ޔަހޫދީން ރަފާހް އަށް ދިނުމަށް ރާވަމުންދާ ހަމަލާ ހުއްޓުވޭނީ ހަމައެކަނި އެމެރިކާއަށް: މަހްމޫދު އައްބާސް

ހައްދުފަހަނަ އަޅާފައިވާ ޔަހޫދީން ފަލަސްތީންގެ ޣައްޒާގެ ރަފާހް އަށް ދިނުމަށް ރާވަމުންދާ ހަމަލާތައް ހުއްޓުވޭނީ ހަމައެކަނި އެމެރިކާއަށް ކަމަށް ފަލަސްތީނުގެ ރައީސް މަހުމޫދު އައްބާސް ވިދާޅުވެއްޖެއެވެ.

ސައުދީ އަރަބިއާ ގެ ވެރިރަށް ރިޔާދުގައި ގައި ކުރިއަށް ދިޔަ ވޯލްޑް އިކޮނޮމިކް ފޯރަމް ގައި ވާހަކަފުޅު ދައްކަވަމުން އައްބާސް ވިދާޅުވީ، ކުރިއަށް އޮތް ދުވަސްތަކުގައި ޔަހޫދީންގެ ފައުޖުން ރަފާހް އަށް ހަމަލާދޭނެ ކަމަށް ލަފާ ކުރައްވާ ކަމަށާއި، މިކަމުގެ ސަބަބުން އެތަނުގައި ދިރިއުޅެމުންދާ ފަލަސްތީނުގެ ރައްޔިތުންނަށް އަމިއްލަ ބިން ދޫކޮށްދާން މަޖުބޫރު ވާނެ ކަމަށެވެ.

"ރަފާހަށް ދިނުމަށް ރާވަމުންދާ ހަމަލާ ކުރިއަށް ނުގެންދިޔުމަށް އިސްރާއީލު ކަުއިރި އެދުމަށް އެމެރިކާއަށް ގޮވާލަން. އެމެރިކާއަކީ އިސްރާއީލުން މި ޖަރީމާ ހިންގުން ހުއްޓުވޭނެ ހަމައެކަނި ޤައުމު"

މަހުމޫދު އައްބާސް ވިދާޅުވިއެވެ.

މީގެ އިތުރުންވެސް އައްބާސް ވަނީ ފަލަސްތީނުގެ އާއްމުން ގެދޮރު ދޫކޮށް އުރުދުން އާއި މިސްރަށް ބަދަލު ކުރުމަށް ދެކޮޅުހައްދަވާ ކަމަށާއި، އެމީހުން އެފަދައިން ބަދަލުވެއްޖެ ނަމަ ޔަހޫދީން މިހާރު ޣައްޒާގައި ކުރިއަށް ގެންދާ ގަތުލުއާއްމު ނިންމާލައި، ފަލަސްތީނުގެ އާބާދީ ހުޅަނގު އައްސޭރިން ނެރެ އުރުދުންއަށް ގަދަކަމުން ވައްދަން މަސައްކަތް ކުރާނެ ކަމަށް ވެސް ވިދާޅުވިއެވެ.

އައްބާސް މިފަދައިން ވިދާޅުވެފައިވާއިރު، ޔަހޫދީންގެ ފައުޖުން ޣައްޒާ އަށް ހަމަލާދޭނެ ކަމަށް ބުނަމުން އަންނަތާ މިހާރު ހަފްތާތަކެއް ވަނީ ފާއިތުވެފައެވެ. ހަމާސް ޖަމާއަތް ނައްތާލުމަކީ އެމީހުންގެ އަމާޒުކަމަށް ބުނަމުން އަންނައިރު، މިދިޔަ ހަފްތާގައި ޔަހޫދީން ރަފާހް އަށް ދެމުން އަންނަ ވައިގެ ހަމަލާތައް ވަނީ ވަރުގަދަ ކޮށްފައެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީން ޣައްޒާއަށް މެދުކެނޑުމެއްނެތި ހަމަލާ ދެމުންއަންނައިރު، އަނިޔާވެރިކަން ހައްދުފަހަނަ އަޅާގޮސް، އިސްރާއީލުގެ ނިރުބަވެރި ސިފައިން ދެމުންގެންދާ ހަމަލާތަކުގައި މިހާތަނަށް  34,454 މީހުން ޝަހީދުވެފައިވާއިރު، 77,575 މީހަކު ވަނީ ޒަހަމްވެފައެވެ.

އދ އާއި އެނޫންވެސް އިންސާނީ ހައްގުތަކަށް މަސައްކަތް ކުރާ ޖަމިއްޔާތަކާއި، ގައުމުތަކުން މި ގަތުލުއާއްމު ހުއްޓާލުމަށް އިސްރާއީލަށް ގޮވާލަމުން އައި ނަމަވެސް މިހާތަނަށް އިސްރާއީލުން މި ކަންކަމަށް އިޖާބަދީފައެއް ނުވެއެވެ. މި ގަތުލުއާއްމު ހުއްޓާލުމަށް ގޮވާލާ ގަރާރެއް ދާދި ފަހުން އދ ގެ ސަލާމަތާއި ބެހޭ މަޖިލީހުން ވެސް ފާސްކޮށްފައިވާއިރު، މި ގަރާރަށް ވެސް ޔަހޫދީން ބޯލަބާފައެއް ނުވެއެވެ.