ހުޅުމާލެ ދެކުނު ރައްޔިތުންނަށް ޚިދުމަތްކުރަން ހުރި އެންމެ ޤާބިލް ކެންޑިޑޭޓަކީ އަޅުގަނޑު: ދުންޔާ

ކުރިއަށް އޮތް ރައްޔިތުންގެ މަޖިލިސް އިންތިހާބުގައި ހުޅުމާލެ ދެކުނު ދާއިރާއަށް ވާދަކުރައްވާ ކެންޑީޑޭޓުންގެ ތެރެއިން އެދާޢިރާގެ ރައްޔިތުންނަށް ޚިދުމަތްކުރަން ހުރި އެންމެ ރަނގަޅު ކެންޑިޑޭޓަކީ އެކަމަނާކަމަށް މަޖިލިސް އިންތިހާބުގައި ހުޅުމާލެ ދެކުނު ދާއިރާއަށް ވާދަކުރައްވާ ކެންޑިޑޭޓް ދުންޔާ މައުމޫނު ވިދާޅުވެއްޖެއެވެ.

ދުންޔާ މިފަދައިން ވިދާޅުވެފައިވަނީ ދައުލަތުގެ މީޑިޔާ ޕީއެސްއެމްއިން މިހާރު ކުރިއަށް ގެންދާ މަޖިލިސް ބަހުސް 2024 ގައި ރޭ ވާހަކަ ދައްކަވަމުންނެވެ.

ރޭގެ ބަހުސްގައި ވާހަކަ ދައްކަވަމުން ދުންޔާ ވިދާޅުވީ ދިވެހިރައްޔިތުންނަށް އިޚްލާސްތެރި މަސައްކަތެއް ކޮށްދެވޭނީ މިނިވަން ކެންޑިޑޭޓުންނަށް ކަމަށާއި، މިފަހަރު އެދާއިރާއަށް އޮތް އެންމެ ރަނގަޅު ޗޮއިސްއަކީ އެކަމަނާކަމަށެވެ.

ދުންޔާ ވިދާޅުވީ އެކަމަނާއަކީ ވެސް ރާއްޖެއަށް ޑިމޮކްރަސީ އައި އިރު ޕާޓީ ސިސްޓަމަށް ތާއިދުކޮށް އޭރު ވަކާލާތުކުރި  މީހެއްކަމަށާއި ނަމަވެސް ، މިހާރު ދިވެހި ރައްޔިތުން ޕާޓީސިސްޓަމް މަތިން ފޫހިވެފައިވާ ކަމަށެވެ.

"އަޅުގަނޑު ދެކޭ ގޮތުގައި ރާއްޖެއަށް ޑިމޮކްރަސީ އައިއިރުގައި އަޅުގަނދަކީ ވެސް އޭރު  މިއަށް ވުރެ ޒުވާން އެކަމަށް ވަކާލާތު ކުރި މީހެއް އެކަމަކު ރާއްޖޭގެ ގިނަ ރައްޔިތުން މިހާރުވަނީ ޕާރޓިތައްދެކެ ފޫހިވެފައި، އަޅުގަނޑުމެން އުންމީދު ކުރިގޮތަކަށް ނޫން ޕާޓީ ނިޒާމް ދިވެހިރާއްޖެ އާއްސަ ކުރިއަށް މިދަނިކީއެއް، ސަނާކިޔުމާއި ކަރަޕްޝަނާއި އެހެނިހެން ކަންތަކުގައި ގިނަވަގުތު މިދަނީ"

ރައީސް ޔާމީނުގެ ސަރުކާރުގައި ހާރިޖީ ވަޒީރުކަންވެސް ކުރައްވާފައިވާ ދުންޔާ ވިދާޅުވިއެވެ.

ރޭގެ މި ބަހުސްގައި ދުންޔާ އިތުރަށް ވިދާޅުވީ ކުރިއަށް އޮތް ރައްޔިތުންގެ މަޖިލިސް އިންތިހާބުގައި ހުޅުމާލެ ދެކުނު ދާއިރާއަށް ކުރިމަތިލައްވާފައިވާ ކެންޑިޑޭޓުންގެ ތެރެއިން އެންމެ ރަނގަޅު ޓްރެކް ރެކޯޑެއް އޮތް ކަމަށް، އެންމެ ޤަބިލް ބޭފުޅަކީ އެކަމަނާ ކަމަށެވެ. އެގޮތުން އެކަމަނާ ވިދާޅުވީ ހާރިޖީ ވަޒީރެއްގެ ގޮތުގައި އެކަމަނާ މަސައްކަތް ކުރައްވާފައި ވާނީ ވަކި ޤައުމަކަށް އިސްކަން ދިނުމެއް ނެތި ރާއްޖޭގެ ލޮބުވެތި ރައްޔިތުންނަށް އެންމެ ބޮޑަށް ފައިދާ އާއި މަންފާ ލިބޭނެ ގޮތްތައް ބައްލަވައިގެން ކަމަށެވެ.

ދުންޔާ އިތުރަށް ވިދާޅުވީ އެކަމަނާ މަޖިލިހަށް އިންތިހާބު ކޮށްދެއްވައިފި ނަމަ ހުޅުމާލެ ދެކުނު ދާއިރާގެ ރައްޔިތުންގެ އަޑު ފިސާރި ރަނގަޅަށް މިޖިލިހުގައި އިއްވައި ދެއްވާނެކަމަށާއި އެދާއިރާގެ ކޮންމެ ރައްޔިތަކަށްވެސް އެކަމަނާ އާއި ބައްދަލުކުރެވޭނެ މަގު ފަހިކޮށްދެއްވާނެ ކަމަށެވެ.

އެކަމަނާގެ ވާހަކަފުޅު ނިންމަވާ ލެއްވީ 25 އަހަރުގެ ތަޖުރިބާ އަށާއި ، އަދި ދިވެހިރައްޔިތުންނާއި ގާތުން މަސައްކަތް ކުރައްވާފައިވާ ފަރާތެއް ޚިޔާރުކުރައްވާ ކުރިއަށްއޮތް ރައްޔިތުންގެ މަޖިލިސް އިންތިހާބުގައި އެމަނާއަށް،  ކެންޑިޑޭޓް ނަމްބަރ 3 އަށް ވޯޓްދެއްވުމަށް ހުޅުމާލެ ދެކުނު ދާއިރާގެ ރައްޔިތުންގެ ކިބައި އެދިވަޑައި ގަންނަވަމުންނެވެ.