ރާއްޖޭގެ އަސްކަރީ ނިޒާމާއި އިގްތިސާދު ހަރުދަނާކުރުމާއި ގުޅޭގޮތުން އެމެރިކާ އާއިއެކު މަޝްވަރާކޮށްފި

ދިވެހި ރާއްޖޭގެ އަސްކަރީ ނިޒާމާއި އިގްތިސާދު ހަރުދަނާކުރުމާއި ގުޅޭގޮތުން އެމެރިކާ އާއިއެކު މަޝްވަރާކޮށްފިއެވެ.

މި މަޝްވަރާތައް ކުރައްވާފައި ވަނީ ޚާރިޖީ ވަޒީރު މޫސާ ޒަމީރު އެމެރިކާ އަށް ކުރައްވަވަމުންގެންދަވާ ރަސްމީ ދަތުރުފުޅުގައި އެމެރިކާގެ ވެރިރަށް ވޮޝިންގްޓަން ޑީސީ އަށް ވަޑައިގެން، އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކެން އާއި އެކު ބޭއްވެވި ބައްދަލުވުމުގައެވެ.

މި ބައްދަލުވުމުގައި، ދެގައުމުގެ ދެމެދުގައިވާ ގުޅުންތައް އިތުރަށް ބަދަހިކުރުމާއި، ރާއްޖޭގެ އަސްކަރީ ނިޒާމާއި އިގްތިސާދު ހަރުދަނާ ކުރުމާއި ގުޅޭ ގޮތުން ދެ ބޭފުޅުން ވެސް މަޝްވަރާ ކުރެއްވިއެވެ.

ހަމައެއާއިއެކު، ޑިމޮކްރަސީ ހަރުދަނާ ކުރުމާއި  މޫސުމަށް އަންނަ ބަދަލުތަކާއި ގުޅޭގޮތުން ކުރަމުންދާ މަސައްކަތްތަކާއި ގުޅޭ ގޮތުން ވެސް ޚާރިޖީ ވަޒީރު ވަނީ އެންޓަނީ ބްލިންކެން އާއި އެކު މަޝްވަރާ ކުރައްވާފައެވެ.

މީގެ އިތުރުންވެސް، ދެގައުމުގެ ދެމެދުގައި ގުޅުން ބަދަހި ކުރެވޭނެ އިތުރު ދާއިރާތަކާއި ގުޅޭގޮތުން ވެސް މި ބައްދަލުވުމުގައި މަޝްވަރާ ކުރެއްވިއިރު، އެންޓަނީ ބްލިންކެން ވަނީ ނިމިދިޔަ ރިޔާސީ އިންތިހާބުގެ އިތުރުން މަޖިލިސް އިންތިހާބުގައި ސަރުކާރުން ހޯއްދެވި ކާމިޔާބީއަށް މަރުހަބާ ވިދާޅުވެ، މޫސުމީ ބަދަލުތަކުން އަރައިގަތުމަށާއި، ތިމާވެށި ހިމާޔަތްކުރުމަށް ރާއްޖެއިން ކުރަމުންދާ މަސައްކަތްތަކުގައި ހޯދާފައިވާ ކާމިޔާބީތައް ފާހަގަކުރައްވާފައެވެ.

މި ބައްދަލުވުމުގެ ތެރެއިން ޚާރިޖީ ވަޒީރު ޒަމީރު ވަނީ އެމެރިކާ ސަރުކާރުން ރާއްޖެއަށް ދެމުންގެންދަވާ ތައުލީމީ ފުރުސަތުތައް ފާހަގަކުރައްވާ، އެމެރިކާއަށް ކިޔަވަންދާ ދަރިވަރުންނަށް ފަސޭހައިން ވިސާ ލިބޭނެ އިންތިޒާމެއް އެމެރިކާ ސަރުކާރުން ހަމަޖައްސައިދިނުމަކީ ސަގާފީ ގޮތުންނާއި ފަތުރުވެރިކަމާއި ވިޔަފާރީގެ ދާއިރާއިން ދެގައުމުގެ ދޭތެރޭގައިވާ ގުޅުން އިތުރަށް ބަދަހިވެގެންދާނެ ކަމަށް ވިދާޅުވެފައެވެ.

މި ބައްދަލުކުރެއްވުމުގައި ވަޒީރު ޒަމީރާއި އެކު އެމެރިކާގެ ސެކެޓަރީ އޮފް ސްޓޭޓްއާއެކު ބޭއްވި މި ބައްދަލުކުރެއްވުމުގައި ދިވެހިރާއްޖެއިން އެމެރިކާއަށް ކަނޑައަޅާފައި ހުންނަވާ ސަފީރު ޢަބްދުލް ޣަފޫރު މުޙައްމަދާއި، ސެކެޓްރީ އޮފް ބައިލެޓަރަލް ރިލޭޝަންސް ޑރ. ޙާލާ ހަމީދު ވެސް ބައިވެރިވެވަޑައިގެންނެވިއެވެ.

ވަޒީރު ޒަމީރު މިހާރު އެމެރިކާ އަށް ކުރައްވަމުންގެންދަވާ 3 ދުވަހުގެ ދަތުރުފުޅުގައި  އެމެރިކާ ސަރުކާރުގެ އިސް ވެރިންނާއި އދ. ގެ އިސް ވެރިންގެ އިތުރުން އެމެރިކާގެ ވޮޝިންގްޓަން ޑީސީއާއި، ނިއު ޔޯކުގެ އިތުރުން ނިއު ޖާޒީގައި ދިރިއުޅޭ ދިވެހި ރައްޔިތުންނާ ބައްދަލުކުރެއްވުމަށް ވަނީ ހަމަޖެހިފައެވެ.