ޝިފާން، ރައީސް ނަޝީދަށް: އައިސިން އަކީ ކޭކުގެ އަގުބޮޑުކޮށްލަދޭ ބޭނުންތެރި ފަށަލައެއް

ސިޔާސީ މަސައްކަތްތަކުގައި ކޯލިޝަން ހެދުމަކީ ކޭކެއްގައި "އައިސިން" ޖަހާލުން ފަދަ ކަމެއް ކަމަށް ކުރީގެ ރައީސް މުޙައްމަދު ނަޝީދު ވިދާޅުވި ވާހަކަފުޅަށް، އަދާލަތު ޕާޓީގެ ރައީސް މުޙައްމަދު ޝިފާން ވަރުގަދަ ރައްދެއް ދެއްވައިފިއެވެ.

ޝިފާން އެކްސްގައި ކުރެއްވި ޕޯސްޓެއްގައި ވިދާޅުވީ، ކޭކެއްގެ މަތީގައި ފަތުރާލެވިފައިވާ އައިސިންގ ފަށަލައަކީ ކޭކު ރީތިކޮށް އަދި އޭގެ އަގު ބޮޑުކޮށްލަދޭ ވަރަށް ބޭނުންތެރި ފަށަލައެއް ކަމަށެވެ.

އަދި އެ ފަށަލަ ނައްތާލުމުން ބާކީ އޮންނަ ބަޔަކީ އެއްވެސް ރަހައެއް ނެތް، ހިކިފައިވާ، އަދި ފަސޭހައިން ކުނޑިވެގެންދާ އެއްޗަކަށް ވާނަމަ، އެ ކެއުމަށް ޝައުގުވެރިވާނެ ބަޔަކު ވަރަށް މަދުވާނެ ކަމަށް ޝިފާން ފާހަގަކުރެއްވިއެވެ.

ޝިފާން އިތުރަށް ވިދާޅުވީ ކޭކެއްގެ ހަގީގީ އަގު ބިނާވެފައިވަނީ އޭގެ ބޮޑުމިނަކަށް ނޫން ކަމަށެވެ. އޭގެ ބަދަލުގައި، އެއީ ކާލަން ބޭނުންވާ ފަދަ މީރު އަދި ޝައުގުވެރި އެއްޗަކަށް ވުމަކީ އޭގެ އަސްލު އަގު ވަޒަންކުރެވޭ މިންގަނޑު ކަމަށް އޭނާ ވިދާޅުވިއެވެ.

‏ހަމަ އެފަދައިން އަޅުގަނޑުމެން ކުރާ ކަންތައްތަކުގައިވެސް، އެކަމެއްގެ ބޮޑުމިނަށްވުރެ މުހިންމީ އެކަމެއްގެ ފެންވަރާއި އެކަމެއްގައި ހިމެނޭ އިޚްލާޞްތެރިކަމެވެ.

ޝިފާން

އެމްޑީޕީގެ ޗެއާޕާސަން އިންތިޚާބުގެ ކެމްޕޭނަށް ގދ. ފަރެސްމާތޮޑާއަށް ވަޑައިގެން ބޭއްވި ބައްދަލުވުމުގައި ނަޝީދު ވިދާޅުވީ ސިޔާސީ މަސައްކަތުގައި ބައެއް ފަހަރު އެހެން ޕާޓީތައް ގާތްކުރަނީ "އައިސިން" ޖަހާލަން ކަމަށެވެ. އަދި އަދާލަތު ޕާޓީ އާއި ޖުމްހޫރީ ޕާޓީގެ ބައިވެރިވުން އޮވެގެން ނޫނީ އެމްޑީޕީއަށް ވެރިކަން ނުލިބޭނެ ކަމަށް ގަބޫލުނުކުރުމަށް އެމަނިކުފާނު އެމްޑީޕީގެ މެންބަރުންގެ ކިބައިން އެދިވަޑައިގެންނެވިއެވެ.

ނަޝީދު ވިދާޅުވި ގޮތުގައި ވެރިކަން ހޯދުމަށް ހުރިހާ މަސައްކަތެއް ކުރާ ބަޔަކީ އެމްޑީޕީގެ "ރީނދޫ ލަޝްކަރެ"ވެ. މިއީ އެއް ޕާޓީއަކަށް އެކަނި ރިޔާސީ އިންތިޚާބެއް ކާމިޔާބު ނުވާނެ ކަމަށް ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެފައިވާ ވާހަކަފުޅަށް ނުސީދާކޮށް ދެއްވި ރައްދެކެވެ.