އަހަރުގެ މިހާތަނަށް ދަރަނި އަނބުރާ ދެއްކުމަށް ރެކޯޑް އަދަދެއް ހޭދަކޮށްފި
އެކި ފަރާތްތަކުން ނަގާފައިވާ ދަރަނިތައް އަނބުރާ ދެކުމަށް އަހަރުގެ މިހާތަނަށް ރެކޯޑް އަދަދަކަށް ހޭދަކޮށްފައިވާކަމަށް މާލީ ވުޒާރާގެ ތަފާސްހިސާބުތަކުން ދައްކައިފިއެވެ.
ފިނޭންސް މިނިސްޓްރީން މިއަދު ނެރެފައިވާ ވީކްލީ ފިސްކަލް ޑިވެލޮޕްމަންޓް ރިޕޯޓުން ދައްކާގޮތުގައި މިހިނގާ ސެޕްޓެމްބަރުމަހުގެ 18 ވަނަ ދުވަހުގެ ނިޔަލަށް ދަރަނި އަނބުރާ ދެއްކުމަށް ވަނީ 4.3 ބިލިއަން ރުފިޔާ ހޭދަކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 124.4 އިންސައްތަ އިތުރުވުމެކެވެ. މިދިޔަ އަހަރުގެ މި މުއްދަތުގެ ތެރޭގައި ދަރަނި ދެއްކުމަށް ކުރި ހޭދަ އުޅެނީ 1.9 ބިލިއަން ރުފިޔާގައެވެ.
ފިނޭންސް މިނިސްޓްރީން ބުނީ މިއަހަރުގެ މިހާތަނަށް ދަރަނި ދެއްކުމަށް ކުރި ހޭދަ އިތުރުވުމުގެ މައިގަނޑު ސަބަބަކީ ދައުލަތުން މީގެ ކުރިން ނަގާފައިވާ ލޯނުތަކަށް މިމުއްދަތުގެ ތެރޭގައި އިންޓަރެސްޓްގެ ގޮތުގައި ކުރި ހޭދަ އިތުރުވުމެވެ. އަހަރުގެ މިހާތަނަށް ދަރަނި ދެއްކުމަށް ކުރި ހޭދަ އިތުރުވެގެން ދިޔައިރު، ސިނޭންސް މިނިސްޓްރީން ވަނީ މިދިޔަ ހަފްތާގައި އަނބުރާ ދައްކަން ޖެހުނު ލޯނެއްގެ މުއްދަތު އިތުރުކުރިކަން ހާމަކޮށްފައެވެ. މިމަހުގެ 18 ވަނަ ދުވަހަށް ހަމަވި އެ ލޯނަކީ ސްޓޭޓް ބޭންކް އޮފް އިންޑިއާ (އެސްބީއައި) އިން ސަބްސްކްރައިބްކޮށްފައިވާ 50 މިލިއަން ޑޮލަރުގެ ޓްރެޜަރީ ބިލެކެވެ. މި ލޯނު އަނބުރާ ދައްކަންޖެހޭ މުއްދަތު އިންޑިއާއިން އިތުރުކޮށްދީފައިވަނީ އިންޑިއާ ސަރުކާރުގެ ކަމާބެހޭ ފަރާތްތަކާއެކު ކުރި މަޝްވަރާތަކަށްފަހުއެވެ.
ކުރިއަށްއޮތް އަހަރު ވެގެންދާނީ ރާއްޖޭގެ ތާރީހުގައިވެސް އެންމެ ބޮޑު އަދަދަކުން ދަރަނިތައް ދައްކަންޖެހޭނެ އަހަރަށްކަމަށް މާލީ ވުޒާރާއިން ވަނީ ބުނެފައެވެ. އެގޮތުން ބޭރުގެ އެކި ފަރާތްތަކުން ނަގާފައިވާ ލޯނުތަކުގެ އިންޓަރެސްޓާއެކު 1 ބިލިއަނަށްވުރެ ގިނަ ޑޮލަރު ދައްކަންޖެހޭަނޭކަމަށް މާލީ ވުޒާރާއިން ފާހަގަކުރެއެވެ. އެއީ ދިވެހި ރުފިޔާއިން ބަލާނަމަ 15 ބިލިއަނަށްވުރެ ގިނަ ރުފިޔާއެވެ.
އަންނަ އަހަރު ދައްކަންޖެހޭ 1 ބިލިއަން ޑޮލަރުގެ ތެރޭގައި ހިމެނެނީ 2021 ވަނަ އަހަރު ވިއްކާފައިވާ ސަވަރިން ސުކޫކަށް ދައްކަންޖެހޭ 500 މިލިއަން ޑޮލަރެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
