ބ. އަތޮޅުގައި އާރުޓީއެލް ހިދުމަތް ރަސްމީކޮށް އިފްތިތާހު ކޮށްފި

ބ. އަތޮޅުގައި އާރުޓީއެލްގެ ހިދުމަތް މިއަދު ރަސްމީކޮށް އިފްތިތާހު ކޮށްފި އެވެ.

ބ އަތޮޅުގެ ރަށްތަކަށް ރައީސް ފެއްޓެވި ދަތުރުފުޅުގެ ތެރެއިން އެ އަތޮޅު އޭދަފުއްޓަށް ވަޑައިގެން އެ ހިދުމަތް ރަސްމީކޮށް އިފްތިތާހު ކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ. އެމަނިކުފާނު ވަނީ އެ ހިދުމަތް ރަސްމީކޮށް ފައްޓަވައި ދެއްވާ ފެރީ އެނައުސްމަންޓް އިއްވަވައިދެއްވާފަ އެވެ.

އެމްޓީސީސީން ވަނީ އާރުޓީއެލްގެ ހިދުމަތް ބ.އަތޮޅުގެ ރަށްތަކަށް ފެށިކަން މިދިޔަ މަހުގެ 28 ވަނަ ދުވަހު އިއުލާނުކޮށްފަ އެވެ. މިއީ އެމްޓީސީސީން އާރުޓީއެލްގެ ހިދުމަތްފެށި 11 ވަނަ އަތޮޅެވެ.

މިދިޔަ ޖޫންމަހު ރ އަތޮޅަށް އާރުޓީއެލްގެ ހިދުމަތް ފެށުމާ ގުޅިގެން އެކްސްގައި ކުރެއްވި ޕޯސްޓުގައި ރައީސް ޑރ.މުއިއްޒު ވިދާޅުވެފައި ވަނީ ޖުލައިމަސް ނިމުމުގެ ކުރިން ބ. އަތޮޅަށް އާރުޓީއެލްގެ ހިދުމަތް ދޭން ފަށާނޭ ކަމަށެވެ.

ބ. އަތޮޅުގައި އާރުޓީއެލްގެ ހިދުމަތް ދިނުމުގައި މިވަގުތަށް ދެ ލޯންޗް ބޭނުންކުރާނޭ ކަމަށް އެމްޓީސީސީން ވަނީ ބުނެފައެވެ. މި މަހުގެ ތިންވަނަ ދުވަހާއި ކުރީ އަހުލުވެރިވުމަށް ކުރާ ދަތުރުތަކެވެ. މިދަތުރުތަކަށް ރައްޔިތުން އަތުން ފީ އެއް ނަގާފައެއް ނުވެ އެވެ. އާރުޓީއެލް ފެރީގެ ފީ ނަގަން ފެށީ އޮގަސްޓްމަހުގެ 4 ވަނަ ދުވަހުން ފެށިގެންނެވެ.

ބ. އަތޮޅުގެ ރަށްތަކުގައި އާރުޓީއެލް ފެރީގެ ހިދުމަތް ހަފްތާގެ 6 ދުވަހު ދިނުމަށް ވަނީ ނިންމާފައެވެ.

އާރުޓީއެލްގެ ހިދުމަތަކީ ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި ފެށި މަޝްރޫއު އެކެވެ. ކުރީ ސަރުކާރުން ފެށި އެންމެ މުހިންމު އެއް މަޝްރޫއު އަކީ މިއީ އެވެ.