މަންފާ އީދު އުފާ: މަދަހަ މުބާރާތާއެކު ފެރިދޫ ދަރިވަރުންނަށް ބޮޑު ފުރުސަތެއް

މަންފާ އިން މި އަހަރުގެ ބޮޑު އީދު ފާހަގަކުރުމަށް އއ. ފެރިދޫގައި ކުރިއަށް ގެންދިޔަ ހަރަކާތްތައް މަދަހަ މުބާރާތާ އެކު ކާމިޔާބު ކަމާއެކު ނިންމާލައިފި އެވެ.

ފެރިދޫ ކައުންސިލް އިދާރާގެ ހޯލުގައި ކުރިއަށް ދިޔަ މަދަހަ މުބާރާތުގައި ފެރިދޫއަށް ނިސްބަތްވާ ގިނަ ދަރިވަރުންތަކެއް ވަނީ މަދަހަ ހުށައަޅައިދީފަ އެވެ. 15 އަހަރުން ދަށުގެ ދަރިވަރުންނަށް ޚާއްސަކޮށްގެން ބޭއްވި މި މުބާރާތުގައި ދަރިވަރުން ވަނީ ތަފާތު ރީތި މަދަހަތަކެއް ހުށައަޅައިދީފަ އެވެ.

ދަރިވަރުންގެ މަދަހަތަކަށް އިންސާފުކޮށް ދެއްވީ މަދަހަ ކިޔުމުގައި ދިވެހީންގެ ތެރޭގައި ވަރަށް ބޮޑު މަޝްހޫރު ކަމެއް ހޯދާފައިވާ އަދި މިފަދަ މުބާރާތްތަކުގައި އިސް ފަނޑިޔާރެއްގެ ގޮތުން ވަރަށް ގިނައިން ބައިވެރިވެފައިވާ އަލްއަޚް އިބްރާހިމް ރަމީޒު (އިބޭ) އެވެ.

އީދުގެ ހަރަކާތްތައް ނިންމުން ފާހަގަކުރުމަށް ބޭއްވި ހަފްލާގައި ވަނީ މަދަހަ މުބާރާތުން ވަނަވަނައަށް އައި ދަރިވަރުންނަށް އިނާމް ދީފަ އެވެ.

މުބާރާތުގެ ތިންވަނަ ބައިވެރިޔާއަށް 1,000 ރުފިޔާގެ ފައިސާއާ ޓްރޮފީ އަދި ހަނދާނީ ލިޔުން ދީފައިވެ އެވެ. ދެވަނަ އަށް އައި ބައިވެރިޔާއަށް 1,500 ރުފިޔާގެ ފައިސާއާ ޓްރޮފީ އަދި ހަނދާނީ ލިޔުން ދީފައިވެ އެވެ. އެއްވަނަ ބައިވެރިޔާއަށް 2,500 ރުފިޔާގެ ފައިސާއާ ޓްރޮފީ އަދި ހަނދާނީ ލިޔުން ދީފައިވެ އެވެ.

މީގެ އިތުރުން މުބާރާތުގައި ބައިވެރިވި ހުރިހާ ދަރިވަރުންނަށް ހަނދާނީ ލިޔުމާއި ހަދިޔާ ދީފައިވެ އެވެ.

މި މުބާރާތާއެކު ދަރިވަރުންނަށް ވަނީ ބޮޑު ފުރުސަތެއް ފަހިވެފަ އެވެ. އެގޮތުން ކުރިއަށް އޮތްތާ އެ ރަށުގައި މަދަހަ މުބާރާތެއް ވަރަށް ބޮޑުކޮށް ކުރިއަށް ގެންދަން ނިންމާ އެކަން ވަނީ އިއުލާނުކޮށްފަ އެވެ. އަދި މަދަހަ މުބާރާތްތަކުގައި ދަރިވަރުން ބައިވެރިވާއިރު ވިސްނާލަން ޖެހޭ މުހިންމު ކަންކަން އެ ދަރިވަރުންނަށް އިބްރާހިމް ރަމީޒު ވަނީ ވިދާޅުވެ ދެއްވާފަ އެވެ.

މަންފާ އިން މި ފަހަރުގެ ބޮޑު އީދު ރަސްމީކޮށް ފާހަގަކުރީ އއ. ފެރިދޫގަ އެވެ. އެންމެ ހާއްސަ ކަމަކަށް އޮތީ އީދު ދުވަހުގެ ހަވީރު އޮތް ކުޑަކުދީންގެ ހަވީރެވެ. އެއީ މިހާތަނަށް އެ ރަށުގައި ބޭއްވި އެފަދަ އެންމެ ކުލަގަދަ ހަވީރެވެ.

ފެރިދޫގައި ބޮޑު އީދު ނަމާދު އިމާމުވެ ކުރެއްވީ އަލްއަޚް އަލީ ރަމީޒެވެ. ފެރިދޫ އިން މަންފާ ޓީމަށް ވަނީ ހޫނު މަރުހަބާއެއް ކިޔާފަ އެވެ. އަދި ކުރިއަށް އޮތް ދުވަސްތަކުގައި އެ ރަށުގައި މަންފާގެ ދީނީ އެކި ހަރަކާތްތައް ހިންގުމަށް ކައުންސިލާ އެކު ވަނީ މަޝްވަރާ ކޮށްފަ އެވެ.