ޝުޖާއަށް ތުހުމަތުވާ މައްސަލަތައް ނިމުނު އަހަަރުން ފެށިގެން އޭސީސިން އަންނަނީ ބަލަމުން: އޭސީސީ

ސަރުކާރު ހިންގާ ޕްރޮގްރެސިވް ކޮންގުރެސް ޕާޓީގެ ނައިބުރައީސް އަދި ބާރަށު ދާއިރާގެ ރައްޔިތުންގެ މަޖިލީހުގެ މެންބަރު އިބްރާހީމް ޝުޖާއަށް ތުހުމަތުވާ މައްސަލަ ފާއިތުވި އަހަރުން ފެށިގެން ބަލަމުންދާކަމަށް އެންޓި ކޮރަޕްޝަން ކޮމިޝަނުން ބުނެފިއެވެ.

ޝުޖާއަށް ތުހުމަތުވާ މައްސަލައެއް ފެންމަތިވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ރައީސްކަމުގެ ހުަވައިކުރެއްވި ރަސްމިއްޔާތުގެ ކަންކަން އިންތިޒާމުކުރުމަށް ސިވެކްއަށް ދޫކުރި ފައިސާގެ ތެރެއިން ޝުޖާގެ މަސްލަހަތު އޮންނަ ކުންފުނިތަކަކަށް ގިނަ ފައިސާތަކެއް ދިންކަމަށް ބުނެ، މޯލްޑިވްސް މަނިޓަރީ އޮތޯރިޓީގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ)އިން ތައްޔާރުކޮށްފައިވާ ރިޕޯޓެއް ކަމުގައި ބުނާ ލިޔުމެއް ސޯޝަލް މީޑިޔާގައި އާއްމުވުމާ ގުޅިގެންނެވެ.

މި ރިޕޯޓާ ގުޅިގެން "ވޮއިސް"އަށް މައުލޫމާތު ދެއްވަމުން އޭސީސީގެ މީޑިޔާ އޮފިޝަލަކު ވިދާޅުވީ އެ ކޮމިޝަނުގެ ސަމާލުކަމަށް އެ ރިޕޯޓު އައުމާއެކު ކޮމިޝަނުން އަމިއްލައަށް އިސްނަގައިގެން ފާއިތުވި އަހަރުގެ ފަހުކޮޅުން ފަށަައިގެން އެކަން ބަލަމުން އަންނަ ކަމަށެވެ.

އިއްޔެ ފުލުހުންވެސްވަނީ އެ މައްސަލަ ތަހުގީގުކުރަމުން އަންނަ ކަމަށް ބުނެފައެވެ. އެ މައްސަލަ ތަހުގީގުކުރަން ފަށާފައިވަނިކޮށް، މާލިއްޔަތު ކޮމިޓީން މިއަދު ޝުޖާއު ވަކިކޮށް ވަނީ ތަރިކައާ ބެހޭ ކޮމިޓީއަށް ބަދަލުކޮށްފައެވެ.

މި މައްސަލައާ ބެހޭގޮތުން ޝުޖާއު ވަނީ އޭނާގެ މަސްލަހަތު ހިމެނޭ ކުންފުންޏަކުން އުސޫލާ ހިލާފަށް ކަންކަން ކޮށްފައިނުވާނޭކަމަށް ވިދާޅުވެފައެވެ.