ކުރިއަށް އޮތް ދުވަސްތަކުގައި ރާއްޖެއާއި ޕާކިސްތާނުގެ ގުޅުން އިތުރަށް ބަދަހިވާނެކަމަށް ޔަގީންކުރަން: ރައީސް މުޢިއްޒު
ކުރިއަށް އޮތް ދުވަސްތަކުގައި ރާއްޖެއާއި ޕާކިސްތާނުގެ ގުޅުން އިތުރަށް ބަދަހިވެގެންދާނެ ކަމަށް ޔަގީންކުރައްވާ ކަމަށް ރައީސުލްޖުމްހޫރިއްޔާ މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ޕާކިސްތާނުގެ 78 ވަނަ މިނިވަން ދުވަހާ ގުޅިގެން އެ ޤައުމުގެ ރައީސް އަސިފް އަލީ ޒަރްދާރީއާއި ބޮޑުވަޒީރު ޝަހްބާޒް ޝަރީފަށް މަރުޙަބާއާއި ހެޔޮ އެދުންތައް ފޮނުއްވައި އެކްސްގައި ކުރެއްވި ޕޯސްޓެއްގައެވެ.
ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ޕާކިސްތާނުގެ މިނިވަން ދުވަހުގެ އުފާވެރި މުނާސަބަތުގައި އެ ޤައުމުގެ ރައީސާއި ބޮޑުވަޒީރަށާއި އަދި ޕާކިސްތާނުގެ އެންމެހާ އަޚުންނާއި އުޚުތުންނަށް އެންމެ ހޫނު މަރުޙަބާއާއި ހެޔޮ އެދުންތައް ރައްދުކުރައްވާ ކަމަށެވެ.
މީގެ އިތުރުން ރައީސް މުޢިއްޒު ވަނީ ޕާކިސްތާނަކީ ސުލްޙަވެރިކަމާއި، ކުރިއެރުމާއި އަދި އެއްބައިވަންތަކަމުގައި ކުރިއަރަމުންދާ ޤައުމަކަށް ވުމަށް އެދިވަޑައިގަންނަވާ ކަމަށްވެސް ވިދާޅުވެފައެވެ.
އަދި ކުރިއަށް އޮތް ދުވަސްތަކުގައި ރާއްޖެއާއި ޕާކިސްތާނުގެ ގުޅުން އިތުރަށް ބަދަހިވެގެންދާނެ ކަމަށް ޔަގީންކުރައްވާ ކަމަށްވެސް ވިދާޅުވެފައިވެއެވެ.
1947 ވަނަ އަހަރު ޕާކިސްތާނު މިނިވަންކަން އިއުލާންކޮށް މިނިވަން މުސްތަގިއްލު ދައުލަތަކަށްވީ، އިންޑިއާ ބައްރުގައި އިނގިރޭސީން ކުރަމުންދިޔަ ވެރިކަން ނިމުމަކަށް އައުމާއެކު، މިނިވަންވުމަށް ފެށި "ޕާކިސްތާން މޫވްމަންޓް" ހަރަކާތުގެ ނަތީޖާއެއްގެގޮތުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
