ވިލިމާލޭގެ ކަންކަން ކުރިއަށްގެންދިއުމުގައި ދާއިރާގެ މެމްބަރަށް މާލެސިޓީ ކައުންސިލްގެ އެއްބާރުލުން ލިބޭނެ: މޭޔަރު

ވިލިމާލޭގެ ކުރިއެރުމަށް ހިންގާ ހަމަ ކޮންމެ މަސައްކަތެއްގައި އެ ދާއިރާގެ މެމްބަރަށް މާލެސިޓީ ކައުންސިލުގެ އެއްބާރުލުން ދެމުންދާނޭަމަށް މާލެސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

ވިލިމާލޭގައި މިއަދު ފެށި "ސާފު ވިލިމާލެ ރައްކާތެރި ވެށި" ޕްރޮގްރާމް ފެށުމުގެ ގޮތުން ބޭއްވި ހަފްލާގައި ވާހަކަދައްކަވަމުން މޭޔަރު އާޒިމް ވިދާޅުވީ ވިލިމާލޭގެ ތަރައްޤީއަށް ކުރިއަށްގެންދާ ހަމަ ކޮންމެ ކަމެއްގައި އެ އަވަށް ތަމްސީލުކުރައްވާ ރައްޔިތުންގެ މަޖިލީހުގެ މެންބަރު މުޙަައްމަދު އިސްމާޢީލަށް ފުރިހަމަ އެއްބާރުލުން ދެއްވާނޭކަމަށެވެ.

ވިލިމާލޭގެ މެމްބަރު ނިސްބަތްވަނީ ސަރުކާރު ހިންގާ މައި ޕާޓީ ޕީއެންސީއަށެވެ. މޭޔަރު އާޒިމަކީ އިދިކޮޅު އެންމެބޮޑު ޕާޓީ އެމްޑީޕީގެ މެމްބަރެކެވެ.

އާޒިމް ވިދާޅުވީ ވިލިމާލޭގެ ތަރައްޤީގެ ކަންކަމުގައި މެމްބަރު އަބަދުވެސް ވާހަކަތައް ހިއްސާކުރަމުންދާކަމަށެވެ. އެހެންަމުން މޭޔަރުގެ ހައިސިއްޔަތުން މެމްބަރަށް ދެއްވަންޖެހޭ އެއްބާރުލުން ހުއްޓުމެއްނެތި ދެއްވަމުްނގެންދަވާނޭކަން އާޒިމް ފާހަގަކުރެއްވިއެވެ.

ވިލިމާލެ ތަރައްގީކުރުމަށް މުޙައްމަދު އިސްމާއީލަށް ބޭނުންވާ ހުރިހާ ކަމެއް ހުއްޓާނުލާ ކުރިއަށްގެންދާނަން ކުރިއަށްއޮތްތާ. އެކަމުގެ ޔަގީންކަން މި އަވަށުގެ ރައްޔިތުންނަށް އަޅުގަނޑު އަރުވަން

މޭޔަރ އާދަމް އާޒިމް ވިދާޅުވިއެވެ

ވިލިމާލެ ސާފްކުރުމަށް ކުރިއަށްގެންދާ މި ހަރަކާތުގައި މާލެ ސިޓީ ކައުންސިލުގެ އިތުރުން އެންވާރަމެންޓް މިނިސްޓްރީ، ސިޓީސް މިނިސްޓްރީ، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)، މާލެ ވޯޓާ އެންޑް ސްވަރޭޖް ކޮމްޕެނީ ލިމިޓެޑް(އެމްޑަބްލިޔުއެސްސީ) އަަދި ވޭސްޓް މެނޭޖްމެންޓް ކޯޕަރޭޝަން ލިމިޓެޑް (ވެމްކޯ) އިން ބައިވެެރިވެފައި ވެެއެވެ. މި ހަރަކާތަކީ ވިލިމާލެ ދާއިރާ މެމްބަރުގެ އިސްނެންގެވުމުގެ މަތިން ފެށި ހަރަކާތެކެވެ. މި ހަރަކާތުގައި އެތަންތަނުގެ އިސްވެރިން ވަނީ ބައިވެރިވެ ވަޑައިެގން އަމަލީގޮތުން ސާފްކުރުމުގައި ބައިވެރިވެވަޑައިގެންފައެވެ.

މި ހަރަކާތުގެ ދަށުން ވިލިމާލޭގެ އެކި ސަރަހައްދުތަކުގައި ޖަމާވެފައިވާ ކުނި ނަގާ، ސާފުކުރަމުންދާނޭކަމަށް މާލެސިޓީ ކައުންސިލުން ބުނެއެވެ.