ރިސޯޓްތަކުގައި ފަތުރުވެރިންނަށް ”ދޭ ތަކެތި“ ރަށްރަށުގެ ހޮޓާ ތަކުގައި ނުދެވުމަކީ ބޭއިންސާފެއް: ނަޝީދު

ރިސޯޓްތަކުގައި ފަތުރުވެރިންނަށް ”ދޭ ތަކެތި“ މީހުން ދިރިއުޅޭ ރަށްރަށުގެ ރެސްޓޯރެންޓް ތަކުގައި އެމީހުންނަށް ލިބެން ނުހުރުމަކީ ވަރަށް ބޮޑު ބޭއިންސާފެއް ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ހާޓް އޮފް މާފުށި ނަމުގައި މާފުށި ބްރޭންޑް ލޯންޗުކުރުމަށް ރޭ މާފުށީގައި ބޭއްވި ރަސްމިޔާތުގައި ވާހަކަދައްކަވަމުން ނަޝީދު ވިދާޅުވީ، އެމަނިކުފާނަކީ އަބަދު ”ރަނގަޅު ވާހަކަ“ ދައްކަވާ ބޭފުޅެއް ނޫން ކަމަށެވެ.

އަޅުގަނޑަކީ އަބަދު ރަނގަޅު ވާހަކަ ދައްކާ މީހެއް ނޫން. އުނދަގޫ ވާހަކަވެސް އަޅުގަނޑުދައްކަން. ރާއްޖޭގައި ތަޢުލީމުވެސް މަނާ ދުވަސްވަރެއް ދިޔަ. އަދި މީގެން ރަށަކަށް (މީހުން ދިރިއުޅޭ ރަށްރަށަށް) އެއްވެސް ފަތުރުވެރިއެއް އައުން މަނާ ދުވަސްވަރެއްވެސް ދިޔަ.

ކުރީގެ ރައީސް މުޙައްމަދު ނަޝީދު

މިއާައެކު މިވަގުތުވެސް ރާއްޖޭގައި ކަންކަން ހަމަޖެހިފައި އޮތް ގޮތުން، ރިސޯޓްތަކުގައި ފަތުރުވެރިންނަށް ދޭ ޚިދުމަތްތައް ރަށްރަށުން ނުދެވޭކަން ފާހަގަކުރައްވައި ނަޝީދުވަނީ އެކަމާ ކަންބޮޑުވުންފާޅުކުރައްވާފައެވެ.

މިވަގުތުވެސް މި ރާއްޖޭގައި ކަންކަން ހަމަޖެހިފައިމިވާގޮތުން، ރިސޯޓްފަހަރުގައި ޓުއަރިސްޓުންނަށްދޭ ޚިދުމަތްތައް، ވިއްކާ ތަކެތި، ބޮޑެތި މިހިރަ ހޮޓާތަކުން ނުދެވޭކަން. އެއީ ބޭއިންސާފެއް. އެ ހަމަހަމަކަން ގެނައުމަށް އަޅުގަނޑުމެން ވިސްނާންޖެހޭނެ.

ކުރީގެ ރައީސް މުޙައްމަދު ނަޝީދު

ރިސޯޓްތަކުގައި ވިއްކާ ތަކެތި ރަށްރަށުގައި ވިއްކަންޖެހޭ ސަބަބެއް ކަމުގައި ނަޝީދު ފާހަގަކުރެއްވީ ރާއްޖެއަށް މިހާރު ދެ މިލިއަނަށްވުރެ ގިނަ ފަތުރުވެރިން އަންނައިރު، އެތަނުން ދެ ލައްކައެއްހާ ފަތުރުވެރިން އަންނަނީ މާފުށި ފަދަ މީހުން ދިރިއުޅޭ ރަށްރަށަށް ކަމެވެ.

ނަޝީދުގެ ވާހަކަފުޅުގައި އެތަކެއްޗަކީ ކޮން ތަކެއްޗެއްކަން ވިދާޅުވެފައި ނުވިނަމަވެސް، ރާއްޖޭގެ ރިސޯޓްތަކުގެ ރެސްޓޯރަންޓް ތަކުން ފަތުރުވެރިންނަށް ލިބޭ ތަކެތީގެ ތެރެއިން ރަށްރަށުން ލިބެން ނުހުންނަ، ނުވަތަ، ރަށްރަށުގައި ދިނުން މަނާ އެއްޗަކީ އޫރު މަހާއި ރަލެވެ.

ރާއްޖެއަކީ ސައްތައިން ސައްތަ މުސްލިމް ގައުމަކަށް ވާއިރު، ރާއްޖޭގެ ގަވާއިދު ތަކާއި ގާނޫނުތައްވެސް ބިނާވެފައިވަނީ އިސްލާމްދީނުގެ މައްޗަށް ކަމަށް ގާނޫނު އަސާސީގައިވެއެވެ. އެހެންކަމުން، ރަލާއި އޫރުމަސް މުސްލިމުންނަށް ޙަރާމް ކުރައްވާފައިވާއިރު، އެތަކެތި މީހުން ދިރިއުޅޭ ރަށްރަށުގައި ވިއްކުންވެސް ވަނީ މަނާ ކުރެވިފައެވެ.