ވެރިކަން ބަދަލުކުރީ ވަކި ބޭފުޅަކަށްޓަކައި ތޯ އަޅުގަނޑުމެން ވިސްނާލަން އެބަ ޖެހޭ: އަބްދުއްރަހީމް
ލިޔުންތެރިޔާ
ޚަދީޖާ އަރުފާ
ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަން ބަދަލުކޮށް، ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވެރިކަމަށް ގެނައީ ވަކި ބޭފުޅަކަށްޓަކައިތޯ، މިއަދު ދިވެހީން ވިސްނާލަންޖެހޭ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސްޕެޝަލް އެޑްވައިޒަރު އަބްދުއްރަހީމް އަބްދުالله ވިދާޅުވެއްޖެއެވެ.
ރައީސުލްޖުމްހޫރިއްޔާ ކ. ގުރައިދޫ ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން އަބްދުއްރަހީމް ވިދާޅުވީ، ރައީސުލްޖުމުހޫރިއްޔާ ވެރިކަމަށް ގެނައީ ކީއްވެގެންތޯ މިއަދު ދިވެހިން ވިސްނާލަންޖެހޭ ކަމަށެވެ.
އަޅުގަނޑުމެން މިދިޔަ އަހަރު ކޮށްގެން ތިބި ކަންތަކާއި މެދުގައި ވިސްނާލަންޖެހޭ ވަގުތެއް މިއީ. އަޅުގަނޑުމެން މި ކުރި ކަންތައް ކުރީ ކޮން ބޭނުމެއްގައިތޯ، ކީއްވެގެންކަން، ކޮން މަގުސަދެއް ހާސިލްކުރަންކަން، ވިސްނާލަން އެބަޖެހޭ. އަޅުގަނޑުމެން ކުރި ކަންތައް މި ހިސާބުން ނިމުނީތޯ، ނުވަތަ އެކަން ދަމަހައްޓަން ކުރަންޖެހޭ އިތުރު ކަމެއް އެބަ އޮތްތޯ. އެކަން އަޅުގަނޑުމެން ކުރީ އަމިއްލަ ފައިދާ އަށްތޯ؟ ރަށަށް ޓަކައިތޯ, ނޫނީ ވަކި ބޭފުޅަކަށްޓަކައި ތޯ ވިސްނާލަން އެބަޖެހޭ.
އަބްދުއްރަހީމް އަބްދުالله
މިއާއެކު އަދުރޭ ވިދާޅުވީ، މީހަކާއި މަސްއޫލިއްޔަތެއް ހަވާލުކޮށްފި ނަމަ، އެ މަސްއޫލިއްޔަތު އަދާކުރުމުގެ ފުރުސަތު އެމީހަކަށް ދޭންޖެހޭނެ ކަމަށެވެ.
އަޅުގަނޑުމެން 2023 ގައި ނުކުތީ ވަރަށް މުހިންމު ބޭނުމަކު. އަޅުގަނޑުމެންގެ މި ގައުމު ބީވެގެންދާތީ މި ގައުމު އަނބުރާ ހޯދުމަށް ނުކުތީ. އެއީ ވަކި މީހަކަށް ކޮށްދޭ ކަމެއްގެ ގޮތުގައި ކަމެއް ކޮށްދޭކަށް ނޫން. އަޅުގަނޑުމެން ނުކުތީ އަޅުގަނޑުމެންގެ ގައުމަށްޓަކައި. ރައްޔިތުންނަށްޓަކައި. އަންނަން އޮތް ޖީލަށްޓަކައި. މިނިވަންކަމާއި އަމާންކަމަށް ޓަކައި. މި ގައުމުގެ ކުރިއެރުމާއި ތަރައްޤީއަށްޓަކައި.
އަބްދުއްރަހީމް އަބްދުالله
އެ ސަބަބުތަކަށްޓަކައި ކުރީގެ 'އަނިޔާވެރި ވެރިކަން' ބަދަލުކޮށް 3 މަސް ދުވަސް ނުވަނީސް، މި ސަރުކާރު ވައްޓާލުމަށް 'ބަޔަކު' ނުކުމެފައިވާ ކަމަށް އަދުރޭ ވިދާޅުވިއެެވެ.
އަދި ސިޔާސީ ވުމަކީ ޒާތީ ވުން ނޫން ކަމަށާ، ސިޔާސީ ގޮތުން ޚިޔާލު ތަފާތުވި ނަމަވެސް މީހުންނާއި ޒާތީވެ، އަބުރަށް އަރައިގަތުމަކީ ކޮށްގެންވާނެ ކަމެއް ނޫން ކަމަށް އަދުރޭ ވިދާޅުވިއެެވެ. އެފަދައިން ކަން ކުރަނީ ތަސައްރަފު ނުފުދޭތީ ކަމަށްވެސް ވިދާޅުވި އެވެ. އަދި ތަސައްރަފު ފުދިފައި ތިބޭ މީހުން މީހުންނާއި ޒާތީވެ، މީހުންގެ އަނބިދަރިންނާއި ނުބެހޭނެ ކަމަށްވެސް އޭނާ ވިދާޅުވި އެވެ.
މީގެ އިތުރުން އަދުރޭ ވަނީ، އިދިކޮޅު ފަރާތްތަކުން ސަރުކާރުގެ ފަރާތްތަކާއި، އެ ފަރާތްތަކުގެ އަނބިދަރިންނާއި ޒާތީވުމުގައި ފޮރުވިފައި އޮތް ސަބަބުތަކެއް އޮތް ކަމަށެވެ. އަދި މިސަރުކާރުން ނިންމާފައިވާ ނިންމުންތައް ނިންމީ ބަޔަކާއި ސިއްރު އެގްރީމެންޓް ހަދައި، ބޭރުގެ ސިފައިން ރާއްޖޭގައި ބެއިތިއްބުމަށް ނޫން ކަމަށާ، އެކަން ކުރީ ދިވެހީންގެރާއްޖެ ދިވެހިންނަށް އަނބުރާ ހޯދައި ދިނުމަށްޓަކައި ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
