އަހާގެ 8 ވަނަ ފޯރަމް މިރޭ؛ 3 ވަޒީރަކާއި ސުވާލުކުރެވޭނެ

ސަރުކާރުގެ 3 ވަޒީރަކު ބައިވެރިވެވަޑައިގަންނަވާ "އަހާ" ފޯރަމްގެ އަށް ވަނަ ބައި މިރޭ ސަލްޓަން ޕާކުގައި ބާއްވާނެ ކަމަށް ރައީސުލްޖުމްހޫރިއްޔާގެ އޮފީހުން ހާމަކޮށްފިއެވެ.

މިރޭ 21:00 ގައި ސަލްޓަން ޕާކުގެ އިވެންޓް އޭރިއާގައި ފެށުމަށް ހަމަޖެހިފައިވާ މި ފޯރަމް ދެ ގަޑިއިރަށް ކުރިއަށް ގެންދާނެއެވެ. މި ފޯރަމްގައި ބައިވެރިވެވަޑައިގަންނަވަނީ އިޤުތިޞާދީ ތަރައްޤީއާއި ދަތުރުފަތުރާ ވިޔަފާރިއާ ބެހޭ ވަޒީރު މުޙައްމަދު ސަޢީދާއި، ދިފާޢީ އަދި ވަތަނީ ޚިދުމަތާ ބެހޭ ވަޒީރު ޙަސަން ރަޝީދާއި، ބަންޑާރަނައިބު އަޙްމަދު އުޝާމެވެ.

ފޯރަމް ކުރިއަށްދާ ތަނަށް ގޮސް ސީދާ ސުވާލު ހުށަހެޅުމުގެ އިތުރުން ފޭސްބުކް، އެކްސް އަދި ޕީއެސްއެމް އެއަރ އެޕް މެދުވެރިކޮށް އޮންލައިންކޮށް ވެސް ވަޒީރުންނާ ސުވާލުކުރެވޭނެއެވެ.

ރާއްޖޭގެ ކޮންމެ ރަށެއްގައި ހުރި މީހަކަށް ވެސް މި ގޮތަށް ބައިވެރިވެ އެ ވަޒީރެއްގެ ދާއިރާއާ ގުޅުން ހުރި ކޮންމެ ސުވާލެއް ހުށަހެޅޭނެއެވެ.

ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ (ޕީއެސްއެމް) ގުޅިގެން ބާއްވާ "އަހާ" ސިލްސިލާ ފޯރަމްތައް ފެށީ 2024 ވަނަ އަހަރުގެ ޖެނުއަރީގައެވެ. ސަރުކާރުގެ ވުޒާރާތަކާއި އިދާރާތަކުން ކުރަމުންދާ މަސައްކަތްތައް ތަފްޞީލުކޮށް ރައްޔިތުންނަށް ހާމަކޮށްދީ ރައްޔިތުންގެ ކަންބޮޑުވުންތަކަށް ޖަވާބު ހޯދައިދިނުމަކީ މި ފޯރަމްގެ މައިގަނޑު މަޤުޞަދެވެ.

މިހާތަނަށް މި ސިލްސިލާގެ 7 ފޯރަމެއް ވަނީ ބާއްވައިފައެވެ.