ގުޅުން ބޭއްވުނީ އެޕްސްޓީންގެ މުޑުދާރު ކަންތައްތައް ނޭންގޭތީ، އެކަމާ ހިތާމަކުރަން: ރައީސް ވަހީދު
ކުޑަކުދިންނަށް ޖިންސީ ގޯނާކުރުމާއި ކުޑަކުދިންގެ ބަރަހަނާ މަންޒަރު ވީޑިއޯކޮށް، އެ ކުދިންނާއި އެތައް ބަޔަކަށް ބްލެކްމެއިލްކުރި ޖެފްރީ އެޕްސްޓީންއާ މުޢަމާލާތްކޮށް ގުޅުމެއް ބޭއްވުނީ އޭނާގެ މުޑުދާރު އަމަލުތަކުގެ އެއްވެސް މައުލޫމާތެއް އެއްވެސް މިންވަރަށް ލިބިފައިނުވާތީ ކަމަށް ކުރީގެ ރައީސް ޑރ. މުހައްމަދު ވަހީދު ހަސަން މަނިކު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ރައީސް ވަހީދުގެ އޮފީހުން އާންމުކުރެއްވި ބަޔާނެއްގަ އެވެ. އެ ބަޔާނުގައި ބުނީ އެޕްސްޓީންއާ އެކު އޮތީ ރަސްމީ ގުޅުމެއް ކަމަށާ އޭނާ ހިންގި އެއްވެސް މުޑުދާރު އަމަލެއްގައި ބައިވެރިވެފައިނުވާނެ ކަމަށެވެ. އަދި އެފަދަ ކަމެއް އެމަނިކުފާނާއި އެމަނިކުފާނުގެ އާއިލާ އެއްވެސް މެންބަރަކު ކުރައްވާފައިނުވާނެ ކަމަށެވެ.
އަދި އޭނާގެ ހަގީގަތް ހާމަވުމުން އެފަދަ ގުޅުމެއް އަދި މުއާމަލާތެއް ކުރެވިފައިވާތީ ހިތާމަ ކުރައްވާ ކަަމަށް ވިދާޅުވި އެވެ.
ރައީސް ވަހީދު ވަނީ އެޕްސްޓީން ބޭއްވި އެއްވެސް ޕާޓީއެއްގައި ނުވަތަ ހަރަކާތެއްގައި އެމަނިކުފާނާއި އާއިލާގެ މެންބަރަކު ބައިވެރިވެފައިނުވާނެ ކަމަށާ ރަސްމީ ހައިސިއްޔަތުން ބައްދަލު ކުރެއްވީ ދެ ފަހަރު ކަމުގައި ވިދާޅުވެފަ އެވެ.
2008 ވަނަ އަހަރު އެޕްސްޓީންގެ މައްޗަށް ޖަލު ހުކުމެއް އައި ކަމެއް އަދި އޭނާގެ މައްޗަށް އޮތް ތުހުމަތާއި ގުޅޭ އެއްވެސް މައުލޫމާތެއް ކުރީން ލިބިވަޑައިގެންފައި ނެތް ކަމަށާ އެެފަދަ އެއްވެސް މައުލޫމާތެއް ރައީސް ވަހީދަށް ލިބިވަޑައިގެންފައިވީނަމަ އެެއްވެސް މިންވަރަކަށް އެފަދަ މީހަކާއި އެއްވެސް ގުޅުމެއް އަދި މުއާމަލާތެއް ނުބޭއްވީސް ކަމުގައި ވެސް ބަޔާނުގައި ފާހަގަކޮށްފައިވެ އެވެ.
އެޕްސްޓީންގެ މައްޗަށް ކުރެވޭ ތުހުމަތާއި އޭނާ ހިންގާފައިވާ މުޑުދާރު އަމަލުތަކަކީ އެކަންކަމާއި އެންމެންވެސް ދެކޮޅު އަދި ދެކޮޅު ހަދަން ޖެހޭނެ ކަންކަމުގައި ރައީސް ވަހީދުގެ އޮފީހުން ނެރުނު ބަޔާނުގައިވެ އެވެ.
ޖެފްރީ އެޕްސްޓީންއާ މުޢަމާލާތްކޮށް ގުޅުން ބޭއްވިކަން ހާމަވުމުން ރައީސް ވަހީދު ވަނީ, ރައީސުލްޖުމްހޫރިއްޔާގެ ސްޕެޝަލް އެންވޯއިގެ މަގާމުން އިސްތިއުފާ ދެއްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
