ރޭންކު ބަދަލު ނުވެގެން ސިފައިންގެ ހިދުމަތުން ވަކިވާން ޖެހޭ ގޮތަށް އޮތްއޮތުން ބަދަލުކުރަނީ

އެއް ރޭންކުގައި ވަކި މުއްދަތެއް ވިއަސް، މިހާރު އޮތް ޤަވާއިދުގެ ތެރެއިން ލިމިޓޭޝަން ހަމަވާ ގޮތަށް އޮތް އޮތުން ބަދަލުކުރައްވައި، ސިފައިންގެ ޚިދުމަތުގައި ދެމި ހުރެވޭނެ ގޮތަށް ބަދަލުކޮށްދެއްވާނެ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ، ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ދިވެހި ސިފައިންގެ 134 ވަނަ އަހަރީ ދުވަހުގެ މުނާސަބަތުގައި، ކަޅުތުއްކަލާކޮށީގައި މިރޭ ބޭއްވި ރަސްމީ ޖަލްސާގައި ވާހަކަފުޅުދައްކަވަމުންނެވެ. 
ރައީސް ވިދާޅުވީ ސިފައިންގެ ޚިދުމަތުގައި ތެދުވެރިކަމާއި އިޚްލާޞްތެރިކަމާއެކު ޚިދުމަތް ކުރަމުންދާ ސިފައިންނަށް، އެއް ރޭންކުގައި ވަކި މުއްދަތެއް ވިއަސް، މިހާރު އޮތް ޤަވާއިދުގެ ތެރެއިން ލިމިޓޭޝަން ހަމަވާ ގޮތަށް އޮތް އޮތުން ބަދަލުކުރައްވައި، ސިފައިންގެ ޚިދުމަތުގައި ދެމި ހުރެވޭނެ ގޮތަށް ބަދަލުކޮށްދެއްވާނެ ކަމަށެވެ.

“ސިފައިންގެ ޚިދުމަތުގައި ތެދުވެރިކަމާއި އިޚްލާސްތެރިކަމާއެކީގައި ޚިދުމަތް ކުރަމުންދާ ސިފައިންގެ މީހުންނަށް އަދި ރޭންކުގައި ވަކި މުއްދަތެއްވިޔަސް އަދި ލިމިޓޭޝަން މިހާރު އޮތްގަވާއިދުގެ ތެރެއިން ހަމަވާގޮތަށް އޮތްއޮތުން އެއީ ބަދަލުވާންޖެހޭ ކަމެއް ކަމަށް އަޅުގަނޑު ގަބޫލުކުރަން،” ރައީސް ވިދާޅުވި އެވެ.

މިހާރު އޮންނަ ގޮތުން އެއް ރޭކެއްގައި ކުރިއެރުން ނުލިބި ވަކި މުއްދަތެއް ހަމަވުމުން ސިފައިންގެއިން ވަކިވާން ޖެހެ އެވެ.

ސިފައިންގެ ރިޓަޔަރަމަންޓް ގަވާއިދަށް ބަދަލެއް ގެންނަނީ

މިރޭގެ ޖަލްސާގައި ރައީސް ވަނީ ސިފައިންގެ ރިޓަޔަރަމަންޓް ގަވާއިދަށް ވެސް ބަދަލު ގެންނަން ޖެހޭ ކަމަށް ދެކެވަޑައިގަންނަވާ ކަމަށް ވިދާޅުވެފަ އެވެ. ސަބަބުވެސް ވިދާޅުވެ ދެއްވި އެވެ.

“30 އަހަރުވިޔަސް 35 އަހަރުވިޔަސް ތަފާތެއް ނެތް ރިޓަޔަމަންޓުގައި މިހާރު ލިބޭ އަދަދަށް ބަލާއިރުގައި ބެނެފިޓަށް ބަލާއިރު،” ރައީސް ވިދާޅުވި އެވެ.

އެމަނިކުފާނު ވިދާޅުވީ އެއީ އަދުލްވެެރި ގޮތެއް ނޫން ކަމަށެވެ.

މީގެއިތުރުން ސިފައިންގެ ކޮންމެ މީހެއްގެ ޢާއިލާ ދިރިއުޅޭ ސަރަޙައްދު ހިމެނޭ އޭރިއާ ކޮމާންޑެއްގައި ޑިއުޓީ އަދާކުރެވޭނެ ފުރުޞަތު ޤާއިމުކޮށްދެއްވާނެކަމުގައިވެސް އެމަނިކުފާނު ވިދާޅުވި އެވެ.