ޤުރްއާން އެސްއެސްސީ އިމްތިޙާނުގެ ޕައިލެޓް ޓެސްޓު ނޮވެމްބަރުގައި ބާއްވަނީ
ލިޔުންތެރިޔާ
ސްޓާފް ރައިޓަރ
ޤުރްއާން މާއްދާގެ އެސްއެސްސީ އިމްތިޙާނު 2027 ވަނަ އަހަރު ރަސްމީކޮށް ފެށުމަށްޓަކައި މިއަހަރުގެ ނޮވެމްބަރުގައި 10 ސްކޫލެއްގައި ޕައިލެޓް ޓެސްޓެއް ބޭއްވުމަށް ސަރުކާރުން ނިންމައިފިއެވެ.
ދެވަނަ ޓާމް ޓެސްޓު ނިމުމާ އެކު ކުރިއަށް ގެންދާ މި ޕައިލެޓް މަރުޙަލާއަށް ރާއްޖޭގެ އެކި ސަރަޙައްދުތަކުން ސްކޫލުތައް ހޮވައި ނިންމާފައިވެއެވެ. ތަޢުލީމާ ބެހޭ ވުޒާރާއިން އެ ސްކޫލުތަކަށް ފޮނުވި އުޞޫލުގައި ބުނެފައިވާ ގޮތުން ޓޮޕް ޓެންގެ ވަނަތައް ލިބޭނީ ވެސް މި އިމްތިޙާނުން ދަރިވަރު ފާސްވެގެންނެވެ.
ޤުރްއާނުން އެސްއެސްސީ އިމްތިޙާނެއް ނެގުމުގެ މަސައްކަތް ފުރަތަމަ ފެށީ ރައީސް ޢަބްދުالله ޔާމީން ޢަބްދުލްޤައްޔޫމުގެ ސަރުކާރުގައެވެ. އެހެންނަމަވެސް 2018 ގައި ވެރިކަމަށް އައި އެމްޑީޕީ ސަރުކާރުން ނިންމީ އެ އިމްތިޙާނު ނުބާއްވައި ބޭއްވުމެވެ.
އެ ދުވަސްވަރު އިމްތިޙާނާ ދެކޮޅަށް 300 ބެލެނިވެރިންގެ ޕެޓިޝަނެއް ހުށަހެޅި ނަމަވެސް އެއާ ވާދައަށް އިމްތިޙާނު ބޭއްވުމަށް އެދި 1,000 ބެލެނިވެރިންގެ ސޮޔާ އެކު ބޮޑު ޕެޓިޝަނެއް ވެސް ހުށަހެޅުނެވެ. އޭރުގެ ސަރުކާރުން އިސްކަން ދިނީ 300 ބެލެނިވެރިންގެ ޕެޓިޝަނަށް ކަމަށް ވެފައި ޤުރްއާން މުދައްރިސުން ތަމްރީނުކުރުމުގެ ނަމުގައި އެއް އަހަރަށް އިމްތިޙާނު ފަސްކުރިއެވެ.
އެމްޑީޕީގެ ފަސް އަހަރުގެ ވެރިކަން ނިމުނު އިރު ވެސް ޤުރްއާން އެސްއެސްސީ އިމްތިޙާނެއް ވެސް ބޭއްވިފައެއް ނުވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރު ވަނީ ޤުރްއާން އެސްއެސްސީ އިމްތިޙާނު އަލުން ބާއްވަވާނެ ކަން އިޢުލާނު ކުރައްވައިފައެވެ. އެ ނިންމެވުމާ އެކު ޢަމަލީ މަސައްކަތް މިހާރު ނިމި 2027 ގައި ރަސްމީ އިމްތިޙާނު ބާއްވާ ފަހު މަރުޙަލާއަށް ވާސިލުވެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
