ހިރިލަންދޫގެ ގިނަ މަޝްރޫއުތަކެއްގެ އަމަލީ މަސައްކަތް ފަށައިފި

ތ. ހިރިލަންދޫގެ ގިނަ މަޝްރޫއުތަކެއްގެގެ ޢަމަލީ މަސައްކަތް މިއަދު ފަށައިފިއެވެ.

މި މަސައްކަތްތައް ރަސްމީކޮށް ފައްޓަވައިދެއްވީ، މިހާރު ރައީސް ޑރ. މުޙައްމަދު މުޢިއްޒު ތ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން އެ ރަށުގައި ބޭއްވި ޚާއްސަ ރަސްމިއްޔާތުތަކެއްގައެވެ.

އެގޮތުން ހިރިލަންދޫގެ މަގުތައް ޒަމާނީ ފެންވަރަށް ހެދުމުގެ މަޝްރޫއު ހަވާލުކޮށްފައިވަނީ 70.5 މިލިއަނަށް ރޯޑް ޑެވެލޮޕްމަންޓް ކޯޕަރޭޝަން (އާރްޑީސީ) އަށެވެ. އެގޮތުން މަގު ހެދުމުގެ މަޝްރޫއުގެ ޢަމަލީ މަސައްކަތް ފައްޓަވައިދެއްވީ ގެދޮރުވެރިކަމާއި ބިނާރާ ބެހޭ ވުޒާރާގެ ވަޒީރު ޑރ. އަބްދުﷲ މުއްތަލިބްއެވެ.

ވަޒީރު ޑރ. މުއްތަލިބްގެ އަރިހުގައި، މަޖިލީހުގެ މެންބަރު އަލީ އަޝްރަގް، ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ)ގެ މެނޭޖިންގް ޑިރެކްޓަރު އިބުރާހިމް ނަޒީމް، އަދި ހިރިލަންދޫ ކައުންސިލްގެ ރައީސް މުހައްމަދު ޖަލާލް ވެސް ބައިވެރިވެވަޑައިގެންނެވިއެވެ.

މީގެ އިތުރުން އެ ރަށުގައި އަލަށް ޤާއިމްކުރާ މިސްކިތުގެ ބިންގާ ވެސް މިއަދު އަޅާފައިވާއިރު، އެ ބިންގާ އަޅުއްވައިދެއްވީ އިސްލާމީ ކަންތައްތަކާ ބެހޭ ވަޒީރު މުޙައްމަދު ޝަހީމު އަލީ ސަޢީދުގެ އިތުރުން، ގެދޮރުވެރިކަމާއި ބިނާރާ ބެހޭ ވުޒާރާގެ ވަޒީރު ޑރ. އަބްދުﷲ މުއްތަލިބްއެވެ.

އަދި އެ ރަށުގެ ފިޓްނެސް އެންޑް ރެކްރިއޭޝަން ސެންޓަރުގެ ބިންގާ ވެސް މިއަދު އަޅާފައިވާއިރު، އެ މަޝްރޫއުގެ ބިންގާ އަޅުއްވައިދެއްވީ އެ މަސައްކަތް ހަވާލުކޮށްފައިވާ އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފު އަދި ކުޅިވަރާއި ހަށިހެޔޮކަމާއި ބެހޭ ވަޒީރު ޑރ. އަބްދުﷲ ރާފިޢުއެވެ.

އަދި އެ ރަށުގެ ކައުންސިލުގެ އައު އިމާރާތުގެ ބިންގާ ވެސް މިއަދު ވަނީ އަޅާފައެވެ. އެގޮތުން އެ ބިންގާ އަޅުއްވައިދެއްވީ އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރުއެވެ. އެ މަސައްކަތް ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ)އާއެވެ.