އިސްރާފާއި، ބޭކާރު ހަރަދުތައް ކުޑަކޮށް ދައުލަތުގެ ހަރަދުތައް ހިފެހެއްޓިއްޖެ: ޒަމީރު

ދައުލަތުގެ މާލިއްޔަތު ތަރުތީބުކުރުމަށް އަދުގެ ސަރުކާރުން މިހާތަނަށް ކުރި މަސައްކަތްތަކުގެ ނަތީޖާ މިއަދު ފެންނަން ފަށާފައިވާކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.

ބިޒްނަސް ސެންޓަރ ކޯޕަރޭޝަނުގެ އެސްއެމްއީ އެވަރޑް ހަފްލާގައި ދައުލަތުގެ މާލިއްޔަތާ ގުޅޭގޮތުން ވާހަކަދައްކަވަމުން މާލީ ވަޒީރު ވިދާޅުވީ ފާއިތުވެދިޔަ ދެ އަހަރުދުވަހުގެ ތެރޭގައި ދައުލަތުގެ މާލިއްޔާ ރަނގަޅުކުރުމަށް ކުރެވުނު މަސައްކަތްތަކުން 2024 ވަނަ އަހަރު ޤައުމީ އުފެއްދުންތެރިކަމުގެ ނިސްބަތުން 9.9 އިންސައްތައިގައި ހުރި ދަރަނި މިއަހަރުގެ ނިޔަލަށް 5.5 އިންސައްތައަށް ދަށްވާނޭކަމަށް ލަފާކޮށް ކުރެވނު މަސައްކަތްތައް އެދެވޭ ގޮތެއްގައި ހާސިލްވަމުންދާކަމަށެވެ.

ސަޕްލިމެންޓްރީ ބަޖެޓެއް ހުށަނާޅައި ދައުލަތުގެ ބަޖެޓް އުސޫލްގެ ތެރެއިން މެނޭޖްކުރެވިގެންދާކަން ފާހަގަކުރައްވައި މިނިސްޓަރު ވިދާޅުވީ މިއަހަރު ޖެހިގެހިގެން 40 ހަފްތާވަންދެން ބަޖެޓް ސާޕްލަސްއެއްގައި ނުވަތަ އަރަނީގައި ހިފެހެއްޓިފައިވާކަމަށެވެ. ވަޒީރު ވިދާޅުވީ މިކަންކަން ހާސިލްކޮށްފައިވަނީ މީގެކުރިން ކޭޝްފްލޯ މެނޭޖްކުރުން ހަރުދަނާކުރެވި ބަޖެޓުން ކުރެވެމުން އައި އިސްރާފްތަކާއި، ބޭކާރުގޮތުގައި ކުރެވެމުން އައި ދަތުރުފަތުރުގެ ހަރަދުތަކާއި މަރާމާތުތަކަށް ކުރަމުންއައި ހޭދަތައް ކުޑަކޮށްގެންކަމަށެވެ.

މި މާލީ ނަތީޖާތައް ހާސިލްކުރެވުނީ ސަރުކާރުން ގެންނަމުންދާ މުހިންމު އިސްލާހްތަކާއި، އޭގެ ހެޔޮ ނަތީޖާތަކުގެ ސަބަބުން

ފިނޭންސް މިނިސްޓަރު މޫސާ ޒަމީރު

ބަޖެޓްގެ ކަންކަން އެ ބީދައިން މެނޭޖްކުރަމުންއައިނަމަވެސް ބަޖެޓުން އަދާކުރަންޖެހޭ މުހިންމު ވާޖިބުތައް އަދާކުރަމުން އައިސްފައިވާކަން ވަޒީރު ފާހަގަކުރެއްވިއެވެ.

އެގޮތުން މިއަހަރު ދަރަނީގެ ގޮތުގައި ދައްކަންޖެހުނު 100 މިލިއަން ޑޮލަރު ދެއްކުމާއިއެކުވެސް ސަވަރިން ފަންޑްގައި ހުރި އަދަދުތައް އިތުރުކުރެވިފައިވާކަމަށް މިނިސްޓަރު ވިދާޅުވިއެވެ. ވަޒީރު ވިދާޅުވީ މިއަހަރު ނިމޭއިރު ސަވަރިން ފަންޑް 100 މިލިއަން ޑޮލަރަށް އިތުރުވެފައިވާކަަށެވެ. މިއީ މުސްތަގްބަލުގައި ދިމާވެދާނެ ކާރިސާތަކުން ރައްކާތެރިވުމަށްޓަކައި އެޅިގެންދިޔަ މުހިންމު ފިޔަވަޅެއްކަން މާލީ ވަޒީރުގެ ވާހަކާގައި ފާހަގަކުރެއްވިއެވެ.