އުމްރާނީ ތަރައްގީގެ މަޝްރޫއުތައް އަވަސްކުރުމަށްޓަކައި އާރުޑީސީއަށް ގިނަ އަދަދެއްގެ މަޝިނަރީ ގެނެސްފި

ރާއްޖޭގެ އުމްރާނީ ތަރައްގީގެ މަޝްރޫއުތައް އަވަސްކުރުމަށްޓަކައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ޗައިނާގެ (އެކް.ސީ.އެމް.ޖީ) ކުންފުންޏާއެކު ވެފައިވާ އެއްބަސްވުމުގެ ދަށުން، ރާއްޖެއަށް ބޭނުންވާ ބޮޑެތި މެޝިނަރީތައް މިއަދު ރާއްޖެ ގެނައިސް އާރްޑިސީ އާއި ހަވާލުކޮށްފިއެވެ.

މި ވެހިކަލްތައް ހަވާލުކޮށްފައިވަނީ މިއަދު އާރްޑީސީން ތިލަފުށީގައި ބޭއްވި ހާއްސަ ރަސްމިއްޔާތެއްގައެވެ.

އެ ގޮތުން، މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ހާއްސަ އިސްނެންގެވުމުގެ ދަށުން، ރަށްރަށުގެ މަގު ހެދުމުގެ މަޝްރޫއުތަކަށް ދިމާވެފައިވާ މެޝިނަރީގެ ދަތިކަން ހައްލުކުރުމަށް ކުރިއަށްގެންދާ މުހިންމު މަސައްކަތެކެވެ.

މި އެއްބަސްވުމުގެ ދަށުން ޖުމްލަ 230 ޔުނިޓުގެ ހެވީ މެޝިނަރީ ރާއްޖެއަށް ގެނައުމަށް ވަނީ ހަމަޖެހިފައެވެ. މީގެ ތެރޭގައި މަގު ހެދުމުގެ މަސައްކަތްތަކަށް އެންމެ މުހިންމު އެއް ސާމާނު ކަމަށްވާ އެސްފަލްޓް މެޝިނަރީތައް ވެސް ހިމެނެއެވެ. މިއީ ރާއްޖޭގެ ތާރީޚުގައި ވެސް އުމްރާނީ ތަރައްގީގެ މަސައްކަތްތަކަށް އެއްފަހަރާ މިހާ ގިނަ އަދަދެއްގެ މެޝިނަރީ ގެނައި ފުރަތަމަ ފަހަރެވެ.

މެޝިނަރީތައް ގެނައުމުގެ އިތުރުން، މި ތަކެތި މަރާމާތުކޮށް ބެލެހެއްޓުމަށްޓަކައި ޚާއްސަ ސާވިސް ސެންޓަރަކާއި ސްޕެއާ ޕާޓްސް ހަބެއް ރާއްޖޭގައި ވަނީ ގާއިމްކޮށްފައެވެ. މި ހަބް ގާއިމުކުރުމުން މެޝިނަރީއަކަށް މައްސަލައެއް ދިމާވެގެން މަސައްކަތް ހުއްޓިފައި އޮންނަންޖެހޭ ވަގުތު މަދުވެ، މަޝްރޫއުތައް މެދުނުކެނޑި ކުރިއަށް ގެންދިއުމަށް މަގުފަހިވާނެއެވެ.

މި ތަކެތި ލިބުމުން ކުއްޔަށް މެޝިނަރީ ހޯދުމަށް ދައުލަތުން ކުރަންޖެހޭ ޚަރަދު ވަރަށް ބޮޑަށް ކުޑަވެގެންދާނެ ކަމަށް ލަފާކުރެވެއެވެ. އަދި ގުޅީފަޅާއި ގިރާވަރުފަޅު ފަދަ ބޮޑެތި ސަރަހައްދުތަކުގެ މަގު ހެދުމާއި އެހެނިހެން އުމްރާނީ މަސައްކަތްތައް އަވަސްކުރުމަށް މި މެޝިނަރީތައް ބޭނުންކުރާނެއެވެ.

މި މަޝްރޫއުގެ ސަބަބުން ރާއްޖޭގެ އެކި ކަންކޮޅުތަކުގައި ކުރިއަށްދާ މަގު ހެދުމުގެ މަޝްރޫއުތަކަށް ދިމާވެފައިވާ ލޮޖިސްޓިކަލް ގޮންޖެހުންތަކަށް ދާއިމީ ހައްލެއް ލިބިގެންދާނެއެވެ. މިއީ ރާއްޖޭގެ އުމްރާނީ ދާއިރާ ޒަމާނީކޮށް، ސަރުކާރުގެ ތަރައްގީގެ ވަައުދުތައް ފުއްދުމަށް އެޅުނު މުހިންމު ފިޔަވަޅެއްގެ ގޮތުގައި އާރްޑީސީން ފާހަގަކުރެއެވެ.