ސިޔާސީ މަގާމުތައް އިތުރުކުރުން ހުއްޓުވަން ގޮވާލައި މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފި

ސިޔާސީ މަގާމުތަކަށް މީހުން އައްޔަނުކުރުން ހުއްޓުވުމަށާއި ސަރުކާރު ކުންފުނިތަކުގެ އާދައިގެ މަގާމުތަކުގައި ތިބި މުވައްޒަފުން ހައްދެއް ނެތި ވަކި ކުރަމުންދާ ކަމަށް ބުނެ އިދިކޮޅު އެމްޑީޕީން ރައްޔިތުންގެ މަޖިލީހުގެ މިއަދުގެ ޖަލްސާއަށް ހުށަހެޅި ކުއްލި މައްސަލަ ބޭރުކޮށްލައިފިއެވެ.

މި މައްސަލަ ހުށަހެޅުއްވީ ކެންދޫ ދާއިރާގެ މެންބަރު މައުރޫފް ޒާކިރެވެ.

އެ ކުއްލި މައްސަލަ މަޖިލިސް ތަޅުމުން ބަލައިގަނެ ބަހުސްކުރަން ނެގި ވޯޓުގައި މައްސަލަ ބަލައިގަތުމަށް ވޯޓު ދެއްވީ އެންމެ 12 މެންބަރުންނެވެ. އެއީ އެމްޑީޕީ މެންބަރުންނެވެ. އެ މައްސަލަ ބަލައިނުގަތުމަށް 57 މެންބަރުން ވަނީ ވޯޓުދެއްވާފައެވެ.

މައުރޫފް ހުށަހެޅި މައްސަލައިގައިވަނީ، ދައުލަތުގެ ބަޖެޓު ފައިނޭންސް ކުރުމަށް ބޭނުންވާ ފައިސާ ހޯދުމުގައި ދަތިތަކެއް ދިމާވެފައިވާތީ، ސަރުކާރުގެ ރިކަރަންޓް ޚަރަދު ކުޑަކުރުމަށް ސިޔާސީ މަގާމުތަކުގެ އަދަދު މަދުކޮށް، ގިނަ ފިޔަވަޅުތަކެއް އަޅުއްވަން ރައީސް ޑރ. މުހައްމަދު މުއިއްޒު ނިންމަވާފައިވާކަން ފާހަގަކުރައްވާފައެވެ.

ނަމަވެސް، ސަރުކާރުން ސިޔާސީ މަގާމުތައް ގިނަ ކުރަމުންދާ ކަމަށާއި ސަރުކާރު ކުންފުނިތަކަށްވެސް ގިނަ މުވައްޒަފުން ނަގަމުންދާ ކަމަށެވެ.

އެގޮތުން، ސަރުކާރުގެ ސިޔާސަތަކީ ސިޔާސީ މަގާމުތައް 700 އަށް ވުރެ ދަށުގައި ހިފެހެއްޓުން ކަމަށްވާއިރު، އެ އަދަދު މިހާރު 2،000 އަށްވުރެ އިތުރު ކަމަށް ބައެއް މީހުން ފާހަގަކުރާ ކަމަށް އެ މައްސަލައިގައި ބުނެފައިވެއެވެ. އަދި، ސިޔާސީ މަގާމުތަކަށް މީހުން އައްޔަނުކުރުމަށް ރައީސަށް ލިބިދީފައިވާ ބާރު އޭގެ ނާޖާއިޒު ގޮތުގައި ހިއްޕަވަމުންދާ ކަމަށް ވަނީ ތުހުމަތުކޮށްފައެވެ.

އަދި އޭގެ އިތުރުން. ސަރުކާރު ކުންފުނިތަކުގެ އާދައިގެ ވަޒީފާތަކުގައި މަސައްކަތް ކުރާ މުވައްޒަފުން ވަޒީފާއިން ވަކިކުރަމުންދާ ކަމަށްވެސް މި މައްސަލައިގައި ބުނެފައިވެ އެވެ.

އެގޮތުން، އާރްޑީސީ އިން ވެސް އެތައް ބަޔަކު ވަޒީފާއިން ވަކިކޮށްފައިވާ ކަމަށާ، ވަކި ސިޔާސީ ޕާޓީއަކަށް ތާއިދު ކުރުމުން ވެސް ފާއިތުވި ދެމަސް ދުވަހުގެ ތެރޭގައި މީހުން ވަޒީފާއިން ވަކިކޮށްފައިވާ ކަމަށް މައުރޫފް ވިދާޅުވިއެވެ. އަދި މިފްކޯ އިން ވެސް ފާއިތުވި ހަފްތާގައި އެތައް ބަޔަކު ވަޒީފާ އިން ވަކިކޮށްފައިވާ ކަމަށް އޭނާ ވިދާޅުވިއެވެ.