ޑިމާންޑްތަކަށް އެއްބަސްވުމުން ކަޝްމީރުގެ މުޒާހަރާ ހުއްޓާލައިފި

ކަޝްމީރުގެ ޕާކިސްތާނު ފަޅީގެ ސަރުކާރުން ރައްޔިތުންގެ އަސާސީ ޚިދުމަތްތަކަށް އަޅާނުލާތީ ފެށި މުޒާހަރާތައް ނިންމާލައިފިއެވެ.

އިންސާނީ ހައްޤުތަކަށް މަސައްކަތްކުރާ ފަރާތްތަކާއި ވިޔަފާރިވެރިން ނިކުމެ ފެށި މުޒާހަރާތައް ނިންމާލީ، މުޒާހަރާގެ ބައިވެރިންގެ ޑިމާންޑްތަކަށް އިޖާބަދޭނެކަން ސަރުކާރުން އެންގުމުންނެވެ. ކަޝްމީރުގެ ޕާކިސްތާނު ފަޅީގެ ވެރިރަށް މުޒައްފަރު އާބާދުގައި މިދިޔަ ހޯމަ ދުވަހުން ފެށިގެން ކުރިއަށްދިޔަ އިހްތިޖާޖުގެ ތެރެއިން 10 މީހަކު މަރުވިއެވެ. ސަލާމަތީ ބާރުތަކާއި މުޒާހަރާގެ ބައިވެރިންނާ ދެމެދު ހިނގި ކުރިމަތިލުންތަކުގައި އާއްމުންގެ 7 މީހަކާއި ފުލުހުންގެ 3 މީހަކު މަރުވިކަމަށް ރޮއިޓަރސްއިން ބުނެއެވެ.

މުޒާހަރާކުރާ މީހުންގެ ޑިމާންޑަކަށްވީ، ސަރަހައްދީ ސަރުކާރުގެ އޮފިޝަލުންނަށް އިނާޔަތްތައް އިތުރުކުރުމުގެ ބަދަލުގައި، އާއްމު ޚިދުމަތްތަކަށް ފައިސާ ޚަރަދުކުރުމެވެ. މުޒާހަރާތައް ނިންމާލީ، ސިއްހީ ދާއިރާއާއި ތައުލީމީ ދާއިރާފަދަ ދާއިރާތަކަށް އިތުރަށް ޚަރަދުކުރަން ސަރުކާރުން އެއްބަސްވުމުންނެވެ. އެގޮތުން އެސަރަހައްދުގެ ކަރަންޓުގެ ޙާލަތު ރަނގަޅުކުރުމަށް 35 މިލިއަން ޑޮލަރު ޚަރަދުކުރުމަށްވެސް ސަރުކާރުން އެއްބަސްވިއެވެ.

މިދިޔަ އަހަރުވެސް ހަމަ އެސަރަހައްދުގައި މިފަދަ މުޒާހަރާތަކެއް ހިނގިއެވެ. 4 މީހަކު މަރުވިފަހުން މުޒާހަރަތާއް ހުއްޓާލީ، ކަރަންޓާއި ފުށަށް ސަބްސިޑީއެއް ދިނުމަށް ބޮޑުވަޒީރު ޝެހްބާޒް ޝަރީފް އެއްބަސްވެވަޑައިގަތުމުންނެވެ.