ބަދަލު ހިފުމުގެ ”ހަތިޔާރަކަށް“ ބޭނުންކުރުމަށް ފަލަސްތީނުގެ 1,700 މީހުންގެ ހަށިގަނޑު އިސްރާއީލުން ހިފަހައްޓާފައިވާކަން ހާމަކޮށްފި

ނިރުބަވެރި އިސްރާއީލުގެ ސަލާމަތީ ބާރުތަކުން، މުސްތަގުބަލުގައި ބަދަލުކުރެވޭ "ބާގޭނިންގ ޗިޕްސް"ގެ ގޮތުގައި ފަލަސްތީނުގެ 1,700 އެއްހާ މީހުންގެ ހަށިގަނޑު ހިފަހައްޓާފައިވާކަން ހާމަވެއްޖެއެވެ.

އިސްރާއީލުގެ "ހާރެޓްޒް" ނޫހުން ހޯމަ ދުވަހު ރިޕޯޓުކޮށްފައިވާ ގޮތުގައި، މި އަދަދު ހާމަވެފައިވަނީ އިސްރާއީލުގެ ސަލާމަތީ އިދާރާތަކުގެ މެދުގައި ދާދި ފަހުން ބޭއްވުނު މަޝްވަރާތަކެއްގެ ތެރެއިންނެވެ. މި މަޝްވަރާތަކުގައި އިސްރާއީލުގެ ޝިން ބެޓް ސެކިއުރިޓީ ސާވިސްގެ ވެރިޔާ ޑޭވިޑް ޒިނީ ވަނީ، ކުރިއަށް އޮތް ތަނުގައި އިސްރާއީލުގެ އެއްވެސް މީހަކު ރަހީނުކޮށްފި ނަމަ ބަދަލުގައި ބޭނުންކުރުމަށްޓަކައި މި ހަށިގަނޑުތައް ހިފެހެއްޓުމަށް ތާއީދުކުރައްވާފައެވެ. މި ނިންމުމަށް އިސްރާއީލުގެ އަސްކަރިއްޔާއިން ވެސް ތާއީދުކުރާ ކަމަށް ރިޕޯޓުތައް ބުނެއެވެ.

ނޫހުން ބުނާ ގޮތުގައި، ހިފަހައްޓާފައިވާ ގިނަ ހަށިގަނޑުތަކަކީ 7 އޮކްޓޯބަރު 2023 ގެ ހަމަލާތަކުގައި ނުވަތަ އޭގެ ފަހުން ހިނގި ޤަތުލްއާއްމުތަކުގައި ޝަހީދުވި މީހުންގެ ހަށިގަނޑުތަކެވެ. އަދި، މީގެ ތެރޭގައި އެތައް އާންމުންގެ ހަށިގަނޑުތައް ވެސް ހިމެނޭކަން ވަނީ ފާހަގަކުރެވިފައެވެ.

ގާނޫނީ މާހިރުން ވަނީ ހަނގުރާމައިގައި ބައިވެރިވިކަމުގެ އެއްވެސް ހެއްކެއް ނެތް މީހުންގެ ހަށިގަނޑު ހިފެހެއްޓުމުގެ ބާރު އިސްރާއީލަށް ލިބިގެން ނުވާކަމަށް ބުނެފައެވެ.

"ޕަލަސްތީނިއަން ނޭޝަނަލް ކެމްޕޭން ފޯ ދަ ރިޓްރީވަލް އޮފް މާޓީރްސް ބޮޑީސް" އިން ހާމަކޮށްފައިވާ ގޮތުގައި، އިސްރާއީލުގެ ދެކުނުގައިވާ އެސްޑޭ ޓޭމަން އަސްކަރީ މަރުކަޒުގައި އެކަނިވެސް ޣައްޒާގެ 1,500 އެއްހާ މީހުންގެ ހަށިގަނޑު ހިފަހައްޓާފައިވެއެވެ.

ގަތުލްއާއްމު މެދުކަނޑާލުމުގެ އެއްބަސްވުމަކަށް އައިސްފައިވީ ނަމަވެސް، އިސްރާއީލުން ދަނީ ޣައްޒާގެ އެކި ސަރަހައްދުތަކަށް ހަމަލާދެމުންނެވެ. މިގޮތުން އެއްބަސްވުމަށްފަހު ދިން ހަމަލާތަކުގައިވެސް 1,258 މީހުން ޝަހީދުވެ، 4,000 އަށްވުރެ ގިނަ މީހުން ޒަޚަމްވެފައިވާ ކަމަށް ޣައްޒާގެ ހެލްތު މިނިސްޓްރީން ބުނެއެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން އިސްރާއީލުން ކުރިއަށްގެންދާ ގަތުލުއާންމުގައި މިހާތަނަށް 73,000 އަށްވުރެ ގިނަ ފަލަސްތީނު މީހުން ޝަހީދުކޮށްލާފައިވާއިރު، 174,000 އަށްވުރެ ގިނަ މީހުން ވަނީ ޒަޚަމްކޮށްލާފައެވެ. އަދި ޣައްޒާގެ އުމްރާނީ ވަސީލަތްތަކުގެ 90 އިންސައްތަ ވަނީ ސުންނާފަތިކޮށްލާފައެވެ.