ރައްޔިތުން ވޯޓުލާން ނެރުމަށް އިލެކްޝަންސް އިން އެކަށީގެންވާ މަސައްކަތްތަކެއް ނުކުރޭ: ޔާމީން

އިލެކްޝަންސް ކޮމިޝަން (އީސީ) އިން ކުރިއަށްގެންދާ ފެންނަ ނުފެންނަ ވޯޓުގެ ކަންކަމުގައި އެ ކޮމިޝަނުން ވަރަށް ބޮޑަށް ފަރުވާކުޑަކޮށްފައިވާ ކަމަށް ވިދާޅުވެ، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވަރަށް ބޮޑަށް ފާޑުވިދާޅުވެއްޖެ އެވެ.

އެ މަނިކުފާނު މިހެން ވިދާޅުވެފައިވަނީ މިއަދު ވޯޓުލުމަށްފަހު މީޑިއާއަށް ދިން ބަސްދީގަތުމެއްގައެވެ.

ރައީސް ޔާމީން ވިދާޅުވީ ރާއްޖޭގެ ދުސްތޫރަށް ބަދަލު ގެނައުމާ ގުޅޭ މުހިންމު ވޯޓެއް ނަގަމުންދާއިރު، ރައްޔިތުން ވޯޓުލާން ނެރުމަށް އީސީން އެކަށީގެންވާ މަސައްކަތްތަކެއް ކޮށްފައި ނުވާ ކަމަށެވެ.

އަހުމަދިއްޔާ ސްކޫލުގައި ހުރި ވޯޓު ފޮއްޓަކަށް ވޯޓުލެއްވުމަށް ފަހު ރައީސް ޔާމީން ވިދާޅުވީ، މިއީ ދުސްތޫރީ ނިޒާމުގެ އަސާސީ ސިފައަކާ ގުޅުންހުރި ކަމަކަށް ވާތީ، މިއީ އެއްވެސް ރައްޔިތަކު އިހުތިޔާރީ ވޯޓެއްގެ ގޮތުގައި ދެކިގެން ނުވާނެ ކަމަށެވެ.

ހުރިހާ ބޭފުޅުން ވެސް މިއަދު ވޯޓު ދެއްވަން ވަޑައިގަންނަވާ. އެއްގޮތަކަށް ވެސް އިހުތިޔާރީ ވޯޓަކަށް މި ވޯޓު ނުބައްލަވާ. މަޖުބޫރު ވޯޓަކަށް ހައްދަވާ

ރައީސް ޔާމީން ވިދާޅުވި އެވެ.

ރައީސް ޔާމީން ވިދާޅުވީ މި ވޯޓަކީ ކޮންމެ ރައްޔިތަކު ވެސް ނުކުންނަން ޖެހޭ "މަޖުބޫރު" ވޯޓެއްގެ ގޮތުގައި ބަލަން ޖެހޭނޭކަމަށެވެ. އަދި ވީހާވެސް ގިނަ ރައްޔިތުން ބައިވެރިވެ ބަސް ބުނެފައިވާ ވޯޓެއްކަން ކަށަވަރު ކުރުމަކީ އިލެކްޝަންސް ކޮމިޝަނުގެ ޒިންމާއެއް ކަމަށާއި، ނަމަވެސް އެ ކޮމިޝަނުން ކަންކަން ހަމަޖައްސާފައި ވަނީ ވަރަށް ގައިރު ޒިންމާދާރުކޮށް ކަމަށް އެ މަނިކުފާނު ވިދާޅުވިއެވެ. ޚާއްސަކޮށް، ރާއްޖޭން ބޭރުގައި ތިބި އެތައް ހާސް ދިވެހިންނަށް ވޯޓުލެވޭނެ އިންތިޒާމު ހަމަނުޖެއްސުމާއި، ވޯޓު ފޮށިތައް ނުބެހެއްޓުމަކީ ބޮޑު އިހުމާލެއް ކަމަށް ވިދާޅުވި އެވެ.

މީގެ އިތުރުން، ވޯޓުލާން އަންނަ މީހަކު ވަކި ކަރުދާހެއް ނަގަން ބޭނުން ނުވާ ނަމަ އެ ކަރުދާހެއް ދޫކޮށްލެވޭ ގޮތަށް ހަމަޖެއްސި ހަމަޖެއްސުމަށްވެސް ވަނީ ފާޑުވިދާޅުވެފައެވެ. އަދި ރީރަޖިސްޓްރޭޝަންގައި އިލެކްޝަނުން އަމަލުކުރިގޮތްވެސް ކަމުނުދާކަމަށް ރައީސް ޔާމީން ވަނީ ފާހަގަކުރައްވާފައެވެ.

ރީރަޖިސްޓްރީވާން މީހުންގެ އިންޓްރެސްޓެއް، ޝައުގެއް ފެންނަން ނެތީމައި ތިމަންނަމެންގެ [އީސީގެ] ވެސް އިންޓްރެސްޓެއް ނެތޭ. އެހެނެއް ނޫން އެ ކަން އޮންނަން ވާނީ. އީސީގެ އިންޓްރެސްޓް އޮންނަން ވާނެ ގައުމީ މިހާ ބޮަމެތި ކަންކަމުގައި މީހެއްގެ އިންޓްރެސްޓް ނެތަސް

ކުރީގެ ރައީސް ޔާމިން

މިއަދު ކުރިއަށްދާ ވޯޓުލުމުގައި ޖުމްލަ 294,937 މީހުންނަށް ވޯޓުލުމުގެ ހައްގު ލިބިގެންވެ އެވެ. މި ވޯޓުލުމުގައި ހިމެނެނީ ލޯކަލް ކައުންސިލްތަކުގެ އިންތިހާބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގެ އިތުރުން، ރިޔާސީ އިންތިހާބާއި މަޖިލިސް އިންތިހާބު އެކުގައި ބޭއްވުމާ މެދު ރައްޔިތުންގެ ހިޔާލު ހޯދުމަށް ނަގާ ވޯޓެވެ.

ވޯޓުލުން ކުރިއަށްދަނީ، މިއަދު ހެނދުނު 8:00 އިން ފެށިގެން ހަވީރު 4:00 އަށެވެ.