އިޒްރޭލާއި ދެކޮޅުވުމުން ސީއެންއެންގެ ކޮމެންޓޭޓަރަކު ވަކިކޮށްފި

ފަލަސްތީނުގެ ރައްޔިތުންނަށް ފުރިހަމަ މިނިވަންކަން ލިބެން ޖެހޭނެކަމަށްބުނެ ވާހަކަދެއްކުމުން، ސީއެންއެންގެ ސިޔާސީ ކޮމެންޓޭޓަރަކު މަގާމުން ވަކިކޮށްފިއެވެ.

މާކް ލެމޮންޓް ހިލް ނަމަކަށް ކިޔާ މިމީހާ ވަކިކޮށްފައިވަނީ ފަލަސްތީނާއި އެކު އެއްބައިވަންތަކަން ދެއްކުމުގެ ބައިނަލްެއަގްވާމީ މުނާސަބަތުގައި އދ.ގައި ފަލަސްތީނުގެ ރައްޔިތުންގެ ހައްގުގައި އަސަރުގަދަ ތަގުރީރެއް ދީފައިވަނިކޮށެވެ.

މި ތަގްރީރުގައި މާކް ވަނީ ބަހުގެ ޒަރިއްޔާއިން ފަލަސްތީނުގެ ރައްޔިތުންނާއި އެއްބައިވަންތަކަން ދެއްކުމުގެ ބަދަލުގައި ސިޔާސީ ހަރަކާތްތަކުން އެއްބައިވަންތަކަން ދެއްކުމުގެ ފުރުސަތު މިއަދު އެބައޮތްކަމަށެވެ. އަދި މިކަމުގެ ސަބަބުން ފަލަސްތީނުގެ ރައްޔިތުންނަށް ލިބެން ޖެހޭ އިންސާފުކަމުގައިވާ ކޯރުން ފައްޓައިގެން ކަނޑާއި ހަމައަށް މިނިވަން ފަލަސްތީނެއް ލިބިގެންދާނެކަމަށް އޭނާ ވަނީ ފާހަގަކޮށްފައެވެ.

ނަމަވެސް މިހެން މާކް ބުނިތާ މާ ގިނަ ދުވަހެއް ނުވެ އޭނާ ހުރި މަގާމުން އޭނާ ވަކިކޮށްފައިވާކަމަށް ސީއެންއެންއިން ވަނީ ބުނެފައެވެ. މިކަން ކޮށްފައިވާ ދަނޑިވަޅަކީ، އޭނާ އެމަގާމުން ވަކިކުރުމަށާއި، އޭނާގެ ވާހަކަތަކަކީ އިޒްރޭލަށް ހުރި ނުރައްކާތެރި ވާހަކަތަކެއްކަމަށް ބުނެ ބަޔަކު ގޮވާލާފައިވާ ދަނޑިވަޅެއްކަން ފާހަގަކޮށްލެވެއެވެ.

ކޮލެޖް ޕްރޮފެސަރެއްގެ މަގާމުވެސް އަދާކުރާ މާކް މަގާމުން ވަކިކުރުމަކީ ސީއެންއެން ފަދަ އެމެރިކާގެ މިނިވަންކަމަށް މީޑިޔާއެއްގެ މިނިވަންކަމާއިމެދު ސުވާލު އުފެދޭ ކަމެއް ކަމަށް ގިނަ ފަރާތްތަކުން ދަނީ ބުނަމުންނެވެ.