އޮޔާގޮސް ބްރިޖް ސަރަހައްދަށް އުރުނު ބޯޓުތަކުގެ މައްސަލަ 241 ކޮމިޓީއަށް
ލިޔުންތެރިޔާ
އަބްދުﷲ ހުސައިން
މާލެއާއި ހުޅުލެ ގުޅުވައިދޭ ސިނަމާލެ ބްރިޖް ސަރަހައްދަށް ބްރާސްފަތި ދުވަހުގެ ރޭ އޮޔާގޮސް އުރުނު ދެ ބޯޓުގެ މައްސަލަ ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ، 241 ކޮމިޓީ އަށް ހުށަހަޅައިފިއެވެ.
މި މައްސަލަ 241 ކޮމިޓީން ބަލައިދިނުމަށް އެދި މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ. މެންބަރު ހުށަހެޅުއްވި މައްސަލައިގައި ވަނީ، މި ހާދިސާއާ ގުޅިގެން ކަމާބެހޭ އިދާރާތަކުގެ ވެރިން ކޮމިޓީއަށް ހާޒިރުކޮށް، ކަންހިނގައިދިޔަ ގޮތުގެ ފުރިހަމަ މައުލޫމާތު ސާފުކޮށްދިނުމަށް އެދިވަޑައިގެންފައެވެ.
މިހާތަނަށް މައުލޫމާތު ލިބިފައިވާ ގޮތުގައި، މި ހާދިސާގައި އޮޔާގޮސް އުރުނު ދެ ބޯޓަކީ ވެސް މޯލްޑިވްސް ކަސްޓަމްސް ސާވިސްގެ ބެލުމުގެ ދަށުގައި އަޅާފައި އޮތް ދެ ބޯޓެވެ. މި ދެ ބޯޓު އޮޔާދިޔައީ ބްރާސްފަތި ދުވަހުގެ ރޭ މާލެ ސަރަހައްދަށް ކުރި ވިއްސާރައިގައި އައި ވަރުގަދަ ވިލާގަނޑެއްގައި ނަގިލި ކަހައިގެން ގޮސްގެންނެވެ. މީގެ ތެރެއިން އެއް ބޯޓު އޮޔާގޮސް ސިނަމާލެ ބްރިޖުގެ ތަނބެއްގައި ޖެހިފައިވާއިރު، ބޮޓުތައް ވަނީ އެ ސަރަހައްދުގެ ތޮށިގަނޑު ކައިރިއަށް އުރިފައެވެ.
މި ހާދިސާ ހިނގި ވަގުތު އެ ދެ ބޯޓުގައި ވެސް އެއްވެސް ފަޅުވެރިއަކު ނެތް ކަމަށް ވަނީ މައުލޫމާތު ލިބިފައެވެ.
މި ހާދިސާއާ ގުޅިގެން ކަސްޓަމްސްގެ ފަރާތުން ރަސްމީކޮށް އަދި މިހާތަނަށް އެއްވެސް އެއްޗެއް ހާމަކޮށްފައެއް ނުވެއެވެ. ނަމަވެސް، މިފަދަ ހާދިސާއެއް ހިނގުމުން ބްރިޖަށް ލިބިދާނެ ގެއްލުމަކާމެދު ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
