މައްސަރު ޓެކްސްގެ ބިލް ތަސްދީގުކޮށްފި

މައްސަރުގެ ދުވަސްވަރު އަންހެންވެރިން ބޭނުންކުރާ ޕެޑް އަދި ޓެމްޕަން ފަދަ ތަކެތިން ނެގޭ ޖީއެސްޓީ އުވާލުމުގެ ބިލް، ރައީސުލްޖުމްހޫރިއްޔާ ތަސްދީގުކުރައްވައިފިއެވެ.

މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނުގައި ކުރިން ޕެޑްއަކީ ޒަރޫރީ އެއްޗެއްކަމަށް ހިމަނާފައިނުވުމުން، އޭގެން ޓެކްސް ނެގެމުންދިޔައީ ހަ ޕަސެންޓުގެ ރޭޓުންނެވެ.

މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް މި އިސްލާހު ހުށައަޅާފައިވަނީ ސަރުކާރުގެ ފަރާތުންނެވެ. ބިލް ފާސްކޮށްފައިވަނީ މަޖިލީހުގެ ޖަލްސާއެއްގައި 73 މެމްބަރުގެ ވޯޓުންނެވެ.

މައްސަރު ޓެކްސް އުވާލުމަކީ ރައީސް އިބްރާހިމް މުހައްމަދު ސޯލިހުގެ ފުރަތަމަ ސަތޭކަ ދުވަހުގެ އެޖެންޑާގައި ކުރުމަށް ރާވާފައިވާކަމެއްކަން ފާހަގަކޮށްލެވެއެވެ.

މިކަމަށްޓަކައި ގިނަ ބަޔަކު ސޯޝަލް މީޑިޔާގައި މީގެ ކުރިން ވަނީ އަޑު އުފުލައި، މައްސަރުޓެކްސް ނަމުގައި ބޮޑު ކެމްޕެއިންއެއް ހިންގާފައެވެ. މައްސަރު ޓެކްސް އުވާާލުމާއި ގުޅިގެން ސޯޝަލް މީޑިޔާގައި ގިނަބަޔަކު ދަނީ އުފާފާޅުކުރަމުންނެވެ.