޮށްފައިވާކަމަށް އޮޑިޓަރ ޖެނެރަލް ވަނީ ފާހަގަކުރައްވާފައެވެ.

އޮޑިޓަރ ޖެނެރަލް ވިދާޅުވީ ދަނގެތީ ކައުންސިލުން ކުރި މި ހޭދައަކީ ދައުލަތުގެ ހަރަދުތައް ކޮންޓްރޯލްކޮށް އެފިޝަންސީ އިތުރުކުރުމަށް ފިނޭންސް މިނިސްޓްރީން ދައުލަތުގެ އެންމެހާ އިދާރާތަކަށް މާލިއްޔަތާ ބެހޭ ސާކިއުލާއިން އަންގާފައިވާ އެންގުމާ އެއްގޮތަށް ކޮށްފައިވާ ހަރަދެއްކަމުގައި ބެލެވެން ނެތްކަމަށެވެ.

އެއަހަރުގެ އޮކްޓޯބަރުމަހުގެ 12 އިން 20 ވަނަ ދުވަހުގެ ނިޔަލަށް ތއިލެންޑަށް ކުރި ދަތުރުގައި ބައިވެރިވެފައިވަނީ 2 ކއުންސލް މެމްބަރުންނާއި  ސެކެރެޓަރީ ޖެނެރަލް އާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ 5 މެމްބަރުންގެ އިތުރުން އިދާރީ 4 މެމްބަރުންނާއި އަދި ކައުންސިލް އިދާރާއިން އައުޓްސޯސްކުރި ބައެއް މީހުން ހިމެނޭހެން ޖުމްލަ 13 ބޭފުޅުންނެވެ. އޮޑިތަރ ޖެނެރަލް ވިދާޅުވެފައިވަނީ 9 ދުވަހުގެ މި ދަތުރު ކޮށްފައިވަނީ ދަތުރަށް ހިނގާނޭ ހަރަދުގެ ފައިސާ ލިބޭނޭ އެހެން ގޮތްތަކެއް ނުހޯދައިކަމަށެވެ.

މި ދަތުރުގެ ފްލައިޓް ޓިކެޓް އަމިއްލަ ހަރަދުގައި ނެގިއިރު، ކެއިންބުއިމުގެ ހަރަދުތައް ހަމަޖައްސާފައިވަނީ ކައުންސިލް ބަޖެޓުންކަން ރިޕޯޓްގައި ވަނީ ފާހަގަކޮށްފައެވެ.

އޮޑިޓް ރިޕޯޓަށް ކައުންސިލުން މައުލޫމާތު ދީފައިވަނީ އެ ދަތުރުކޮށްފައިވަނީ އދ ދަނގެތީގައި މިހާރު ފައްތަމުންގެންދާ ސަގާފީ މަރުކަޒު ޕްރޮޖެކްޓާއި، އަދި ޔޮޓްމެރީނާ ޕްރޮޖެކްޓްގެ ބީއޯޓީ އުސޫލުން ޕްރޮމޯޓްކުރުމަށް ޝައުގުވެރިވާނޭ ފަރާތެއް ހޯދުމާއި ކައުންސިލްތައް އަމިއްލަ ފައިމައްޗަށް ތެދުވެ، ރަށުގެ ތަރައްޤީއާ ފުދުންތެރި އިގްތިސާދެއް ގާއިމްކުރުމަށް ދުނިޔޭގެ ތަހްޒީބްވެފައިވާ ގައުމުތައް ނަމޫނާއަކަށް ބަލައިގަނެ އެމަގުން ކަންކަން ކުރުމަށެވެ.

އޮޑިތަރ ޖެނެރަލްވަނީ އެކަންކަން އެގޮތަށް ކުރުމަށް އެފަދަ ކަންކަމާ ގުޅޭ ދައުލަތުގެ އިދާރާތަކާއި ދައުލަތުގެ ކުންފުނިތައް ހުރިއިރު އެފަރާތްތަކާ ގުޅިގެން ދަތުރުތައް ކުރިއަށްގެންދިއުމުން ޤައުމީ ލަނޑުދަނޑިތަކާ އެއްގޮތްވާ ގޮތުގެ މަތިން ކަންކަން ކުރިއަށްގެންދިއުމަށް މަގުފަހިވެގެންދާނޭކަމަށެވެ. ނަމަވެސް ކައުންސިލް އިދާރާއިން ތައިލެންޑަށް ދިއުމުގެ ކުރިން މިފަދަ ކަންކަމާ ގުޅޭ ދައުލަތުގެ  އިދާރާތަކާއި ދައުލަތުގެ ކުންފުނިތަކާ މަޝްވަރާކޮށްފައިވާކަން ލިޔުމުން އެނގެން ނެތްކަން ފާހަގަކުރެވޭކަމަށް އޮޑިޓަރ ޖެނެރަލް ވަނީ ވިދާޅުވެފައެވެ.