ކައުންސިލްގެ ވަކި ކޯޓާއެއް ނުކުޅެދުންތެރިކަން ހުންނަ މީހުންގެ ވަޒީފާއަށް ޚާއްސަކުރާނަން: ޢާޒިމާ

މާލެ ސިޓީ ކައުންސިލްގެ ވަކި ކޯޓާއެއް ނުކުޅެދުންތެރިކަން ހުންނަ މީހުންނަށް ޚާއްސަ ކުރައްވާނެ ކަމަށް ވެރިކަންކުރާ ޕީއެންސީގެ ޓިކެޓްގައި މާލޭ މޭޔަރ ކަމަށް ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.

ރޭ ސަންގު ޓީވީން ގެނެސްދިން މޭޔަރ ބަހުސްގައި، އާޒިމާގެ މޭޔަރ ކަމުގައި ނުކުޅެދުންތެރިކަން ހުންނަ ފަރާތްތަކަށް ފަހި ފުރުސަތުތައް ފަހި ކޮށްދިނުމަށް ކުރުމަށް ނިންމަވާފައިވާ ކަންކަމާއި ގުޅޭގޮތުން ވާހަކަ ދައްކަވަމުން ވިދާޅުވީ، ގާނޫނުގައިވާ ގޮތުގެ މަތީން ނުކުޅެދުންތެރިކަން ހުންނަ މީހުންނާއި ކުދިންގެ ދަފްތަރެއް އެކުލަވާލަންޖެހޭ ކަމަށެވެ. އަދި އެއީ އެންމެ ފުރަތަމަ ކުރަންޖެހޭ މަސައްކަތް ކަމަށްވެސް އޭނާ ވިދާޅުވި އެވެ.

މިއާއެކު ޢާޒިމާ ވިދާޅުވީ، ނުކުޅެދުންތެރިކަން ހުންނަ ކުދިންނަށް ޚާއްސަކޮށް، ތަޢުލީމް ނަމުގައި ހިންގުމަށް މިހާރުވެސް ޚާއްސަ ޕްރޮޖެކްޓެއް ތައްޔާރުވަމުންދާ ކަމަށާ، އެ ޕްރޮޖެކްޓްގެ ދަށުން 18 އަހަރު ފުރުމުންވެސް އެފަދަ ކުދިންނަށް ސުކޫލްގައި ތަޢުލީމް ހާސިލް ކުރުމުގެ ފުރުސަތު ފަހިކޮށްދީ އެކި އެކި ތަމްރީންތައް ހެދުމުގެ ފުރުސަތު ލިބިގެންދާނެ ކަމަށެވެ.

މީގެ އިތުރުން، ނުކުޅެދުންތެރިކަން ހުންނަ ފަރާތްތަކަށް ވަޒީފާއާއި ގުޅޭ، ތަމްރީންތައް ދިނުމަށް އޮކިއުޕޭޝަނަލް ތެރަޕީދޭ ސެންޓަރެއްވެސް ގާއިމް ކުރައްވާނެކަމަށް ޢާޒިމާ ވިދާޅުވި އެވެ.

އަޅުގަނޑުގެ މޭޔަރ ކަމުގައި، މާލޭ ސިޓީ ކައުންސިލްގައި ވަކި ކޯޓާއެއް ނުކުޅެދުންތެރިކަން ހުންނަ ކުދިންނަށާއި މީހުންގެ ވަޒީފާއަށް އަޅުގަނޑު ހަމަޖައްސާނަން. އެ ވަޒީފާއަށް އެހެން މީހުންނެއް ނޫން، ހަމަ ނުކުޅެދުންތެރިކަން ހުންނަ މީހުންނަށް ހާއްސަ ކޯޓާއެއް އަޅުގަނޑުގެ މޭޔަރ ކަމުގައި ހަމަޖައްސާނަން.

ޢާއިޝަތު ޢާޒިމާ ޝަކޫރު

ޖިސްމާނީ ނުކުޅެދުންތެރިކަން ހުންނަ މީހުންނަށް ކުރިމަތިވާ އެންމެ ބޮޑު ދަތިކަމަކީ، ތަންތަނަށް ވަދެ ނުކުތުމާއި، ހިނގާ ބިނގާވެ އުޅުމަށް ދިމާވާ ދަތިކަން ކަން ފާހަގަކުރައްވައި ޢާޒިމާ ވަނީ، އޭނާގެ މޭޔަރ ކަމުގައި އެ މައްސަލަ ހައްލު ކުރުމަށް މަސައްކަތް ކުރައްވާނެ ކަމަށް ވިދާޅުވެފައެވެ.

މީގެ އިތުރުން އާޒިމާގެ މޭޔަރ ކަމުގައި މުނިސިޕަލް ޑޭކެއަރ ގާއިމްކޮށް، ނުކުޅެދުންތެރިކަން ހުންނަ ކުދިންނާއި, މީހުން، އެފަރާތްތަކުގެ ބެލެނިވެރިންނާއި އެކީގައި އެ ސެންޓަރު ތެރޭގައި ބެލެހެއްޓޭނެ އިންތިޒާމް ހަމަޖައްސަވާނެ ކަމަށް އޭނާ ވިދާޅުވި އެވެ.

އާޒިމާ ވިދާޅުވީ އޭނާގެ އެންމެ މުހިންމު ކަމެއްގް ގޮތުގައި އިސްކަންދޭ ކަންކަމުގެ ތެރޭގައި ނުކުޅެދުންތެރިކަން ހުންނަ މީހުންނާއި ކުދިންނަށް ފަސޭހަ ގޮތްތައް ފަހިކޮށްދިނުން ހިމެނޭނެ ކަމަށެވެ.