ނައިފަރު ފަތިސް ޖަމްޢިއްޔާއިން އިސްނަގައިގެން ކުރިއަށްގެންދިޔަ "ވިޔަނަ ކޭމްޕް" ކާމިޔާބުކަމާއެކު ނިންމާލައިފި
ޅ.ނައިފަރު ފަތިސް ޖަމްޢިއްޔާއިން އިސްނަގައިގެން ނ.މާފަރުގައި ކުރިއަށްގެންދިޔަ "ވިޔަނަ ކޭމްޕް" ކާމިޔާބުކަމާއެކު ނިންމާލައިފިއެވެ.
މިފަހަރުގެ ވިޔަނަ ކޭމްޕް ކުރިއަށް ގެންގޮސްފައިވަނީ ނ.މާފަރު ސޮސައިޓީ ފޯ މާފަރު ޑިވެލޮޕްމެންޓާ ގުޅިގެން މިމަހުގެ ހަވަނަ ދުވަހުން ފެށިގެން އަށްވަނަ ދުވަހުގެ ނިޔަލަށް މާފަރުގައެވެ. މި ކޭމްޕް ކުރިއަށްގެންގޮސްފައިވަނީ 18 ބައިވެރިންނާއެކުގައެވެ. މީގެ އިތުރުން 8 ފެސިލިޓޭޓަރުންވެސް ކޭމްޕްގައި ބައިވެރިވިއެވެ.
ފަތިސް ޖަމިއްޔާއިން ބުނީ މި ކޭމްޕްގައި ބައިވެރިވި ފަރާތްތަކުގެ އިތުރުން މާފަރު ރައްޔިތުންނަށް އަމާޒުކޮށްގެންވެސް ޕްރޮގްރާމްތައް ކުރިއަށްގެންގޮސްފައިވާކަމަށެވެ. މިކޭމްޕްގައި ކުރިއަށް ގެންދިޔަ ޙަރަކާތްތަކުގެ ތެރޭގައި ދީނީ ޢިލްމީވޯކްޝޮޕާއި، ދީނީ ދަރުސްތައް، ތަރުބަވީ ސެޝަންތައް، ދަރިވަރުންނަށް އަމާޒުކޮށްގެން ކުރިއަށްގެންދިޔަ ސްޓަޑީ ކޭމްޕް ތަކާއި ސްކިލް ޑިވެލޮމްޕެންޓް ޕްރޮގްރާމްތައް، ޕްރޮފެޝަނަލް ޑިވެލޮޕްމެންޓް ސެޝަންތަކާއި ޓީމް ބިލްޑިންގ ހަރަކާތްތަކުގެ އިތުރުން ކުޅިވަރު ޙަރަކާތްތައް ހިމެނެއެވެ.
ޕްރޮގްރާމުން ތަފާތު މިޒާޖުގެ ތަފާތު ވިސްނުމުގެ މީހުން ދެނެގަތުމާއި އެމީހުންނާ އެއް މުއާމަލާތް ކުރުމުގައި އަމަލު ކުރަންޖެހޭ ގޮތްތަކުގެ އިތުރުން މުޖުތަމައު އިސްލާހު ކުރުމުގައި ފަރުދީ ޒިންމާ ފަދަ މުހިންމު ދާއިރާތަކުން ބައިވެރިންނަށް މައުލޫމާތު ފޯރުކޮށްދެވިފައިވާކަމަށް ފަތިސް ޖަމިއްޔާއިން ބުންޏެވެ. އެ ޖަމިއްޔާއިން ބުނީ ވިޔަނަ ކޭމްޕުގެ އަމާޒަކީ ދީނީ އިލްމުވެރިންނާއި ތަޖުރިބާކާރު ފެސިލިޓޭޓަރުންގެ އެހީތެރިކަމާއެކު މުޖުތަމައުއަށް ފައިދާހުރި ދީނީ އަދި ދުނިޔެވީ ލިޑަރޝިޕް ހުރި ޝަހުސިއްޔަތުތަކެއް އުފެއްދުންކަމަށެވެ.
ވިޔަނަ ކޭމްޕް އެންމެ ފުރަތަމަ ބޭއްވިފައިވަނީ 2022 ވަނަ އަހަރު އުންމީދު ޖަމްޢިއްޔާއާއި ގުޅިގެން ރ. މީދޫގައެވެ. އަދި އޭގެފަހުން 2023 ވަނަ އަހަރު ލެންޓާން ޖަމްޢިއްޔާއާއި ގުޅިގެން ރ.ހުޅުދުއްފާރުގައި ކޭމްޕް ކުރިއަށް ގެންދެވިފައިވެއެވެ. 2024 ވަނަ އަހަރު އާރުލާ ސްޕޯޓްސް އެކަޑަމީއާއި ގުޅިގެން ށ.ފޯކައިދޫގައި މިކޭމްޕް ކުރިއަށް ގެންދެވުނުއިރު، 2025 ވަނަ އަހަރު މިކޭމްޕް ކުރިއަށް ގެންދިވިފައިވާނީ ސްމައިލް ޖަމްޢިއްޔާއާއި ގުޅިގެން ރ.ކިނޮޅޮހުގައެވެ. މިއީ މިޕްރޮގްރާމް މެދުކެނޑުމެއް ނެތި ކުރިއަށް ގެންދާތާ 5 ވަނަ އަހަރެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
