ފިނޭންސް މިނިސްޓަރު ކަމަށް ޙަސަން ޒަރީރު އައްޔަނުކުރައްވައިފި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިނިސްޓާ އޮފް ފިނޭންސް އެންޑް ޕަބްލިކް އެންޓާޕްރައިޒަސްގެ މަގާމަށް، ޙަސަން ޒަރީރު މިއަދު ޢައްޔަން ކުރައްވައިފި އެވެ.
ޒަރީރަށް މަގާމުގެ ފަތްކޮޅު ދެއްވުމަށް ބޭއްވެވި ރަސްމިއްޔާތު އޮތީ މިއަދު ރައީސުލްޖުމްހޫރިއްޔާގެ އޮފީހުގަ އެވެ.
މި ރަސްމިއްޔާތުގައި ވަޒީރުންގެ މަޖިލީހުގެ މެންބަރުކަމުގެ ހުވައި ލައިދެއްވީ ސުޕްރީމް ކޯޓުގެ ފަނޑިޔާރު މުހައްމަދު ސަލީމް އެވެ. ހުވައި ކުރެއްވުމަށްފަހު، ވަޒީރުންގެ މަޖިލީހުގެ މެންބަރުންގެ ހުވައިގެ އިގްރާރުގައި ވަޒީރު ވަނީ ސޮއިކުރައްވާފަ އެވެ.
ޒަރީރު މިހާތަނަށް ހުންނެވީ ކޮމިޝަނަރު ޖެނެރަލް އޮފް ޓެކްސޭޝަންގެ މަގާމުގަ އެވެ. އޭގެ ކުރީން ޑެޕިއުޓީ ކޮމިޝަނަރުގެ މަގާމުވެސް ޒަރީރު ވަނީ ފުރުއްވާފަ އެވެ.
ފިނޭންސް މިނިސްޓަރު ކަމަށް ޒަރީރު އައްޔަނުކުރެއްވީ އެ މަގާމުގައި ކުރީން ހުންނެވި މޫސާ ޒަމީރު މިއަދު އިސްތިއުފާ ދެއްވުމާއި ގުޅިގެންނެވެ. ޒަމީރު އިސްތިއުފާ ދެއްވަން އުޅުއްވާ ކަމުގެ ވާހަކަ ދެކެވޭތާ ދުވަސްތަކެއް ވެއްޖެ އެވެ.
ޒަމީރު އިސްތިއުފާ ދެއްވީ ސިއްހީ ސަބަބުތަކަކާއި ގުޅިގެން ކަމަށް އެނގިފައިވެ އެވެ. ނަމަވެސް އެކަން ކަމާބެހޭ އެއްވެސް އިދާރާއަކުން ޔަގީންކޮށެއް ނުދެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
