ސައިބަކްރައިމް ހުއްޓުވަން ހުށަހަޅާފައިވަނީ މުހިންމު އިސްލާހުތަކެއް: ނާޒިލް

ސައިބަކްރައިމް ކުށްތައް ހުއްޓުވަން ޖިނާއީ މައްސަލަތަކުގައި ގާނޫނީ އެހީތެރިކަން ބަދަލުކުރުމުގެ ގާނޫނަށް ސަރުކާރުގެ ފަރާތުން ހުށަހެޅި އިސްލާހުތަކަކީ މިވަގުތަށް މުހިންމު އިސްލާހުތަކެއް ކަމަށް އިދިކޮޅު އެމްޑީޕީގެ ޕީޖީ ލީޑަރ އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، ޖިނާއީ މައްސަލަތަކުގައި ގާނޫނީ އެހީތެރިކަން ބަދަލުކުރުމުގެ ގާނޫނަށް މި އިސްލާހު ހުށަހެޅުއްވީ ސަރުކާރުގެ ފަރާތުން ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު އެވެ.

މި ބިލަށް ބަހުސް ކުރައްވަމުން ނާޒިލް ވިދާޅުވީ، ގާނޫނުތަކަށް ބަދަލު ގެނެވެނީ ތަންފީޒީ އިދާރާތަކަށް ދިމާވާ މައްސަލަތަކާއު ގުޅިގެން ކަމަށެވެ.

އަދި ކޮންޕިޔުޓަރ ނެޓްވޯކްތައް މެދުވެރިކޮށް ހިންގާ އެކިއެކި ކުށްތަކަށް ހައްލު ނުގެނެވި ތަންފީޒީ އިދާރާތަކަށް އެފަދަ މައްސަލަތައް ބެލުމަށާއި ތަހުގީގު ކުރުމަށް ބޭނުންވާ މައުލޫމާތު ހޯދުމުގައި ގާނޫނީ އެކިއެކި ހުރަސް ހުންނަކަން ފާއިތުވި ދުވަސް ތަކުގައި ފުލުހުންވެސް ފާހަގަކޮށްފައިވާ ކަމަށާ، އެހެން ކަމުން އެ ދުވަސް ވަރަކާއި ގުޅިގެން ގާނޫނަށް އިސްލާހުތައް ގެންނަން ޖެހޭ ކަމަށް ނާޒިލް ވިދާޅުވިއެވެ.

."މިއަދު މި އިސްލާހު ގެނެވުނު ކަމުގައިވިޔަސް އަދިވެސް އިތުރު އިސްލާހުތަކެއް މި ބިލަށް އައުމަކީ އެ ދުވަސްވަރަކާ ގުޅިގެން އަނެއްކާވެސް ކުރަންޖެހިދާނެ ކަމެއް. އަޅުގަނޑު ދަންނަވާނީ މިއަދު ބިލަށް އައިސްފައި އޮތް އިސްލާހަކީ މިހާރުން މިހާރަށް މުހިންމު އިސްލާހެއް،"

އެމްޑީޕީގެ ޕީޖީ ލީޑަރ އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް

ނާޒިލް އިތުރަށް ވިދާޅުވީ ރަނގަޅު ގާނޫނުތަކެއް ހެދި، އޭގެ މަންފާ ރަނގަޅު ގޮތުގައި ރައްޔިތުންނަށް ލިބިގެން ދިޔުމަކީ އެންމެންވެސް ބޭނުންވާނެ ގޮތް ކަމަށެވެ. އަދި ސަރުކާރުގެ ފަރާތުން ހުށަހެޅި މި ބިލާއި މީގެ ކުރިން ހުށަހެޅުނު ދެބިލަކީވެސް މުހިންމު ދެ ބިލުކަން އޭނާ ފާހަގަކުރެއްވިއެވެ. އެހެންކަމުން، ބިލުތައް ފާސްކުރުމަށް މަޖިލީހުންވެސް އެއްބާރުލުން ދެއްވުމަށް އޭނާ އެދިލެއްވިއެވެ.