ބޭރުގައި ކިޔަވާ ދަރިވަރުންނަށް ސްޓައިޕެންޑް ދޫކުރުން ލަސްވަނީ ވުޒާރާއަށް ދޭ މައުލޫމާތު ފުރިހަމަ ނުވާތީ: ޑރ. ހައިދަރު

ބޭރުގައި ކިޔަވާ ދަރިވަރުންނަށް ސްޓައިޕެންޑް ދޫކުރުން ލަސްވަނީ މަތީ ތަޢުލީމާ ބެހޭ ވުޒާރާއަށް ދޭ މައުލޫމާތު ފުރިހަމަ ނުވެ ހުންނާތީ ކަމަށް އެ ވުޒާރާގެ ވަޒީރު ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، ބޭރުގައި ކިޔަވާ ދަރިވަރުންނަށް ލޯނު ފައިސާ އާއި، ސްކޯލާޝިޕް ދަރިވަރުންނަށް ދޭ ސްޓައިޕެންޑް ފައިސާގެ އިތުރުން ޓިޔުޝަން ފީތައް ލަސްވާ ސަބަބާއި ގުޅޭ ގޮތުން، ހިތަދޫ މެދު ދާއިރާގެ މެންބަރު އަޙްމަދު އަޒާން މަރްޒޫޤް، ވަޒީރު ހައިދަރާ ލިޔުމުން ޖަވާބު ހޯއްދަވަން ފޮނުއްވި ސުވާލަށް ވަޒީރު ދެއްވި ޖަވާބު ވަނީ އިއްވާފައެވެ.

އެ ސުވާލަށް ޖަވާބު ދެއްވަމުން ވަޒީރު ހައިދަރު ވިދާޅުވީ، ސްކޯލަޝިޕްގެ ދަށުން ރާއްޖެއިން ބޭރުގައި ކިޔަވާ ދަރިވަރުން، ފުރުމުގެ ކުރިން ފައިސާގެ ކަންކަން ހަމަޖެއްސޭހާ ދުވަސް އޮއްވައި، ދަރުވަރު ފުރާ ދުވަސް މިނިސްޓްރީއަށް އެންގުމަށްފަހު ފުރާ ނަމަ، އެ ދަރިވަރަށް ދެމަސްދުވަހުގެ ސްޓައިޕެންޑާއި ކަނޑައެޅިފައިވާ ބައެއް ކަންކަމަށް ބޭނުންވޤފައިސާ އެ ދަރިވަރަކަށް ހަވާލު ކުރެވޭ ކަމަށެވެ.

އެއަށްފަހު ދަރިވަރު، ކިޔަވަންދާ ގައުމަށް ގޮސް، އެގައުމުގެ ލޯކަލް ބޭންކެއްގައި ދަރިވަރުގެ އެކައުންޓެއް ހުޅުވަށް އެ އެކައުންޓަށް ފައިސާ ޖަމާކުރަން ބޭނުން ކަމަށް ބުނެ ފިނޭންސް މިނިސްޓްރީއަށް އަންގަވާފައިވާ މައުލޫމާތުތައް ލަސްނުވެ  މަތީތައުލީމާ ބެހޭ ވުޒާރާއަށް ފޮނުވުމަށް އިރުޝާދު ދެވޭ ކަމަށް ވަޒީރު ވިދާަލުވިއެވެ. އަދި އެ މައުލޫމާތުގެ އަލީގައި ސްޓައިޕެންޑް ޖަމާ ކުރެވެނީ ދަރިވަރު ކިޔަވާ ގައުމެއްގެ ބޭންކުގައި ހުޅުވުނު އެ އެކައުންޓަށް ކަން ވަޒީރު ފާހަގަކުރެއްވިއެވެ.

މީގެ އިތުރުން ސްޓައިޕެންޑް ޖަމާކުރެވެނީ އަހަރަކު ދެފަހަރު ކަމަށާ، އެ ޖަމާކުރެވެނީ ދަރިވަރު ކިޔަވަމުންދާކަން ދަރުވަރު ކިޔަވާ މަރުކަޒުން މިނިސްޓްރީއަށް އެންގުމުން ކަމަށް ވަޒީރު ވިދާޅުވިއެވެ.

ޓިޔުޝަން ފީއާއި ސްޓައިޕެންޑް ޖަމާކުރުމަށް މިނިސްޓްރީއާ ދަރިވަރުން ހިއްސާކުރާ ބޭރުގެ ބޭންކު އެކައުންޓް ތަކުގެ މައުލޫމާތު ބައެއް ފަހަރު ފުރިހަމަ ނުވުމުގެ ސަބަބުން ފައިސާ ޖަމާކުރުމުގައި ބައެއް ދަތިތަކާ ކުރިމަތި ވޭ. އަދި މައުލޫމާތު ފުރިހަމަ ކުރުމަށް އެދި އަލުން ޔުނިވާސިޓީ އަށާއި ދަރުވަރުންނަށް އެންގޭ. އަދި މި މައުލޫމާތު ފުރިހަމަ ކުރުމަށްފަހު އަލުން، މިނިސްޓްރީއަށް ހުށަހެޅުމުގައިވެސް ވަގުތު ހޭދަވޭ. އެހެން ކަމުން މިއީ ފައިސާ ޖަމާކުރުމުގާ ލަސްތައް ދިމާވާ މައިގަނޑު ސަބަބުކަން ފާހަގަކުރަން.

ވަޒީރު ޑރ ޢަލީ ހައިދަރު އަޙްމަދު

ވަޒީރު ވިދާޅުވީ، އެކައުންޓް މައުލޫމާތު ފުރިހަމަ ނުވެގެން ފައިސާ ޖަމާކުރުން ލަސްވާ މައްސަލަ ހައްލު ކުރުމަށް ފައިސާ ޖަމާކުރުމަށް ބޭނުންވާނެ ފުރިހަމަ މައުލޫމާތު ހިމެނޭ ގޮތަށް މައުލޫމާތު ކަރުދާހެއް ތައްޔާރުކޮށް ދަރިވަރުންނާ ހިއްސާ ކުރެވެމުންދާ ކަމަށެވެ.