އެޗްޑީސީން ހަތް ރަށެއްގައި އައުޓްޑޯ ޖިމް ގާއިމުކޮށް ނިންމައިފި

ނެޝަނަލް ފިޓްނަސް ޕްލޭނުގެ ދަށުން ރާއްޖޭގެ އަތޮޅުތެރޭގައި ބެހެއްޓުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށް ގެންދާ އައުޓްޑޯ ޖިމް މަޝްރޫޢުގެ ތެރެއިން ހަތް ރަށެއްގެ މަސައްކަތް ފުރިހަމަކޮށް ނިންމައިފިއެވެ.

މީހުން ދިރިއުޅޭ ކޮންމެ ރަށެއްގައި އައުޓްޑޯ ޖިމެއް ގާއިމުކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. އެ ވަޢުދުފުޅު ފުއްދެވުމަށް އެހީތެރިވެ ދިނުމުގެ ގޮތުން އެޗްޑީސީން ކުރަމުން ގެންދާ މި މަސައްކަތުގައި ޒަމާނީ ފެންވަރު ރަނގަޅު އިކުއިޕްމަންޓް ބޭނުންކުރާ ކަމަށް އެ ކުންފުނިން ބުނެފައިވެއެވެ.

މިހާތަނަށް ޖިމް ގާއިމުކޮށް ނިމިފައިވާ ރަށްތަކަކީ؛

އއ. ފެރިދޫ

އއ. އުކުޅަސް

އދ. ދިގުރަށް

އދ. ފެންފުށި

އދ. މާމިގިލި

އދ. މަންދޫ

ބ. ގޮއިދޫ

ދުޅަހެޔޮ މުޖުތަމަޢެއް ބިނާކުރުމާއި ކަސްރަތު ކުރުމުގެ ޝައުގުވެރިކަން އިތުރުކުރުމަކީ މި މަޝްރޫޢުގެ މައިގަނޑު މަޤުޞަދެވެ.

މި ރަށްތަކުގައި އައުޓްޑޯ ޖިމްތައް ޤާއިމުކުރުމުގެ މަސައްކަތް، ކުޅިވަރާ ބެހޭ ވުޒާރާއިން އެޗްޑީސީއާ ހަވާލުކޮށް، އެއްބަސްވުމުގައި ސޮއިކުރެވިފައިވަނީ މިދިޔަ އަހަރުގެ އޮގަސްޓު މަހުއެވެ. މިހާތަނަށް މަސައްކަތް ނިމިފައިވާ ރަށްތަކުގެ ޖިމްތައް، އެ ރަށެއްގެ ކައުންސިލާ ރަސްމީކޮށް ހަވާލުކުރުމަށްޓަކައި ކުރަންޖެހޭ ތައްޔާރީތައް މިހާރު ދަނީ ކުރަމުންނެވެ.