ފަހްމީގެ ޝުކުރު ރައީސް މުޢިއްޒުއަށް
ލިޔުންތެރިޔާ
އަހުމަދު ހަމީދު އާދަމް
ސްޓެލްކޯގެ ކުރީގެ މެނޭޖިން ޑިރެކްޓަރު ހުސައިން ފަހްމީ, ރައީސުލްޖުމްހޫރިއްޔާ ޑރ. މުހައްމަދު މުޢިއްޒަށް ޝުކުރު އަދާ ކުރައްވައިފި އެވެ.
ސްޓެލްކޯގެ އެމްޑީގެ މަގާމުން ފަހްމީ ވަކިކުރެއްވީ މިއަދު އެވެ. ޕީސީބީން އެކަން އިއުލާނު ކުރުމާއެކު ފަހްމީ ވަނީ ރައީސަށް ޝުކުރު އަދާކުރައްވާ ޕޯސްޓެއް ކުރައްވާފަ އެވެ. ސްޓެލްކޯގެ އެކި މަޤާމުތަކުގައި މިދިޔަ 27 އަހަރު އެ ކުންފުންޏަށް ހިދުމަތް ކޮށްފައިވާ ފަހްމީ ވަނީ ސްޓެލްކޯގެ މެނޭޖިން ޑިރެކްޓަރުގެ މަގާމު ހަވާލު ކުރައްވާ ކުންފުނި ހިންގެވުމަށް ދެއްވި ފުރުސަތަށް ޝުކުރު އަދާކުރައްވާފަ އެވެ.
ފަހްމީގެ ޕޯސްޓްގައި ވަނީ ސްޓެލްކޯގެ ކާމިޔާބީ އަކީ ވެރީންނާއި މުވައްޒިފުންކަން ފާހަގަ ކުރައްވާ ހުރިހާ މުވައްޒިފުންނަށް ޝުކުރު އަދާކުރައްވާފަ އެވެ. އަދި އެ ކުންފުންޏަށް ކުރިއެރުމާއި ކާމިޔާބީއަށް އެދޭ ކަމުގައި ވިދާޅުވި އެވެ.
ސްޓެލްކޯގެ އެމްޑީގެ މަގާމުން ފަހްމީ ވަކިކުރެއްވީ އެ މަގާމަށް އެހެން ބޭފުޅަކު ހަމަޖައްސަވަން ނިންމާފައިވާ ކަމަށް ވާާހަކަ ދެކެވޭ އެތައް ދުވަހެއް ފަހުންނެވެ.
މި ބަދަލު ގެންނެވިއިރު މާލެއާ ހުޅުމާލެ އިން ކަރަންޓް ކެނޑޭ މައްސަލަ ވަނީ ބޮޑުވެފަ އެވެ. ޚާއްސަކޮށް މި އަހަރުގެ ޖޫން މަހުގެ ފުރަތަމަ ދުވަހު މުޅި މާލެއާ ހުޅުމާލެ އިން ކަރަންަޓް ކެނޑުނު މައްސަލަ ހިމެނެ އެވެ. އެ މައްސަލައާ ގުޅިގެން މިނިވަން ތަހުގީގެއް ހިންގާ އެކަމުގަައި އިހްމާލެއް އޮތްތޯ ބެލުމަށް ރައީސް ވަނީ ކަމާބެހޭ އިދާރާތަކަށް އަންގަވާފަ އެެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
